Read Batak Dairi 2 Musa 12 Bible Online

2 Musa 12 - Batak Dairi bible

2 Musa 12

¹Nai mengerana mo JAHOWA taba si Musa dekket si Aron i tanoh Mesir. Nina mo,

²“Bulan èn mo gabè bulan pekesada ibas ari penanggalen ndènè.

³Bagahken mo perèntah èn taba karina bangsa Israel: i ari sipuluh bulan èn, gennep anak laki kennah menèat sada biri-biri mahan pangaen kalak i si sada jabu.

⁴Mula cituksu bilangen kalak i sada jabu lako mengkeriken sada anak biri-biri, ndorok mo sisada jabu i rebbak dekket gembar sapona kipangan anak biri-biri i. Kennah ibagi ngo jukut biri-biri i rembang mi bilangen si mangan i.

⁵Ndorok ngo pilihen ndènè biri-biri barang pè kambing tapi kennah tonggal mo, janah oda lot tikasna.

⁶Kennah piara kènè ngo i soh mi ari sipuluh empat. Tupung ari i, cibonna, karina bangsa Israel kennah menèat anak biri-biri i.

⁷Dalisken kènè mo cituk darohna i mi duana tihang pèntu dekket mi tekkang pèntu bages bekkas kalak i kipangan biri-biri i.

⁸Bernginkenna i kennah i panggang ngo jukut i janah ipangan merdengan roroh mpagit dekket roti siso meragi.

⁹Kennah bolet ipanggang anak biri-biri i, i si dekket takalna, nènèhna dekket bitukana. Pangan kènè mo jukut sienggo ipanggang idi, ulang lot kipangan matah barang ibelgang.

¹⁰Ulang lot ahanken kènè gulè i cituk pè soh siceggen; mula lot dèng tading, kennah i tutung ngo i kerri.

¹¹Tikan mangan idi kennah mo enggo merpakèen kènè lako berkat mi perdalanen, solop i nènèh dekket tongket i tangan. Kennah sudu kènè mangan. Imo Pèsta Paskah lako pesangapken Aku, JAHOWA.

¹²Bernginna i agahenKu mo karina tanoh Mesir, janah memunuh karina anak situaen, jelma bang pinakan pè. HukumenKu mo karina dèbata silot i tanoh Mesir, kerna Aku ngo JAHOWA.

¹³Daroh silot i pèntu bages ndènè imo gabè tanda gennep sapo siniianen ndènè. Mula enggo Kuidah daroh idi, lausenKu mono kènè janah oda Kubinasaken sinderrang menghukum kalak Mesir idi Aku.

¹⁴Asa kennah pestanken ndènè ngo ari idi gabè ari pèsta pernèngèten bai JAHOWA. Kennah pèstaken kènè ari i gennep tahun.”

¹⁵Nina JAHOWA mo, “Pitu ari dekkahna oda ndorok kènè kipangan roti meragi. Ibas ari perlebbè karina ragi kennah agoi kènè i bages ndènè nai, kerna ibas sidekkah pitu ari i barang isè kalak kipangan roti meragi, oda ètongen nèngè ia bilangen bangsangKu.

¹⁶I ari perlebbè, dekket i ari pepituken, kennah ngo kènè pulung lako mersembah. Oda ndorok kènè mahan bahaan kadè pè ibas sidari i, laènken mertasak pangaan sambing.

¹⁷Tupung ari i mo Kuarak karina bangsamu i tanoh Mesir nai. Kumerna i mi podinkenna èn, gennep tahun, kennah mo pèstanken ndènè i mahan pernèngèten.

¹⁸I bulan perlebbè, mulai ari sipuluh empat berngin, soh mi ari duapuluh sada berngin, oda ndorok kènè mangan roti meragi. Sidekkah sipitu ari i, karina ragi kennah iagoi i sapo ndènè nai. Kalak Israel barang kalak sidèban sikipangan roti meragi sidekkah pèsta i, oda nè ètongen bilangen bangsangKu.”

¹⁹

²⁰

²¹Idiloi si Musa mo karina pengulu kalak Israel janah idokken taba kalak i, “Berkat mo kènè janah gennep jabu mo kènè memuat sada anak biri-biri mahan haliu mi Pèsta Paskah.

²²Buat mo sada rakuten hysop, sornepken mo mi bagasen sambung simerisi daroh biri-biri i, nai dalisken mo mi duana tihang pèntu dekket tekkang pèntu bages ndènè. Soh mi siceggen ulang lot sada kalak pè ibas kènè nai menadingken sapo.

²³Sinderrang iagahi JAHOWA nagerri èn lako memunuh kalak Mesir, idah JAHOWA mo daroh ipas sidua tihang pèntu dekket i tekkang pèntu bages ndènè; nai ilausi sambing mo i, janah oda padiatenNa malaèkat Maut memengketti bages ndènè lako memunuh kènè.

²⁴Kènè dekket karina dukak-dukak ndènè, kennah menguèi perèntah idi soh mi sidekkah-dekkahna.

²⁵Mula enggo ibengketti kènè nagerri sienggo iperbagah JAHOWA bai ndènè kennah ngo bakinen ndènè pèsta pernèngèten ènda.

²⁶Mula ikusoken dukak-dukak ndènè, ‘Kadè ngo lapaten pèsta èn?’

²⁷Kennah mo aloi kènè, ‘En mo pèlèen Paskah lako pesangapken JAHOWA, kerna ilausi ngo gennep sapo kalak Israel i Mesir, tikan ibunuh gennep anak situaen kalak Mesir, janah kita ibelli ngo nggelluh!’ ” Nai sujud mo kalak Israel, janah mersembah.

²⁸Nai laus mo kalak i mengulaken bagè siniperèntahken JAHOWA taba si Musa dekket si Aron.

²⁹Tengah bernginna i ibunuh JAHOWA mo karina anak situaen bangsa Mesir, mulai anak raja i nai, soh anak kalak sikurungen ibas kurungen. Karina pinakan siperlebbè tubuh pè ibunuh ngo.

³⁰Asa bernginkenna i, merndungoen mo raja, dekket pugabè bak karina kalak Mesir. Terdengkoh mo sora derru-derru nggang kalohon i suberri nagerri Mesir sada bages pè oda lot siso kepatèen anak.

³¹Ibas bernginkenna i ma, idilo raja i mo si Musa dekket si Aron janah idokken, “Laus mo kènè karina i sèn nai! Tadingken kènè mo nagerringku èn! Laus mo kènè menembah Dèbata ndènè bagè sinipidoken ndènè i.

³²Embah kènè mo karina, lembu, biri-biri dekket kambing ndènè, janah berkat mo kènè. Pidoken ma mo pasu-pasu lako bangku!”

³³Idessak kalak Mesir mo kalak Israel asa ndor lako menadingken nagerri i. Nina kalak i mo, “Matè mo kami karina mula oda kènè laus!”

³⁴Nai ibuati kalak Israel mo panci-panci kalak i simerisi topong roti sienggo igaru siso meragi, itukkus mo dekket gedda, janah iembah.

³⁵Ninganna enggo kin ma ngo ibakin kalak i bagè sienggo idokken si Musa, imo mengido emmas dekket pirak dekket pakkèen bai kalak Mesir nai.

³⁶Ibakin JAHOWA mo gabè meluh atè kalak Mesir taba kalak Israel, gabè ipemberrèken kalak i mo karina sinipengido kalak Israel. Bagi mo carana kalak Israel merembah kinibèak kalak Mesir mbungkas i nagerri idi nai.

³⁷Nai berkat mo kalak Israel janah merdalan nènèh i kuta Raamses nai mi kuta Sukot. Buè kalak idi 600.000 kalak, oda engket ibilang daberru dekket anak-anak.

³⁸Iembah kalak i ngo mbuè, lembu, biri-biri dekket kambing. Nterrem ma ngo bilangen kalak sidèban dekket.

³⁹Itutung kalak i mo roti siso meragi ibas topong sienggo icampur kin siniembah kalak idi i Mesir nai. Sintempu ngo kalak i ipellaus i tanoh Mesir nai, gabè oda sanga mèmaken bekkel.

⁴⁰Enggo mo 430 tahun dekkahna bangsa Israel merian i tanoh Mesir.

⁴¹Iari perpodi tahun pe 430 ken i, karina rombongen bangsa JAHOWA menadingken tanoh Mesir.

⁴²Bernginna idi JAHOWA ngo dak menjamoti kalak i, lako menaruhken kalak i mbungkas i Mesir nai. Janah i ma mo berngin soh mi podi ari ipèlèken bai JAHOWA mahan berngin pernèngèten. Ipas berngin idi kennah ngo bangsa Israel dak tong ndungo merjaga-jaga.

⁴³Nai nina JAHOWA nola mo taba si Musa dekket si Aron, “En mo hatoren tersèngèt Pesta Paskah. Kalak sidèban oda ndorok kipangan jukut biri-biri sinipèlèken tupung ari Paskah.

⁴⁴Tapi hamba sinitokor ndènè ndorok ngo dekket kipangan mula enggo ia isittak.

⁴⁵Kalak siroh barang kalak gajien oda ndorok kipangan i.

⁴⁶Karina jukut biri-biri i kennah ibagasen sapo ngo ipangan, janah oda ndorok iembah mi ruar. Ulang ipenggel sada pè ibas tulanna nai.

⁴⁷Karina bangsa Israel kennah memèstaken kerja i.

⁴⁸Kalak siso itakkil oda ndorok kipangan pangaen pèsta i. Mula lot kalak sidèban sienggo menettap dekket kènè naing dok atèna memèstaken Paskah i lako pesangapken Aku, JAHOWA, karina anak laki simpangansa kennah lebbèken itakkil. Enggo kessa bagi ètongen mo kalak i dos bagè kalak Israel asli, janah ndorok engket mer-Pèsta Paskah.

⁴⁹Dos mo hatoren i merlakku taba kalak Israel asli dekket taba kalak sidèban sienggo menettap itengah-tengah ndènè.”

⁵⁰Karina ngo kalak Israel menguèi janah mengu- laken karina siniperèntahken JAHOWA taba si Musa dekket si Aron.

⁵¹Tupung arinkenna i iembah JAHOWA mo karina bangsa Israel mbungkas i tanoh Mesir nai.