Read Batak Dairi 2 Musa 13 Bible Online

2 Musa 13 - Batak Dairi bible

2 Musa 13

¹Idokken JAHOWA nola mo taba si Musa,

²“Pèlèken mo karina anak situaen bangKu. Gennep anak situaen Israel, dekket gennep pinakan tonggal siperjolo tubuh, Aku ngo sidasa i.”

³Nina si Musa mo taba bangsa Israel, “I ari sidari èn ipaluah JAHOWA mo kènè, merkitè kuasa mahantu, gabè ndorok mo kènè mbungkas i tanoh Mesir nai, bekkas ndènè iperhamba idi. Kumerna i bakin kènè mo pernèngèten ari èn. Ulang mo pangan kènè roti meragi.

⁴Ibas ari sidari èn ari sada bulan Abib barang bulan sada, tadingenken ndènè mo nagerri Mesir.

⁵Merkitè bulaban ijandiken JAHOWA ngo taba empung ndènè lako memerèken bai ndènè nagerri bangsa Kanaan, Het, Amon, Hewi dekket Jebusi. Enggo kessa iembah JAHOWA kènè mi nagerri bèak janah nggabur idi, gennep tahun i bulan Abib, kennah mo pèstanken ndènè ari pernèngèten èn.

⁶Pitu ari mo dekkahna kènè kennah kipangan roti siso meragi, janah ibas ari pepituken kennah mo petupaen ndènè pèsta lako pesangapken JAHOWA.

⁷Ibagasen sipitu ari i, oda ndorok kènè kipangan roti meragi janah karina nagerri ndènè oda ndorok lot ragi bagi ma barang kadè sambing simerragi.

⁸Ibas pertebenaen pèsta idi kennah mo kènè menukutken taba gennep dukak ndènè daholi magahken iulaken kènè pè karina idi imo kumerna karina sienggo ibaing JAHOWA taba kènè sinderrang itadingken kènè tanoh Mesir.

⁹Pèsta ènda mo lako pesèngètken taba kènè sikira tanda sinièketken i tangan barang i perdempaken ndènè. Pèsta ènda ma mo pesèngètken taba kènè asa dak tong mengeruapken dekket mengguruken Pati-patiin JAHOWA, kerna enggo ipaluah JAHOWA kènè i tanoh Mesir nai merkitè kuasaNa simbelgah i.

¹⁰Pèstaken mo pèsta ènda gennep tahun ibas ari sienggo itentuken.”

¹¹Nai idokken si Musa mo taba bangsa Israel, “Itaruhken JAHOWA ngo kènè mi nagerri Kanaan sinijanjikenNa i merkitè bulaban bai ndènè dekket empung ndènè. Enggo kessa gabè milik ndènè tanoh idi,

¹²kennah ngo sembahenken ndènè gennep anak daholi buka baju deket karina pinakan tonggal siperlebbè tubuh. Karina i JAHOWA ngo sidasa,

¹³tapi ukum nasa kalodè tonggal siperlebbè tubuh kennah itebbus bai JAHOWA nai merkitè memèlèken sada anak biri-biri mahan gancihna. Mula oda kènè nggèut menebbus kalodè idi, kennah ibohokken mo kerahongna. Gennep dukak ndènè daholi siperlebbè tubuh kennah ngo itebbus.

¹⁴Mula roh dukak-dukak ndènè mengkusoken i podi ari kadè ngo lapatenna i karina, kennah bagèen ngo jabab ndènè, ‘Merkitè kuasa mbellen iembah JAHOWA ngo kita mbungkas i tanoh Mesir nai, bekkasta kin iperhamba.

¹⁵Sinderrang ipepihir raja Mesir ukurna janah oda padiatken kita laus, ibunuh JAHOWA mo gennep anak situaen i Mesir, anak jelma bang anak pinakan pè. Kumerna i ngo kita asa memèlèken bai JAHOWA gennep pinakan tonggal siperlebbè tubuh, tapi tebbusenta mo gennep anakta situaen.’

¹⁶Kecemmalen idi mo gabè sèngèt-sèngèt banta sikira tanda sinirakutken ibas tangan dekket perdempakenta. Merkitè bagi mo kita dak tong ipesèngètken magahken enggo ipaluah JAHOWA kita i tanoh Mesir nai merkitè kuasana simbelgah i.”

¹⁷Enggo kessa ipadiat raja Mesir bangsa Israel laus oda ngo tarap dalan mengelausi nagerri Palistin kalak idi iembah Dèbata, tukasi pè tarap i ngo dalan sinjolmitna. Dok atè Dèbata, “Ulang-ulang gabè peselsel nola kalak i mula idah kennah merperang kalak i, nai mènter balik nola mi tanoh Mesir.”

¹⁸Kumarna i iembah JAHOWA mo kalak i merèluk tarap padang gurun menuju laut Gelagah. Tikan menadingken nagerri Mesir, mersenjata ngo kalak Israel tosè bagè lako mergeraha.

¹⁹Iembah si Musa ngo tulan-tulan si Josep, kerna sinderrang i nggelluhna dèng idokken si Josep ngo kalak Israel merbulaban asa ibakin bagi. Bagèen ngo tennah si Josep, “Tikan ipaluah JAHOWA kènè, kennah embahen ndènè ngo bangkèngku i bekkas ènda nai.”

²⁰Nai itadingken kalak Israel mo kuta Sukot janah laus nola mo kalak i merundung-undung mi kuta Etam, i biding padang gurun.

²¹Tikan mahar merdalan ngo JAHOWA i lebbè kalak i ibagasen tihang hembun janah mula tikan berngin ia mo i lebbè kalak idi ibagasen tihang api lako petuduhken dalan. Merkitè bagi ndorok mo kalak i merdalan mahar dekket berngin.

²²Suntuk ari dak i lebbè bangsa i ngo hembun i janah suntuk berngin tihang api mendengani kalak idi.