Read Batak Dairi 2 Musa 15 Bible Online

2 Musa 15 - Batak Dairi bible

2 Musa 15

¹Nai iendèken si Musa dekket kalak Israel mo endè èn lako memoji JAHOWA, “Naing merendè ngo aku lako bai JAHOWA, kerna enggo tangkas Ia mennang. Karina kuda dekket simengkundulisa iambongken mi bagasen laut.

²JAHOWA ngo mengkepkep aku Ia ngo paluahken aku. Ia ngo Dèbatangku, naing pojienku ngo Ia, Dèbata sinisembah empungku, petembulenku ngo Ia.

³JAHOWA ngo lubalang mahantu, JAHOWA, ngo gerarNa.

⁴Soridadu kalak Mesir dekket karina kurètana, ikebbekken mi laut. Pakalima-pakalima simergegoh lenneng i laut Gelagah.

⁵Itellen laut simbages i ngo kalak i, janah tosè bagè batu lenneng mi andesenna.

⁶Kelengangen kalohon ngo kegegohenMu, alè JAHOWA, kerri ngo sompar baèr musuh ibakin Ko.

⁷Merkitè kinitèmbulMu mahangga i, ibinasaken Kono karina simengalo Ko. PungurMu mergollah bagè api, janah menutung kalak i bagè ronci.

⁸Laut isempul Ko, merpuyu mo laè mi dates, ntengkes bagè ling-ling, gabè ndorok merdalan tarap dangaen laut.

⁹Nina musuh i mo, ‘kujalang janah kutangkup mo kalak i, kusintak mo pedangku, janah kuenggoi kalak i. Nai kurampasi mo karina harta kalak i, kupempellaken mo, janah kukerriken soh mpulak kuakap.’

¹⁰Tapi ukum JAHOWA sikali kumessah mengkerohken ari kememago bai kalak Mesir. Lenneng kalak i tosè bagè cimberrah mbotong ibas laè simergoncang.

¹¹Menter lot kin mo dèbata sindorok mengalo Ko, alè JAHOWA simermulia janah simbadia? Mènter isè mo ndorok memaingken kelengangen dekket perbuaten mahantu bagè JAHOWA?

¹²Iambasken Ko sambing, tanganMu kamuhun, mènter mersep ngo musuh ibendut tanoh i.

¹³Iuluken Ko ngo bangsa sienggo nipaluahmen, kumerna setia Kono i jandiMu. Merkitè kegegohen mahantu ilenggemmi Kono kalak i, janah iteggu-teggu Kono mi tanohmu simbadia i.

¹⁴Idengkoh bangsa-bangsa sidèban mo i, gabè menggirgir; kalak Palistin dekket raja-raja Edom gontar.

¹⁵Kalak Moab simergegoh i, kadotdot ndutdut mo kalak Kanaan.

¹⁶Mbiar kalohon mo kalak i, menaksiken kegegohen JAHOWA. Tikan memellus bangsaMu, oda pang musuh mengambat; rempur mo bangsa sienggo nipaluahmi.

¹⁷Nai itaruhken Kono mo Israel mi bekkas sienggo ipilih Kono kin mahan bekkasMu. Menettap mo kalak i i dellengMu simbadia i, i bages sinipajekMu sendiri.

¹⁸Ko ngo JAHOWA, Raja, simemerèntah soh mi sidekkah-dekkahna.”

¹⁹Sinderrang isuberrangi kalak Israel i laut, merdalan ngo kalak i ipas dangaen laut sienggo kerrah i. Tapi sinderrangna mbengket kurèta-kurèta kalak Mesir bak kuda dekket simengkundulisa mi bagasen laut, ibakin JAHOWA mo merdalan laè laut i nai mènter terneknek mo kalak i.

²⁰Nai ibuat si Miryam, sada kalak nabi daberru turang si Aron mo gendangna, janah karina daberru mersipalu gendangna ninganna tumatak.

²¹Merèndè mo si Miryam i tengah kalak i, “Merendè mo lako bai JAHOWA, kerna enggo tangkas Ia mennang. Karina kuda dekket simengkundulisa, iosepken mi bagasen laut.”

²²Enggo kessa i iuluken si Musa mo bangsa Israel i Laut Gelagah nai menuju padang gurun Syur. Sidekkah tellu ari kalak i merdalan ipadang gurun i laju oda lot jumpa laè.

²³Nai soh mo kalak i mi sada bekkas simergerar Mara, tapi mpagit kalohon ngo laè sinisidi gabè oda terènum. Kumerna i igerari kalak i mo bekkas idi Mara, lapatenna mpagit.

²⁴Nai ngut-nguten mo kalak i taba si Musa janah mengkusoken, “Kadè nola mo ènumenta?”

²⁵Mersodip mo si Musa ibagasen ukur kibbul taba JAHOWA, nai ituduhken JAHOWA mo tabasa kayu simpenggel. Iambongken si Musa mo kayu i mi bagasen laè idi, nai gabè tabar mo laè idi janah ndorok iènum. I bekkas i mo JAHOWA memerèken hatoren bai kalak i janah i sidi ma mo Ia mengoji kalak i.

²⁶Nina JAHOWA mo, “Uèi kènè mo Aku mertuhu-tuhu, janah ulaken mo barang kadè simendè bangKu; èkutken mo karina perèntahKu. Mula ibakin kènè bagi, oda Kuhukum nènè merkitè sakit siKupesempa taba kalak Mesir. Aku ngo JAHOWA sipemalumken kènè.”

²⁷Nai enggo kessa i sakat mo kalak i mi sada bekkas mergerar Elim. Lot ngo i sidi sipuluh dua laè mul dekket pitupuluh ngkambenna kurma. Merkemmah mo kalak i i gembar laè idi.