Read Batak Dairi 2 Musa 16 Bible Online

2 Musa 16 - Batak Dairi bible

2 Musa 16

¹Nai berkat mo karina bangsa Israel i Elim nai, janah tupung ari sipuluh lima bulan peduaken enggo kessa kalak i menadingken Mesir, sakat mo kalak idi mi gurun pasir sinikellang-kellang Elim dekket delleng Sinai.

²Sinderrang i gurun pasir idi kalak i ngut-nguten mo kalak i karina taba si Musa dekket si Aron.

³Nina kalak idi mo, “Lotin kin mo nemmuken kami matè i bunuh JAHOWA i tanoh Mesir. I sidi simadana mo ndorok rebbak kundul, mangan jukut dekket roti soh bessur. Keppèken ibabai ko nola kami mi sèn asa matè rapar kami karina.”

⁴Nai nina JAHOWA mo taba si Musa, “Bagendari naing Kururus mo pangaen i dates nai merotcè-otcè bagè udan bai ndènè karina. Gennep ari mo kènè kennah pepulungken pangaen i bias pangaen sidari. Merkitè dalan bagi mo Aku naing mengoji bangsangKu asa Kubettoh barang tah burju ma kalak idi menguèi perèntahKu barang oda.

⁵Tupung ari peenemken, kennah pepulungen kalak i mo pangaen idi dua kali lempit buèna.”

⁶Nai idokken si Musa dekket si Aron mo taba karina kalak Israel, “Bon èn bet- tohen ndènè mo, JAHOWA ngo merembah kènè mbungkas i Mesir nai.

⁷Baremben ceggen idahen ndènè mo cuhaya pekiroh JAHOWA. Idengkoh JAHOWA ngo melaga-laga kènè tabasa; uè, taba JAHOWA, kerna pellin me- ngulaken kadè siniperèntahkenNa ngo kessa kami.

⁸Berrènken JAHOWA mo bai ndènè jukut tikan cibon, dekket roti mula siceggen asa soh bessur kènè, kerna enggo idengkoh JAHOWA melaga-laga kènè tabasa. Situhuna, mula melaga-laga kènè taba kami, melaga taba JAHOWA ngo kènè i sidi.”

⁹Nai enggo kessa i nina si Musa nola mo taba si Aron, “Dokken mo kalak i roh karina menghadep JAHOWA, kerna enggo idengkoh ngut-ngut kalak i.”

¹⁰Tupung mengerana dèng si Aron taba kalak i karina, itengngen kalak i mo mi padang gurun janah mènter sintempu mo taridah cuhaya JAHOWA ibas hembun.

¹¹Nina JAHOWA mo taba si Musa,

¹²“Enggo Kudengkoh ngut-ngut kalak Israel. Bagahken mo taba kalak idi, tupung Ciboen ndorok mo kalak i mangan jukut, janah tupung siceggen mangan roti mo kalak i soh bessur. Nai i bettoh kalak i mo Aku ngo JAHOWA, Dèbata kalak i.”

¹³Tikan Ciboen merrohen mo lèto mbuè kalohon merkolan-kolan sanga isangkemmi karina perundung-undungen i, janah tikan siceggen susur ngo hembun isi kuliling perundung-undungen i.

¹⁴Tikan merhuap kessa hembun idi, taridah mo ibabo gurun pasir i lot menipis tosè bagè sisik janah metmet bagè hembun batu.

¹⁵Idah kalak Israel kessa mo idi, oda ibettoh kalak idi tah kadè i. Nai mersikusoen mo samah kalak i, “Kadè ngo i?” Nai nina si Musa mo taba kalak i, “Imo pangaen siniberrèken JAHOWA bai ndènè.

¹⁶Iperèntahken JAHOWA ngo asa gennep kalak i pepulungken sadikè keperluenna, imo terdua sellup gennep mi sada kalak.”

¹⁷Nai ibakin kalak Israel mo bagi; tapi lot ma ngo pepulungken lebbih dua sellup bagian sada kalak janah lot ma ngo oda dom nasai.

¹⁸Sinderrang isukat kalak i, teridah nola mo kalak sipepulungken mbuè, oda meriba-iba, janah sipepulungken cituk, oda kurangen. Gennep mo pepulungken sadikè siniperlukenna.

¹⁹Nina si Musa mo taba kalak i, “Isè poda ndorok memoniken cituk pè ibas pangaen idi nai mahan pangaen baremben.”

²⁰Tapi lot mo barang piga-piga kalak bai kalak idi nai siso menuihken rana si Musa i. Ipennep kalak i mo dèba ibas pangaen idi nai. Keppèken sibarembenkenna i enggo olongen janah mbau pangaen idi; nai melaga mo si Musa taba kalak i.

²¹Gennep ceggen mo kalak i pepulungken pangaen idi bias mi keperluen kalak i, janah enggo kessa tebenna nggara ari, melala mo pangaen sitadingna deng i tanoh idi.

²²Iari pe-enemken, ipepulung kalak i mo pangaen idi dua kali lempit buèna, imo empat sellup mi sada kalak. Karina sime- nguluken kalak i roh lako memagahken tersèngèt misi taba si Musa.

²³Nina si Musa mo taba kalak i, “Bagèen ngo perèntah JAHOWA: Baremben imo ari pentadien, ari Sabat, ari sinipèlèken taba JAHOWA. Asa kadè kin sinaing panggangen ndènè ari èn, panggang mo, janah kadè kin sinaing belgangen ndènè, belgang mo. Silebbihna mi keperluen sidari èn, pejaè janah pennep kènè mo i lako mi baremben.”

²⁴Nai ipennep kalak i mo pa- ngaen silebbihna i lako mi sibarembenkenna bagè siniperèntahken si Musa; oda nggèut mbari dekket olongen pangaen idi.

²⁵Nina si Musa, “En mo pangaen ndènè sidari èn, kerna ari ari Sabat ngo ari èn, ari pentadien lako pesangapken JAHOWA, janah cituk poda lot jupa kènè pangaen ukum i ruar perundung-undungen.

²⁶Ennem ari mo dekkahna kènè kennah pepulungken pangaen, tapi ukum ari pepituken imo ari pentadien, janah oda lot pangaen susur i babo nai ukum sidari i.”

²⁷Tupung ari pepituken idi, lot mo barang piga-piga kalak Israel naing pepulungken pangaen, tapi kadè poda lot jupa kalak idi.

²⁸Nai nina JAHOWA mo taba si Musa, “Soh ndigan kènè oda nggèut menguèi perèntahKu?

²⁹Engèt mo Kuberrèken ngo bai ndènè sidari mahan ari pentadien. Kumerna i ngo asa i ari peenemken Kuberrèken taba kènè pangaen bias mi dua ari. Tupung ari pepituken i karina mo kennah kom i rumah, janah oda ndorok mi ruar.”

³⁰Kumerna idi ngo ari pepituken oda mahan bahaen kalak i.

³¹Nai igerari kalak Israel mo pangaen idi manna. Rupana bagè buah lada mbentar kètèk-kètèk janah rasana bagè kue sinitenggolien.

³²Nina si Musa mo, “Idokken JAHOWA ngo kita memuat kurang lebbih dua sellup manna mahan penneppen bai pemparenta, asa idah kalak i pangaen siniberrèken JAHOWA banta i padang gurun sinderrang iarahken kita mbungkas i tanoh Mesir nai.”

³³Nai nina si Musa mo taba si Aron, “Buat mo sada serruam pemasuk mo mi sidi lebbih kurang dua sellup manna janah gamparken mo mi hadeppen JAHOWA lako ipennep bai pemparenta.”

³⁴Nai igamparken si Aron mo serruam idi i lebbè Pèti Perpadanen lako penneppen rembang bagè siniperèntahken JAHOWA mbang si Musa.

³⁵Manna idi mo pangaen kalak Israel sidekkah empatpuluh tahun, mema soh kalak idi mi tanoh Kanaan, bekkas kalak i menettap.

³⁶(Sukaten si ncemmal ipakkè kalak idi tikanna i imo sukaten siat-siat duapuluh sellup).