Read Batak Dairi 2 Musa 17 Bible Online

2 Musa 17 - Batak Dairi bible

2 Musa 17

¹Nai enggo kessa i itadingken karina kalak Israel mo padang gurun Sin janah lompat lompat mo kalak i i sada bekkas nai mi bekkas sidèban rembang bagè siniperèntahken JAHOWA. Ipas sada tikki merundung-undung mo kalak i i sada bekkas mergerar Rafidim, tapi oda lot laè enumen i bekkas idi.

²Nai ngut-nguten mo kalak i taba si Musa janah nina kalak idi mo, “Berrè bai nami laè mahan ènumen.” Ialoi si Musa mo, “Kasa ngut-nguten kènè janah mengunjuni JAHOWA?”

³Tapi kerna muasen kalohon kalak idi, janah dak ngo kalak i ngut-nguten taba si Musa. Nina kalak idi mo, “Kasa kin iarahken kono kami mbungkas i Mesir nai? Otang asa matè muasen ngo keppèken kami, dukak-dukak nami dekket pinakan nami?”

⁴Nai tenggo-tenggo mo si Musa taba JAHOWA, nina mo, “Bakunè mo kubaing taba kalak èn? Tengngen mo, naing ibentiri kalak i ngo aku dekket batu.”

⁵Idokken JAHOWA mo mbang si Musa, “Dilo mo barang piga-piga kalak èkuten, janah rebbak merdalan mo kènè i lebbè bangsa i. Embah ma mo tongket sinipakkèmu lako menampet laè Nil.

⁶Cènder pè Aku i lebbèmu i babo sada batu mbellen i delleng Sinai. Sampet mo batu i, asa roh laè i batu i nai, asa ndorok kalak idi mènum.” Ibakin si Musa mo bagi ipetengen-tengen èkuten kalak Israel.

⁷Igerari kalak i mo bekkas idi Masa, kerna i bekkas idi mo kalak Israel mengoji JAHOWA sinderrang ikusoken kalak i, “Idengngani JAHOWA ngo ndia kita barang oda?” Igerari kalak idi ma ngo bekkas i Meriba, kerna i bekkas idi ngut-nguten kalak Israel.

⁸Enggo kessa i roh mo kalak Amalek janah menjuhap kalak Israel i Rafidim.

⁹Nina si Musa mo taba si Josua, “Pilih mo barang piga-piga kalak lako mengalo kalak Amalek. Baremben cènder pè aku i dates sada uruk mencèkèp tongket sinidokken JAHOWA mahan embahen.”

¹⁰Ibakin si Josua mo bagè siniperèntahken si Musa tabasa. Laus mo ia mengalo kalak Amalek, ninganna si Musa, si Aron dekket si Hur menangkeng mi babo sada uruk.

¹¹Sidekkah ipekèkè si Musa tanganna mi dates mennang mo kalak Israel. Tapi ipelènduk si Musa kessa tanganna, kalak Amalek i mo mennang.

¹²Kessa sengngal iakap si Musa, ibuat si Aron dekket si Hur mo sada batu asa ndorok kundul si Musa. Cènder mo si Aron dekket si Hur i kambirang dekket kamuhun si Musa lako menongkel tanganna asa dak tong mi dates soh sundut mataniari.

¹³Dungna talu mo kalak Amalek ibakin si Josua.

¹⁴Nina JAHOWA mo taba si Musa, “Suratken mo tersèngèt kemenangen ènda asa dak tong ièngèt. Bagahken taba si Josua naing Kuripasken ngo kalak Amalek.”

¹⁵Nai ipajek si Musa mo sada langgaten janah igerari “JAHOWA ngo tunggulku.”

¹⁶Nina si Musa mo, “Cèkèp mo ndates pertanda JAHOWA! JAHOWA ngo mergeraha mengalo kalak Amalek soh mi sidekkah dekahna.”