Read Batak Dairi 2 Musa 19 Bible Online

2 Musa 19 - Batak Dairi bible

2 Musa 19

¹Enggo kessa i itadingken bangsa Israel mo Rafidim, janah ari perlebbè bulan petelluken enggo kessa itadingken kalak i Mesir, sakat mo kalak idi mi padang gurun Sinai. Merundung-undung mo kalak idi i pispis delleng Sinai,

³janah ipenangkengi si Musa mo delleng idi lako pejumpa dekket Dèbata. Mongkam mo JAHOWA taba si Musa i delleng i nai janah idokken ia memagahken taba kalak Israel, pemparen si Jakob,

⁴“Enggo idah kènè kadè siKubakin taba kalak Mesir, janah bakunè carangKu merembah kènè menghadep Aku mi bekkas ènda merkitè kuasa mahantu tosè bagè manuk-manuk rajawali merembah anakna i babo kabengna.

⁵Bagèndari pè mula merpenguèi ngo kènè taba Aku janah setia mi perpadanenKu, Kubaing mo kènè gabè bangsangKu sendiri. Aku ngo sidasa suberri dunia èn, tapi kènè mo gabè milik kekelengen atèngKu,

⁶pellin bangKu sambing, janah kènè mo mengkebasi Aku sikira imam.”

⁷Nai susur mo si Musa janah idilo mo karina pengulu-pengulu merpulung, nai isukutken mo taba kalak idi karina sienggo iperèntahken JAHOWA tabasa.

⁸Nai rebbak mengaloi mo kalak idi, “Nggèut ngo kami mengulaken karina sinidokken JAHOWA,” janah ipesakat si Musa mo pengaloi idi bai JAHOWA. Nai nina JAHOWA mo taba si Musa, “Roh pè Aku mendahi kono ibagasen hembun ngkapal; idengkoh jelma nterrem mo Aku mengerana taba kono, janah mulai ibas katika idi nai dak tok mo kalak idi bamu.

¹⁰Bagèndari pè dahi mo kalak i, janah dokken kalak i merkebbas ari èn dekket baremben lako mertumpu. Kennah iuras kalak idi ngo olesna.

¹¹Kennah mo enggo kebbas kalak idi kaduan. Tupung ari petelluken idi susur mo Aku mi babo delleng Sinai, imo bekkas karina kalak ndorok mengidah Aku.

¹²Bakin mo tanda i sikuliling delleng èn, sikira baleng siso ndorok ilausi bangsa ènda. Gerra bangsa i mengenangkengi delleng i, bang mendessingi pè. Barang isè mengelausi baleng idi kennah ihukum matè;

¹³kennah ibentiri ia dekket batu barang ipantem, janah oda ndorok jamahen ia. Karina simengelausi baleng idi kennah matè, jelma barang pè pinakan. Mula terdengkoh kessa sora sarunè ndekkah kalohon kennah mo karina kalak i mengenangkengi delleng i.”

¹⁴Enggo kessa i susur mo si Musa i delleng idi nai janah mendokken kalak i karina asa merkebbas lako mersaor deket Dèbata. Nina mo, “Kaduan kennah enggo kebbas kènè janah ningannai oda ndorok kènè mercampur.” Nai merkebbas-kebbas mo bangsa i, janah menaptapi olesna.

¹⁶I ari petelluken siceggen dèng purpar mo renggur, butbat pelian. Sangkem mo hembun ngkapal kalohon i babo delleng janah terdengkoh mo sora sarunè nggang kalohon. Buradan mo karina kalak siniperundung-undungen i.

¹⁷Iuluken si Musa mo kalak idi mi ruar lako pejumpa dekket Dèbata, nai cènder mo kalak idi i pispis delleng idi.

¹⁸Isangkemmi cèmber mo selli delleng Sinai i, kerna susur ngo JAHOWA mi babo delleng i ibagasen api. Mercèmpul mo cèmber idi tosè bagè cèmber i pinoron nai janah dumegger-degger mo karina delleng idi.

¹⁹Makin nggang kalohon mo sora sarunè. Mongkam mo si Musa, janah ialoi Dèbata mo merkitè renggur.

²⁰Sampur mo JAHOWA mi pucuk Delleng Sinai, janah idilo mo si Musa asa roh mi pucuk delleng idi. Nai menangkeng mo si Musa,

²¹janah nina JAHOWA mo tabasa, “Susur mo ko janah pesèngèt kalak idi, oda ndorok kalak i mengelausi baleng lako roh menengen Aku. Mula tong ngo ilausi kalak idi i, mbuè mo bai kalak idi nai mermatèen.

²²Salangken imam-imam sinaing menjolmiti Aku kennah lebbè iuras ngo dirina, mula oda Kuhukum ngo kalak i.”

²³Nina si Musa mo taba JAHOWA, “Oda ndorok jelma nterrem i menangkeng; kerna idokken Kono bai nami asa kuètong kami delleng èn sikira bekkas simbadia janah mendatèken baleng mengkulilingisa.”

²⁴Ialoi JAHOWA mo, “Susur mo kono, janah balik nola mo ko misèn rebbak dekket si Aron. Tapi ukum imam-imam deket jelma nterrem i oda ndorok mengelausi baleng lako roh mendahi Aku. Mula ilausi kalak i baleng i, Kuhukum ngo kalak i.”

²⁵Nai susur mo si Musa mendahi bangsa i janah ipesakat mo tennah JAHOWA taba kalak i.