Read Batak Dairi 2 Musa 2 Bible Online

2 Musa 2 - Batak Dairi bible

2 Musa 2

¹Sinderrangna i lot mo sada kalak anak laki ibas marga Lepi nai, muat berru tong ibas marga idi nai.

²Nai itubuhken daberru idi mo sada anak. Itengen kessa mo anak mbara idi maholi kalohon, mènter iboniken mo sidekkah tellu bulan.

³Tapi oda ndekkah terbonikennsa anak mbara i. Nai ibuat daberru idi mo sada kirang-kirang ibayu ibas arngo nai, janah idaloh mo dekket tèr asa ulang masuk laè. Igamparken mo mi bagasen kirang-kirang idi anak mbara i, ninganna iembah mi laè Nil janah ibakin mi tengah-tengah kayu arngo sinibiding laè idi.

⁴Cènder-cènder mo turang anak mbara idi narih ndaoh i sidi nai lako mendatèken kadè sinaing masa taba dèdahenna i.

⁵Ningan bagidi roh mo berru raja. Susur mo ia mi laè lako meridi tapi merdalan-dalan ngo radingna dayang-dayang i biding laè idi. Nai sintempu mo i idah berru raja idi kirang bekkas anak i i tengah-tengah arngo i, nai mènter isuruh mo sada kalak naposona daberru lako mengamet.

⁶Ibuka berru raja i kessa mo kirang idi, idah mo lot anak mabra ibagasen, janah dak tangis ngo anak mbara idi. Masèh mo atè berru raja i midahsa janah nina mo, “Dukak kalak Heber ngo èn.”

⁷Nai roh mo turang anak mbara i ninganna ikusoken taba berru raja idi, “Nggèut ngo berru raja i mula kutulusi sada kalak pertua ibages kalak Heber lako pepènumken anak mbara i?”

⁸“Selloh mo idi,” Nina berru raja i. Nai laus mo simerbaju idi mengalengi inangna.

⁹Enggo kessa roh pertua anak mbara i nina berru raja i mo, “Embah mo anak èn, janah pesusu ia lako bangku; kuberrè pè upahmu podiin èn.” Nai iembah mo anak i ipesusu mo.

¹⁰Nai enggo kessa narih mbelgah sikèdèk-kèdèk i, itaruhken partuana mo ia bai berru raja i. Nai iabin berru raja i mo ia gabè dukakna. “Kubakin mo gerarna si Musa, kerna i laè nai ngo ia dapet aku”, nina berru raja i.

¹¹Engo kessa mbelgah si Musa, laus mo ia merdalan-dalan lako menjumpai denganna sada bangsa. Nai idah mo bakunè kalak idi lako mengulaken bahaen mberrat. Idah ma mo tupung sada kalak Mesir memunuh sada kalak Heber.

¹²Idatèken si Musa mo kuliling janah ibettoh kessa mo oda lot isè memperdatèkensa ibunuh mo kalak Mesir idi, nai iboniken mo bangkèna, itamburi dekket kersik.

¹³Sibarembenkenna nola laus ma mo si Musa, idah mo dua kalak Heber merubat samahsa. “Kasa i ligas ko denganmu?” nina si Musa taba simersalah idi.

¹⁴Nai ialoi mo, “Isè pebangkitken kono gabè pengulu dekket perhukum bai nami? Mada ngo naing bunuhenmu ma aku, bagè kalak Mesir sinibunuhmi?” Nai mbiar mo si Musa janah dokatèna, “Enggo jèkat! Enggo ibettoh dèba keppèken ulah-ulahku i.”

¹⁵Terbertik kessa mo bai raja i simasa i, itulusi mo dalan lako memunuh si Musa. Tapi mènter mperrus mo si Musa janah merian mo ia i nagerri Midian. Nai lot mo imam i Midian i, si Jitro gerarna, pitu berruna. Tikan sidari sinderrang kundul-kundul si Musa i gembar sada telaga, roh mo berru si Jitro sipitu kalak idi lako menakui laè mi pelangkah mahan ènumen kambing dekket biri-biri bapana i.

¹⁷Tapi lot ngo barang piga-piga kalak permakan sinisidi pelausken daberru i, nai roh mo si Musa mengurupi kalak i janah iberrè mo mènum pinakan kalak idi.

¹⁸Kessa balik kalak i, ikusoi bapana mo kalak i. “Kasa ndor kalohon kènè balik sidari èn?”

¹⁹Ialoi kalak i mo, “Lot ndai sada kalak Mesir mengurupi kami bai permakan sidèban i nai. Itakui mo laè i bainami janah ipesobur ngo pinakanta i.”

²⁰“Nai enggo idikè ia bagèndari?” nina si Jitro taba berruna idi. “Kasa itadingken kè ia? Lakè mo tenggoi kènè ia asa rebbak kita mangan.”

²¹Uè ngo si Musa merian i si. Nai ipekabin si Jitro mo berruna si Zipora bai si Musa.

²²Itubuhken si Zipora mo sada anak ibakin mo gerarna si Gersom, ai dok atè si Musa ibas ukurna, “Kalak pendampin ngo aku isèn.”

²³Enggo kessa barang piga-piga tahun nola matè mo raja Mesir i. Tapi ukum bangsa Israel tong ngo dak kelsohen kerna dak iperhamba ngo kalak i, dungna pingko-pingko mo kalak i mengido pengurupien. Soh ngo pingko-pingko kalak idi taba Dèbata.

²⁴Ibeggèken Dèbata mo kalak i, janah ièngèt mo padanNa dekket si Abraham, si Isak dekket si Jakob.

²⁵Idah ngo iperhamba kalak Israel i, nai iharkatken mo lako mengurupi kalak i.