Read Batak Dairi 2 Musa 21 Bible Online

2 Musa 21 - Batak Dairi bible

2 Musa 21

¹Nai nina JAHOWA mo taba si Musa, “Pesakat mo taba kalak Israel hatorenen.

²Mula itokor kènè sada kalak hamba i bangsa ndènè nai sendiri, kennah mahan bahaen mo ia rebbak kènè sidekkah ennem tahun. I tahun pepituken kennah iselangsaèken mo ia janah oda pella kadè mahan gararenna.

³Mula anak perana dèng ngo ia sinderrang gabè hamba ndènè, ukum sinibagesna oda ndorok deket iembah tikan selang saè i ia. Tapi mula enggo kin ngo ia merbekkas kom, tikanna gabè hambamu ia, ndorok mo dekket sinibagesna idi rebbakensa.

⁴Mula iperunjukken tuanna i ia bai sada kalak daberru, nai mula lot dukakna, tuanna idi ngo sidasa sinibages deket dukakna idi, janah oda ndorok mengèkut rebbak dekket hamba i tikan selang saè i ia.

⁵Tapi mula umpamana idokken hamba i ngkelleng atèna midah sinibagesna i, dukak-dukakna, dekket tuanna, janah oda nggèut ia iselangsaèken,

⁶nai kennah iuluken tuanna idi mo ia mi bages jerro. Isuruh mo i si hamba idi cènder tunandè i pèntu barang i tihang pèntu bages jerro i, janah kennah itustus tuanna i mo coping hamba idi. Nai gabè hambana mo ia sidekkah nggelluh.

⁷Mula sada kalak daberru Heber idèa bapana gabè hamba, oda ngo iselangsaèken daberru idi enggo kessa pul ennem tahun, jadi oda dos dekket hamba daholi.

⁸Mula oda ngo ia peloloken atè tuanna simerniat naing mengkabinisa, kennah idèa ngo ia balik bai partuana. Oda ndorok idèa daberru idi taba kalak sidèban, kerna enggo oda selloh ia ibakin tuanna siso menuhui jandina.

⁹Mula lot sada kalak menokor hamba daberru lako mahan sinibages anakna, kennah tosè bagè berruna ngo ibaing taba hamba daberru idi.

¹⁰Mula merunjuk nola anak idi tong ngo ia kennah memerrèken pangaen dekket pakèen bak karina bakunè kin hakna bagè kecemmalen bai sinibagesna siperlebbè i.

¹¹Mula oda ibakin bagi, kennah iselangsaèken ngo sinibagesna idi, oda pella lot riar mahan penebusna.”

¹²“Barang isè kalak memunuh jelma sidèban sanga matè, kennah ngo patènken.

¹³Tapi mula itendelli kalak oda isengaja, janah oda lot ukurna lako memunuh, ndorok mo ia mperrus mi sada bekkas siKutuduhken bamu, janah isidi mo ia terondingen.

¹⁴Tapi mula lot sada kalak mènter bura- ngasen, janah sengaja memunuh kalak, nai mèter mperrus ia mi langgatenKu lako meronding-onding, kennah ialeng ngo ia i sidi nai janah ihukum matè.

¹⁵Barang isè memalu bapana barang inangna, kennah ihukum matè.

¹⁶Barang isè menculik jelma, kennah ngo ihukum matè, barang pè tah enggo sanga idèa kalakna barang tah i bagesna dèng pè.

¹⁷Barang isè menumpahi bapana barang inangna, kennah ihukum matè.

¹⁸Mula tupung lot perubaten, lot sada kalak memalu sidèban merkitè batu barang dekket tènju-tènjuna, tapi oda memunuhsa, oda pella hukumen ia. Mula sanga pella gampar kalak sinipaluna idi kumernaken ipalu i,

¹⁹tapi ndorok nola ia kèkè janah merdalan mertongket, kennah ikebbaru simemalu i ngo ia soh njuah, janah menggarar karina kerogien sidekkah ia cioen.

²⁰Barang isè kalak simengelutak hambana daholi barang daberru gabè mènter matè hambana idi, kennah ngo ihukum.

²¹Tapi mula oda ngo matè hamba idi ibagasen sada barang dua ari, oda pella hukumen tuanna idi. Kerogin sisempa bana kumerna kembalangen hamba idi mo sikira hukumen bana.

²²Mula lot barang piga-piga kalak anak laki sidang merubat, janah sada kalak bai kalak idi nai, memaing rèpak sada kalak daberru siberrat-berat rumah gabè keguguren, tapi oda pella kadèen sendihina sidèbankenna i, kennah gararenna mo denda nasa belgah sinidokken sinibalè daberru i janah ituhu-tuhui perhukum.

²³Tapi mula mparah kalohon ngo rèpak daberru idi, jadi hukum mi kejahaten idi, imo kessah gancih kessah,

²⁴mata gancih mata, èpen gancih èpen, tangan gancih tangan, nènèh gancih nènèh,

²⁵ugah gancih ugah, ugah messeng gancih ugah messeng, mbessar gancih mbessar.

²⁶Barang isè mengelipat mata hambana sanga pètung, kennah iselangsaèken ngo hamba idi sikira tebbus matana idi.

²⁷Mula lot sada kalak memalu hambana sanga ncuak èpenna, kennah iselangsaèken mo hamba idi sikira tebbus èpenna idi.”

²⁸“Mula lot sada lembu menambih sada kalak jelma sanga matè, kennah bunuhen ngo lembu idi merkitè ibentiri dekket batu, janah jukutna oda ndorok panganen, tapi oda pella ihukum sidasa idi.

²⁹Mula dak menendengi sambing ngo kecemmalen lembu tonggal idi, janah enggo pennah isèngètken taba sidasa, tapi oda ijaga pinakanna idi, nai mula itendeng lembu tonggal idi sada kalak jelma sanga matè, kennah ibunuh mo pinakan idi merkitè ikebbekki dekket batu, janah sidasa idi pè kennah ihukum matè.

³⁰Tapi mula ipaduè ngo sidasa lembu idi menggarar ali, kennah igarar mo barang sadikè buèna ipido menggarar ali kessahna.

³¹Mula anak laki barang daberru pè sinibunuhna idi, tong ngo hatoren sibagidi merdalan.

³²Mula hamba anak laki barang daberru ngo siterbunuh idi, kennah gararen sidasa lembu i mo tellupuluh riar pirak bai sidasa hamba i, janah lembu idi pè kennah ikebbekki dekket batu soh matè.

³³Barang isè memuat tutup sumur ibas sada sumur nai, barang mengkurak sumur tapi oda itutupi, nai ndabuh mo mi bagasen sada lembu tonggal barang kalodè,

³⁴kennah gararen sidasa sumur idi ngo kerogien bai sidasa pinakan idi, tapi ndorok ngo buatenna pinakan sienggo matè idi bana.

³⁵Mula lot lembu tonggal sada kalak mematèken lembu tonggal milik sidèban, duana sidasa lembu idi kennah rebbak merdèa pinakan singgelluhna i dèng, janah memella kèpèng tokorna. Jukut pinakan simatè idi pè kennah ipella kalak i ma ngo.

³⁶Tapi mella enggo terbettoh dak menendengi sambing ngo kecemmalen lembu tonggal idi, janah oda ijaga sidasa, kennah igancihi ngo dekket lembu tonggal nggelluh, janah ndorok mo ia memuat pinakan sienggo matè idi lako bana.”