Read Batak Dairi 2 Musa 22 Bible Online

2 Musa 22 - Batak Dairi bible

2 Musa 22

¹“Barang isè kalak menangko sada lembu barang biri-biri, nai isèat barang idèaken, kennah gancihenna ngo gennep sada lembu gabè lima lembu janah gennep sada biri-biri gabè empat biri-biri.

²Kennah gancihenna ngo barang sinitangkona. Mula kadèna Poda lot, ia mo idèa gabè hamba, lako menggancihi barang tinangkona idi. Mula merumang lembu, kalodè barang biri-biri ngo sinitangkona idi, janah terdapet bana nggelluh dèng, kennah igancihi ngo gennep pinakan gabè dua. Mula terdapet sada kalak penangko ibas sada sapo tikan berngin, nai gabè terbunuh ia, oda ngo mersalah simemunuh i. Tapi mula tikan mahar ngo simasa i, mersalah ngo ètongen simemunuhsa i.

⁵Barang isè kalak memelli pinakanna menggagat i jumana barang i pekken anggurna, nai gabè laus pinakan idi janah igagati suan-suaen juma ndèba, kennah gararen sidasa pinakan idi ngo gancih kerogienna i merkitè hasil juma barang pekken anggurna simerandalna kalohon.

⁶Barang isè mengelakati api i jumana nai rarat nola mo api i mi juma ni dèba janah mengelekkup kerri pagè situbuh i si barang gukguken pagè sirembaru iperani, kennah igarar simengelakati api i ngo kerogien sidasa juma i.

⁷Umpamana lot mo kalak siuè memoniken barang pellinien merumang kèpèng barang ugasen maharga. Tapi kessa i itangko dèba mo harta pellinien idi i bagesna nai. Mula dapet ngo simenangko i, kennah gararenna mo dua kali lempit.

⁸Tapi mula oda dapet simenangko idi, kennah iarahken mo kalak pellinien i mi bages jerro Dèbata, janah kennah mersumpah mo ia i sidi magahken oda ia menangko harta sinipeliniken idi bana.

⁹Mula lot perselisihen kerna milik, tah pè i tersèngèt lembu, kalodè, biri-biri, pakkèen barang kadè sambing pè mbalang, nai dapet nola, kennah iarahken ngo kalak simengaku ia sidasa milik i mi bages Dèbata. Kennah menggarar dua kali lempit ngo kalak simersalah sinipetarar Dèbata i taba sidasa.

¹⁰Umpamana lot mo sada kalak mema- kani kalodè, lembu, biri-biri barang pinakan sidèban pinakan kaltuna. Nai matè mo pinakan i, barang ugahen barang irampas musuh, keppèken oda lot saksina.

¹¹Mula tupung bagidi kennah laus mo ia mi bages Dèbata janah mersumpah merkitè gerar JAHOWA, magahken oda ngo ia menangko pinakan sienggo ipercayaken tabasa i. Mula tuhu ngo oda ia menangko, kennah sidasa i ngo menanggung kerogien idi, janah kalak simemakan i oda pella gancihenna kerogien idi.

¹²Mula itangko dèba ngo pinakan idi, kennah simemakan idi ngo menggarar kerogien taba sidasa.

¹³Mula ijerngem binatang ngo pinakan idi, kennah ipacidah simemakan idi ngo iba-ibana mahan bukti taba sidasa; oda pella gararenna kerogien kerna pinakan idi.

¹⁴Mula lot sada kalak menginjam sada pinakan, nai ugahen barang matè mo pinakan idi, tupung oda i si sidasa pinakan i, kennah igarar simerinjam idi ngo gancih kerogien.

¹⁵Tapi mula masa i tupung i sidi sidasa, oda pella gararen simenginjam i gancih kerogien. Mula iongkos ngo pinakan idi, tupa ngo kerogien idi ibas ongkos pinakan idi nai.”

¹⁶“Barang ise kalak mengajar-ngajari sada kalak simerbaju siso lot dèng rantona asa rebbak meddem deketsa, kennah igarar ngo emmas mahan tokorna, janah mengkabinisa.

¹⁷Tapi mula oda iduè bapana daholi idi jejap dekket berruna idi, kennah ngo gararen daholi i taba bapa berru i kèpèng bagè buè tokor sada kalak simerbaju dèng.

¹⁸Gennep daberru simematohi ula-ula kennah bunuhen.

¹⁹Kalak simercampur dekket pinakan kennah bunuhen.

²⁰Barang isè memèlèken pèlèen bai dèbata sidèban laènken bangKu, JAHOWA, kennah ihukum matè.

²¹Ulang mo mendersa barang memakin siso hukum taba kalak pendampin, èngèt mo kènè pè arnia kalak pendampin ngo i tanoh Mesir.

²²Ulang mo lemmo-lemmo ndènè sambing bakin kènè taba daberru mbalu bak taba anak siso merbapa siso merinang.

²³Mula jahat ibakin kènè taba kalak i, Aku, JAHOWA ngo mendengkohken mula tenggo-tenggo kalak idi taba Aku mengido tolong.

²⁴Melaga mo Aku janah Kubunuh mo kènè tupung geraha, asa gabè mbalu sinibages ndènè, janah gabè melumang dukak-dukak ndènè.

²⁵Mula pejualken kèpèng kènè taba sada kalak sincor ibas bangsangku nai, ulang mo bakin kènè bagè pertunggu utang merbunga.

²⁶Mula ibuat kènè oles ndèba sikira gadè utangna kennah balikken kènè oles idi tikan madèng sundut mataniari,

²⁷kerna oles idi ngo kessa hartana mahan cabingna. Mula oda iulakken bana kadè nola mo pakkènna mahan cabingna meddem? Mula tenggo-tenggo ia mengido tolong bangKu, dengkohenKu ngo sorana kerna permasèh atè ngo Aku.

²⁸Ulang sumpahi Dèbata janah ulang sumbiahi penggemgemi bangsa ndènè.

²⁹Tupung ari sienggo itentuken kin, pèlèken mo bangKu dèba ibas hasil pagèmu nai, laè anggurmu dekket minak zaitunmu nai. Sohken mo baKu anak ndènè situaen,

³⁰bagi ma lembu dekket biri-biri tonggal siperlebbè tubuh. Belli mo pinakan i rebbak dekket inangna sidekkah pitu ari, nai ipè asa sohken taba Aku i ari peualuhken.

³¹BangsangKu ngo kènè, kumarna i mula lot pinakan barang kadè pè ijerngem binatang oda ndorok panganen ndènè jukutna, berrèken kènè mo i bai biang.”