Read Batak Dairi 2 Musa 24 Bible Online

2 Musa 24 - Batak Dairi bible

2 Musa 24

¹Nai idokken JAHOWA nola mo taba si Musa, “Menangkeng mo ko lako menghadep Aku, kono bak si Aron, si Nadap dekket si Abihu, dekket pitupuluh pengulu bangsa i janah sujud mo kènè menembah Aku i sindaoh nai.

²Pelin kono ngo kessa ndorok roh menjolmiti Aku. Sidèbankenna i oda ndorok roh njolmit-njolmit, janah jelma nterrem i tuana oda ndorok mengenangkengi delleng ènda.”

³Nai laus mo si Musa meningtingken taba bangsa i karina perèntah dekket hatoren JAHOWA. Nai karina mo kalak i rebbakken mengaloi, “Nggèut ngo kami mengulaken karina sinidokken JAHOWA.”

⁴Enggo kessa i isuratken si Musa mo karina perèntah JAHOWA. Sibarembenkenna siceggen, ipajek mo sada langgaten dekket sipuluh dua batu pernèngèten i pispis delleng i; gennep sada batu petandaken sada marga ibas marga Israel nai.

⁵Nai ipasulak si Musa mo barang piga-piga kalak anak perana, janah ipèlèken kalak i mo pèlèen situtungen bai JAHOWA ninganna menèat barang piga-piga lembu mahan pèlèen perdamèen.

⁶Dèba ibas daroh lembu idi nai ibuat si Musa, janah ibakin mi sambung-sambung. Dèba nai iorèken mo idi mi babo langgaten idi.

⁷Nai enggo kessa bagi ibuat mo bukku perpadanen sienggo mersurat pati-patiin JAHOWA, janah ijakaken mo nggang taba bangsa idi. Nina kalak i mo, “Nggèut ngo kami menguèi JAHOWA dekket mengulaken karina siniperèntahkenNa.”

⁸Nai ibuat si Musa mo daroh silot ibas sambung-sambung idi janah ipempis-pisken mo mi babo jelma nterrem. Nina mo, “Daroh èn mo petegguhken perpadanen sinirakut JAHOWA dekket kènè merkitèken pati-patiinNa.”

⁹Kessa i menangkeng mo si Musa, si Aron, si Nadab dekket si Abihu dekket sipitupuluh kalak pengulu mi delleng i,

¹⁰janah idah kalak i mo Dèbata Israel cènder i babo sada bekkas bagè sada hatap sinibahan ibas batu nilam nai, janah meratah bagè langit ncihur.

¹¹Idah pengulu Israel i ngo enggo Dèbata, tapi tukasi pè bagidi oda ngo iripasken kalak idi. Enggo kessa i mangan mènum mo kalak idi.

¹²Kessa i idokken JAHOWA mo taba si Musa, “Roh mo kono mendahi Aku mi babo ndelleng. I sidi mo Kuberrèken bamu dua batu sikusurat dekket karina pati-patinKu. Karina pati-patiin idi Kuberrèken mahan peddah bai bangsa i.”

¹³Nai kebbas mo si Musa dekket si Josua pengurupina idi, nai menangkeng mo si Musa mi delleng kebekkasen JAHOWA i.

¹⁴Enggo kin ngo mertenah si Musa taba pengulu-pengulu Israel, “Pèma kènè mo i perundung-undungen ènda mèma balik kami. Isèn ngo tading si Aron deket si Hur rebbak dekket kènè. Barang isè lot persoalenna, ndorok mo kènè menghadep taba kalak i asa ipeselloh.”

¹⁵Inangkengi si Musa mo delleng Sinai, nai mènter isangkemmi simpulguk hembun mo ia.

¹⁶Sampur mo cuhaya magahken enggo roh JAHOWA i babo delleng i, janah kalak Israel mengidah tosè bagè api lakat i babo delleng idi. Ennem ari dekkahna hembun idi dak tong menangkemmi delleng i, janah i ari pepituken, itenggoi JAHOWA mo si Musa ibas hembun idi nai.

¹⁸Nai inangkengi si Musa mo delleng i janah mbengket ia mi bagessen hembun idi. Empatpuluh ari empatpuluh berngin mo dekkahna si Musa merian i sidi.