Read Batak Dairi 2 Musa 25 Bible Online

2 Musa 25 - Batak Dairi bible

2 Musa 25

¹Idokken JAHOWA mo taba si Musa,

²“Dokken mo kalak Israel merembah pèlèen taba Aku. Barang isè lot tergerrek ibas ukurna, kennah iembah pèlèen

³merumang: emmas, pirak dekket suasah;

⁴kaèn linen halus, kaèn wol meratah, kelabu dekket mbara, kaèn ipas buk kambing nai,

⁵bebak biri-biri tonggal iubar mbara, bebak menipis, kayu sempènur,

⁶minak lampu, rempah-rempah mahan minak kerja dekket mahan dahupa baungkus,

⁷merbagè-bagè batu permata lako itiktikken mi efod deket mahan tutup tenten Imam Huntuen.

⁸Dokken mo bangsa i memahan sada undung-undung baKu, asa lot bekkasKu merian i tengah-tengah kalak i.

⁹Kennah bagè rencana sinaing Kubagahken bai ndènè ngo bahanen ndènè undung-undung bak haliuna.”

¹⁰“Bahan mo sada pèti ibas kayu sempènur nai geddangna 110 cm, bekkang dekket datesna pè ter 66 cm.

¹¹Lampisi mo ibages bak i darat nai dekket emmas tulèn janah baing mo bingkèna ipas emmas nai.

¹²Bekkas kayu osong-osongna, bahan mo empat gellang emmas janah kaitken mi nèhèna siempat idi, terdua gellang kacimbang lambung.

¹³Bahan ma mo osong-osongna ipas kayu sempènur nai janah lapisi ma dekket emmas,

¹⁴nai pemasuk mo kayu pengosong idi mi bagasen gellangna mi kacimbang lambung biding pèti i.

¹⁵Kennah dak tong ngo ibas gellang idi kayu osong-osong idi, janah oda ndorok iagoi.

¹⁶Nai bakin mo mi bagasen pèti idi batu pati-patiin si dua i sinaing berrènkenKu taba kènè.

¹⁷Bahan mo tutup pèti idi ipas emmas matah nai, geddangna 110 cm janah bekkangna 66 cm.

¹⁸Bahan mo dua Kerub ibas emmas sadduren nai,

¹⁹sada i gennep punca tutup pèti i. Kennah lekket ngo sidua kerub idi mi tutupna idi,

²⁰janah ibakin pehadep dekket kabengna ngkèrbang i babo pèti i.

²¹Bakin mo batu sidua i mi bagasen pèti i janah baing mo tutupna i babona.

²²I bekkas idi mo Aku pejumpa dekket kono, janah i babo tutupna i nai, i kellang-kellang kerub sidua i, Kuberrèken taba ko pati-patiinKu lako bai bangsa Israel.”

²³“Bahan mo sada mèja ipas kayu sempènur nai, 88 sèntimèter henjurna, 44 sènti mèter bekkangna dekket datesna 66 sènti mèter.

²⁴Lampis mo idi dekket emmas tulèn janah baing mo bingkèna emmas kuliling.

²⁵Bakin mo biding mèja i 7,5 sèntimèter bellangna, janah baing emmas kuliling bidingna i.

²⁶Bahan mo empat gellang ipas emmas nai, janah bakin mo idi mi siempat soki nènèh mèja i.

²⁷Gellang i mo lako penahan kayu pengosongna asa ndorok iosong mèja idi.

²⁸Kayu pengosong idi pè kennah ipas kayu sempènur nai ngo ibahan janah ilampis dekket emmas.

²⁹Bahan mo pinggan-pinggan, perènumen-perènumen, goci-goci dekket mangkuk-mangkuk mahan bekkas menembahken laè anggur. Karina perkekkas mèja idi kennah i emmas tulèn nai ngo ibakin.

³⁰Kennah mo ibakin mèja idi i lebbè Pèti Perpadanen idi, janah i babo mèja idi kennah ngo dak lot hantar roti.”

³¹“Bahan mo nèhè lampu ipas emmas tulèn nai. Alas dekket cèkèpenna kennah ibahan ipas emmas sadduren nai; bunga-bunga hiasenna, bagi motik dekket bulung bungana, kennah mersada dekket alas bak cèkèpenna i.

³²Ipas cèkèpenna i kennah ibakin ennem dangkahna, tellu dangkahna i kacimbang lambung.

³³I gennep dangkah kennah ibakin hiasen bagè rumang tellu bunga badem merdengan motik bak bulung bungana.

³⁴I gennep cèkèpenna kennah ibakin hiasen merumangken empat bunga badem merdengan motik bak bulung bungana.

³⁵I terruh gennep pasang dangkahna i kennah ibakin sada motik.

³⁶Karina lampu i dekket motik-motik bak dangkah-dangkahna kennah idakdak ipas sada emmas tulèn nai.

³⁷Bahan mo pitu pelita ipas nèhè lampu i, janah mendè mo bakin asa mi lebbè cangkan cuhayana.

³⁸Bahan mo perkekkas lako pebersihken cumbu lampu i janah talamna pè tong ma ipas emmas tulèn nai.

³⁹Pakè mo tellupuluh lima kilo emmas tulèn mahan nènèh lampu i dekket karina perlengkapenna.

⁴⁰Jaga mo asa nènèh lampu idi ibaing tosè bagè siKutuduhken bamu i babo delleng èn.”