Read Batak Dairi 2 Musa 26 Bible Online

2 Musa 26 - Batak Dairi bible

2 Musa 26

¹“Bahan mo undung-undung baKu ipas sipuluh rambar kaèn linen halus nai, itennun dekket wol meratah, kelabu dekket mbara. Sulam mo kaèn idi dekket gombaren Kerub.

²Gennep rambar kennah dos sibarenna, henjurna sipuluh dua mèter janah bekkangna dua mèter.

³Lima rambar kaèn idi kennah ipedemmu gabè sada layar, janah silima rambar nai pè bagi ma mo tong ibakin.

⁴Bahan mo sangketten ipas kaèn meratah nai i biding layar sidua i,

⁵terlimapuluh sangketten gennep kirè-kirè.

⁶Baing ma mo limapuluh kait emmas lako pedemuken sidua layar i asa ndorok ipersada.

⁷Mahan saong undung-undung idi bahan mo sipuluh sada rambar kaèn ipas buk kambing nai.

⁸Gennep rambar kennah dos sibarenna, gedangna sipuluh tellu mèter janah bekkangna dua mèter.

⁹Lima rambar kennah ipedemmu gabè sada layar, janah si ennem rambar nai pè bagi ma mo tong ibakin. Perdemuen si pe-ennemken kennah mo ilempit dua lako menutupi kettan lebbè Undung-undung i.

¹⁰Bakin mo limapuluh sangketten ipas biding layar siperlebbè janah limapuluh sangketten i layar peduaken.

¹¹Bahan mo limapuluh kait-kait ipas tembaga nai janah kaitken mi sangketten idi asa ndorok ipersada sidua kirè-kirè idi mahan saong Undung-undung i.

¹²Sitengah rambar kaèn silebbihna imo mahan tutup kettan podi Undung-undung i.

¹³Kaèn silebbihna limapuluh sèntimèter nai bellangna mengèkutken geddang Undung-undung i kennah i belli menutupi sisi Undung-undung i.

¹⁴Bahan mo dua penutup kettan ruar undung-undung i, sada ipas bebak biri-biri tonggal nai siniubar janah sada nai ipas bebak menipis nai.

¹⁵Bahan mo rangka-rangka undung- undung i pènter mi dates ipas kayu sempènur nai.

¹⁶Gennep rangka empat mèter datesna janah bekkangna 66 sèntimèter.

¹⁷I gennep rangka lot mo dua pasi si mpasang-simpasang, asa ndorok rangka-rangka idi ipedemmu dekket sidèbanna.

¹⁸Kettan selatan Undung-undung i, bahan mo duapuluh rangka,

¹⁹dekket empatpuluh alasna ipas pirak nai, dua i terruh gennep rangka mi sidua pasina.

²⁰Kettan utara Undung-undung i, bahan mo duapuluh rangka

²¹dekket empatpuluh alasna ipas pirak nai, dua i terruh gennep rangka.

²²I podi Undung-undung i kan kesunduten, bahan mo ennem rangka

²³janah dua rangka i gennep sokina.

²⁴Rangka-rangka soki i kennah ipedemmu kan pandakna nai soh mi dates. Rangka si dua sigabè sokina kenah bagi ngo ibakin carana.

²⁵Jadi lot mo ualuh rangka karina dekket sipuluh ennem alas pirak, kerna dua i terruh gennep rangka.

²⁶Bahan mo sipuluh lima sumban ipas kayu sempènur nai, lima i gennep rangka-rangka sada sisi Undung-undung

²⁷lima kan sisi sidèban, janah lima nai kan sisi Undung-undung kettan podi kan kesunduten.

²⁸Pengabin sinitengah Undung-undung i baing datesna sitengah rangka i biding nai mi biding Undung-undung i.

²⁹Rangka dekket sumban Undung-undung idi kennah ilampis dekket emmas. Gellang-gellang lako mengerakut kayu idi pè kennah ipas emmas nai ngo ibakin.

³⁰Pajek mo Undung-undung idi tosè bagè rencana siKupacidah bamu i babo delleng ènda.

³¹Bahan mo sada kaèn pèntu ipas linen halus nai sinitennun ipas wol meratah, kelabu dekket mbara nai. Okir mo kaèn idi dekket gombaren Kerub.

³²Gantung mo kaèn pèntu i mi siempat tihang kayu sempènur si merlampis emmas dekket kait-kait emmas janah ibakin i babo empat alas pirak.

³³Sangketken mo kaèn idi mi barisen kait-kait silot i saong Undung-undung idi. I podi kaèn idi mo igamparken Pèti Perpadanen sin batu sidua i. Kaèn idi mo gabè kellang-kellang Bilik Simbadia bak Bilik Simbadia kalohon.

³⁴Gamparken mo tutup Pèti Perpadanen i babo pèti i.

³⁵Mèja pemèlèen kennah ibakin i ruar Bilik Simbadia kalohon kan utara, janah nènèh lampu kettan selatan i bagessen Undung-undung idi.

³⁶Bahan mo kirè-kirè mahan pèntu Undung-undung i ipas kaèn linen halus nai sinitennun ipas wol meratah, merham dekket mbara, iokir dekket sulamen.

³⁷Bekkas kirè-kirè idi kennah ibahan mo lima tihang ipas kayu sempènur nai sinilampis dekket emmas, janah ipedemmu dekket silima kait-kait emmas i. Bahan mo lima ngkabuah henjellen ibas tembaga nai bekkas tihang-tihang idi.”