Read Batak Dairi 2 Musa 27 Bible Online

2 Musa 27 - Batak Dairi bible

2 Musa 27

¹“Bahan mo sada langgaten ipas kayu akasia nai, empat soki, geddang dekket bekkangna ter 2,2 mèter janah datesna 1,3 mèter.

²I gennep soki kettan dates kennah ibaing mertanduk-tanduk janah mersada mi langgaten i. Karina kennah ilampis dekket tembaga.

³Bahan mo saruam-saruam, senduk, mangkuk-mangkuk, garpu-garpu dekket bekkas api. Karina haliu idi kennah ibahan ipas tembaga nai.

⁴Bayu mo kawat ipas tembaga nai, janah lekketken mo empat gellang bekkas kayu osong-osong ipas siempat soki kettan terruh.

⁵Dates kawat sinibayu i kennah sitengah dates langgaten i ngo. Kennah ililitken mo kawat sinibayu idi mi langgaten i kettan terruh.

⁶Bahan mo dua kayu osong-osong ipas kayu sempènur nai merlampis tembaga,

⁷janah surukken mi bagasen gellang-gellang i kacimbang lambung langgaten idi tikan mengosong langaten i.

⁸Bahan mo langgaten i ipas papan nai janah merlubang i bagessen, mengèkutken rencana siKupacidah bamu i babo delleng èn.”

⁹“Baing mo kasèan kuliling Undung-undungKu ikirèi dekket kaèn linen halus nai. Kettan selatan, geddang kirè-kirè i 44 mèter,

¹⁰itongkel duapuluh tihang tembaga, karina i merhenjelen tembaga, janah kait-kait bak sangkettenna ipas pirak nai.

¹¹Bakin mo bagi ma kettan utara.

¹²Kettan kesunduten, geddang kirè-kirè i 22 mèter, sipuluh tihang bak henjellenna.

¹³Kettan kebincaren, simerpèntu i, geddang kirè-kirè i tong ma 22 mèter.

¹⁴I kacimbang lambung pèntu i, kennah ibakin ngo kirè-kirè, ter 6,6 mèter geddangna janah tellu tihangna ipas tellu henjellen.

¹⁶Mahan pèntuna kennah ibaing kirè-kirè geddangna 9 mèter ipas linen halus nai sinitennun dekket wol meratah, kelabu dekket mbara, janah ihias dekket sulamen. Mahan sangketten kaèn pèntu i kennah ibahan empat tihang dekket empat henjellen.

¹⁷Karina tihang i kuliling kasèan idi kennah ipedemmu dekket sangketten pirak idi; kait-kaitna kennah ipas pirak nai janah henjellenna ipas tembaga nai.

¹⁸Kirè-kirè i kuliling kasèan idi geddangna 44 mèter, bekkangna 22 mèter janah datesna 2,2 mèter. Kirè-kirè i kennah ibahan ipas kaèn linen halus nai janah henjellenna ipas tembaga nai.

¹⁹Karina haliu sinipakè ibas Undung-undung idi, karina patok mahan Undung-undung dekket kirè-kirèna kennah ibakin ipas tembaga nai.”

²⁰“Suruh mo kalak Israel merembah minak zaitun tulèn janah simendèna kalohon mahan lampu i bagasen Undung-undungKu asa ndorok ilakati janah lakat terrus.

²¹Kennah si Aron dekket dukak-dukakna ngo menjamotken lampu idi ciboen nai soh mi siceggen i bekkasKu, i ruar kaèn sikirè i lebbè Pèti Perpadanen. Kennah iulaken kalak Israel dekket pinemparna ngo perèntah idi soh sidekkah-dekkahna.”