Read Batak Dairi 2 Musa 28 Bible Online

2 Musa 28 - Batak Dairi bible

2 Musa 28

¹“Diloi mo si Aron kakamu i rasken dekket dukak-dukakna, si Nadab; si Abihu, si Eleazar dekket si Itamar, janah pejaè mo kalak i asa ndorok mengkebasi Aku gabè imam.

²Bahan mo pakkèen imam bai si Aron, asa mersangap ia tengenen.

³Tenggoi mo karina tukkang jait sienggo Kuberrèken kepandèen. Dokken mo kalak i memahan pakkèen si Aron, asa ndorok ia lako mengkebasi Aku gabè imam.

⁴Suruh ma mo kalak i memahan tutup tenten, efod, jubah, kemèja mersulam, sorban dekket tali abak. Pakkèen imam idi kennah ibahan kalak idi bai si Aron kakami dekket dukak-dukakna asa ndorok gabè imam kalak i mengkebasi Aku.

⁵Kennah ipas wol meratah nai ngo ibahan kalak i pakkèen i, bak kelabu dekket mbara, bennang emmas dekket linen halus nai. Laènkenna i, efod kennah itiktik deket sulamen.

⁷Dua tinali bara pengèkèt efod kennah ijaitken i sisina.

⁸Sada tali abak tennunen halus ipas bennang emmas dekket linen halus nai ijaitken ipas efod i asa gabè mersada.

⁹Buat mo dua batu intan. Tulusi mo sada kalak tukkang emmas sipandè lako mengokir i batu intan i gerar-gerar dukak si Jakob si sipuluh dua i situaen nai soh mi sikèdèken, ennem gerar mo ibas gennep batu intan i. Nai duana batu intan i kennah ibakin ibas bingkè emmas janah ibakin mi tali bara efod sikira tanda pernèngèten taba sisipuluh dua marga Israel. Merkitè bagi mo si Aron merembah gerar kalak i i barana, asa Aku, JAHOWA, dak tong mernèngèt kalak i.

¹³Laènken sidua bingkè emmas i, kennah ibahan ma mo dua rantè emmas tulèn, itali bagè tinali, lako ileketken mi bingkè emmas idi.”

¹⁵“Bahan mo bai Imam Huntuen sada tutup tenten mahan pakkèenna tikan naing ikuso hendak Dèbata. Sibakinen dekket sisulamen mahan tutup tenten idi kennah dos deket sibakinen dekket sisulamen mahan efod.

¹⁶Bentukna empat soki janah lempit dua, geddang dekket bekkangna ter 22 sèntimèter.

¹⁷Leketken mo empat mbaris batu intan ipas tutup tenten idi. I baris perlebbè batu delima, topas dekket permata.

¹⁸I baris peduaken batu jamrud, permata nilam dekket intan.

¹⁹I baris petelluken permata meratah, batu akik dekket batu kecubung.

²⁰I baris pe-empatken batu pirus, yakut dekket ratna cempaka. Itustusi mo sisipuluh dua permata idi dekket emmas.

²¹Ipas gennep mata intan i kennah iokir ngo sada gerar ibas sisipuluh dua anak si Jakob sikira tanda pernèngèten bai marga-marga Israel.

²²Bahan mo mi tutup tenten idi dua rantè emmas tulèn sinitali bagè tinali.

²³Bahan ma mo dua gellang emmas janah lekketken mo mi sidua punca kan dates tutup tenten idi

²⁴nai pemasuk mo sidua rantè emmas idi mi bagessen gellang-gellang ndai.

²⁵Punca rantè sidua nai idi kennah i èkètken mi sidua bingkè, asa ndorok ipedemmu tutup tenten idi dekket tinali bara efod si kettan lebbè.

²⁶Bahan mo dua nai gellang emmas ninganna lekketken ipas tutup tenten i ipunca kan terruh kettan bagessen si kenna efod.

²⁷Enggo kessa bagi, bakin mo dua nai gellang emmas janah lekketken mo kettan jolo ipas sidua èkèt bara efod i gembar perdemuen penjarumenna narih mi terruh, kettan babo tali abak ipas tennunen halus i nai.

²⁸Gellang tutup tenten kennah ipedemmu deket tinali meratah sinigellang efod i asa dak tong i babo tali abak i tutup tenten i janah oda nggèut ntalkas.

²⁹Sinderrang masuk si Aron mi bekkas simbadia, kennah iembah ngo gerar-gerar marga Israel siterokir ipas tutup tentenna, asa Aku, JAHOWA, dak tong terèngèt taba bangsangKu.

³⁰Baing mo Urim dekket Tumim ipas tutup tenten i lako pakkèen si Aron mula roh ia menghadep Aku. Tupung sinderrang bagidi kennah tong ngo ia memakè tutup tenten, asa ndorok ibettoh gerrek atèngKu taba bangsa Israel.”

³¹“Jubah sinipakkè i babo efod i kennah karina ibahan ipas wol meratah nai.

³²Lubang kerahongna ikilim dekket pita sinitennun nai asa ulang murah meribak.

³³Kuliling biding tan terruh kennah ibakin hiasen buah ndalima ipas wol meratah nai, kelabu dekket mbara, i kellang-kellangi dekket giring-giring emmas.

³⁵Kennah ipakkè si Aron ngo jubah i mula merkebbas ia bagè Imam. Tikan roh ia mi hadeppenKu i bilik simbadia barang tikan menadingken bekkas i, terdengkoh mo sora giring-giring i asa ulang matè ia.

³⁶Bahan mo sada hiasen ipas emas tulèn nai janah okir mo dekket kata ‘Pellin bai JAHOWA.’

³⁷Tapelken mo idi mi sorban dekket tinali meratah.

³⁸Kennah ibakin si Aron ngo hiasen emmas idi ipas perdempakenna asa uè Aku, JAHOWA, menjalo karina pèlèen siniembah kalak Israel taba Aku, tukasi pè tikan merembah pèlèen i enggo mengulaken kesalahen kalak i.

³⁹Kamèja si Aron kennah itennun ipas linen halus nai. Bahan ma mo sada sorban ipas linen halus nai dekket tali abak sinisulam.

⁴⁰Bahan mo kamèja, tali abak, dekket sorban bai dukak-dukak si Aron asa metunggung kalak i idahen.

⁴¹Pakkèken mo pakkèen idi bai si Aron kakamu i dekket bai dukak-dukakna. Minaki mo kalak i dekket minak zaitun; merkitè bagidi mo kalak i ipebangkit janah ipepellin mengkebasi Aku gabè imam.

⁴²Nai bahan mo bai kalak i sulabal joppok ipas kaèn linen nai, geddangna i abak nai soh mi paha lako menutupi daging siso patut teridah.

⁴³Kennah dak ipakkè kalak i ngo sulabal idi tikan mbengket mi bagessen Undung-undungKu barang tikan menjolmiti langgaten lako menguluken ulaen imam i Bilik Simbadia, asa ulang matè kalak i, kerna teridah badan kalak idi siso patut teridah. Hot ngo hatoren idi merdalan bai si Aron dekket pinemparna.”