Read Batak Dairi 2 Musa 29 Bible Online

2 Musa 29 - Batak Dairi bible

2 Musa 29

¹“Bagèen mo carana pebangkitken si Aron dekket dukak-dukakna asa ndorok kalak i gabè imam mengkebasi Aku. Buat mo sada lembu bajar tonggal dekket dua biri-biri tonggal siso mertikas.

²Bahan mo nditak siso meragi ipas topong roti simendèna kalohon nai. Ibakin mo dèba ibas nditak idi nai mahan roti merdengngan minak zaitun, dèba nai oda pella merminak, janah sitadingna i ibahan mo kuè idalisi dekket minak.

³Baing mo idi ibagessen baka janah pèlèken mo baKu rebbak dekket pèlèen lembu tonggal dekket biri-biri tonggal sidua i.

⁴Dokken mo si Aron dekket dukak-dukakna roh mi pèntu Undung-undungKu janah menguras.

⁵Pakkèken mo pakkèen imam bai si Aron: Kamèja, efod, jubah menutupi efod, tutup tenten dekket tali abak.

⁶Bakin mo sorban i babontakalna janah selletken mo ipas sorban idi hiasen emmas simerokirken ‘Pellin bai JAHOWA.’

⁷Nai buat mo minak kerja, arirken mi babontakalna janah minaki mo ia.

⁸Enggo kessa bagi, dokken mo dukak-dukakna roh janah pakkèken mo kamèja,

⁹dekket tali abak bai kalak i, nai baing mo sorban i takal kalak i. Bagi mo carana lako pebangkitken si Aron dekket dukak-dukakna. Kalak i dekket pinemparna mo mengkebasi Aku gabè imam soh mi amman sumendah.

¹⁰Nai nola ma kennah embahenmu ngo lembu tonggal idi mi lebbè Undung-undungKu. Kennah mo iampèken si Aron dekket dukak-dukakna tanganna mi babontakal pinakan idi.

¹¹Sèat mo lembu tonggal idi i lebbèngKu, i pèntu Undung-undung i.

¹²Buat mo dèba daroh lembu idi janah dalisken dekket jari-jarimu mi tanduk-tanduk langgaten idi.

¹³Enggo kessa bagi, buat mo karina pessoh-pessoh simemaluti bitukana, atèna simendèna kalohon dekket piahnaduana bak pessohna janah baing mo i karina mi babo langgaten janah tutung mo mahan pèlèen baKu.

¹⁴Suka, koling dekket bituka raja lembu tonggal idi kennah itutung i ruar perundung-undungen. Idi mo pèlèen mahan kesesaen dosa imam.

¹⁵Kessa bagi buat mo sada ibas biri-biri tonggal idi nai. Kennah iampèken si Aron dekket dukak-dukakna mo tanganna mi babo takal pinakan i.

¹⁶Nai sèat mo pinakan i, buat mo darohna janah pispisken mi empatna soki langgaten idi.

¹⁷Kennah itektek ngo biri-biri tonggal i. Bitukana dekket pahana kennah iborih janah ibakin i babo takalna bak ibabo tektek sidèbanna i.

¹⁸Pèlèken mo karina biri-biri tonggal i i babo langgaten mahan pèlèen situtungen. Pesennangken atèngKu ngo bau pèlèen idi.

¹⁹Buat mo biri-biri tonggal si sada nai, imo biri-biri tonggal keperluen ulaen pemasu-masuen imam. Dokken mo si Aron dekket dukak-dukakna mengampèken tangan kalak i mi babo takal pinakan i.

²⁰Nai sèat mo biri-biri tonggal i, buat mo situk darohna, janah dalisken mi coping kamuhun si Aron dekket dukak-dukakna, mi kekambal tangan kamuhun dekket mi kekambal nèhè kamuhun kalak i. Daroh sitadingna dèng kennah pispisken mi empatna soki langgaten i.

²¹Buat mo cituk daroh si lot i babo langgaten i dekket situk minak kerja, nai pispisi mo si Aron dekket dukak-dukakna bagi dekket pakkèen kalak i. Merkitè bagidi enggo mo ikellini si Aron dekket dukak-dukakna bak pakkènna lako bangKu.

²²Buat mo pessoh biri-biri tonggal i, uitna simerpessoh, pessoh bitukana, atèna simendèna kalohon, piahna duana dekket pessohna dekket paha kamuhunna.

²³Ibas kirang roti sienggo ipèlèken baKu nai, buat mo sada roti ipas gennep matcamna nai; sada sinibahan merdengngan minak zaitun, sada siso pella merminak dekket sada kuè.

²⁴Ampèken mo karina pangaen idi ibas tangan si Aron dekket dukak-dukakna janah dokken mo kalak i memèlèken baKu sikira pèlèen hujuen.

²⁵Nai buat mo roti i bai kalak i nai janah tutung mo i babo langgaten, i babo pèlèen situtungen i. Bau pèlèen i mo pesennangken atèngKu.

²⁶Buat mo dada biri-biri tonggal i janah pèlèken mo mahan pèlèen simerkedekoen baKu. Janah imo sulangmu.

²⁷Ibas ulaen pemasu-masuen imam, dada dekket paha biri-biri tonggal sinipakè i kerja i kennah ipèlèken sikira pèlèen simerkedekoen baKu janah ipejaè bai imam.

²⁸En mo keputusenKu siso ndorok obahen. Sinderrang roh bangsangKu memèlèken pèlèen per- damèen, dada dekket paha pinakan idi mo sulang imam. Imo pèlèen bangsangKu bangKu.

²⁹Pakkèen si Aron merkebbas kennah iberrèken taba dukak-dukakna asa ndorok ipakkè kalak i sinderrang pemasu-masuen petettahken.

³⁰Anak si Aron sigabè imam menggancihi bapana dekket memengketti Undung-undungKu lako merkebbas i bilik simbadia, kennah ipakkè ngo pakkèen idi pitu ari dekkahna.

³¹Buat mo jukut biri-biri tonggal sinipakè ibas kerja pamasu-masuen petettahken si Aron dekket dukak-dukakna i gabè imam janah masak mo jukut i ibas sada bekkas mpanting.

³²Kennah ngo ipangan kalak i jukut idi i pèntu Undung-undungKu dekket iba roti silot i kembal idi.

³³Kennah ipangan kalak i ngo pangaen sinipèlèken tupung kerja pengampunen dosa tikan i pemasu-masuen petettahken imam. Pellin imam ngo kessa ndorok kipangan pangaen sienggo ihujuken bangKu i.

³⁴Mula lot deng gulè dekket roti i iba mi sibarembenkenna, kennah itutung ngo sitadingna i kerri, janah oda ndorok ipangan, kerna enggo merkedekoen idi.

³⁵Kerja pemasu-masuen petettahken si Aron dekket dukak-dukakna gabè imam kennah ibaing pitu ari dekkahna, bagè sienggo Kuperèntahken bamu.

³⁶Gennep ari kennah ipèlèken sada lembu tonggal mahan pengampunen dosa. Merkitè pèlèen i mo langgaten i ipepanting dekket minak zaitun. Nai kennah minaki mo langgaten i dekket minak zaitun asa merkedekoen i baKu.

³⁷Bakin mo bagidi gennep ari sidekkah pitu ari. Nai mbadia mo suberri langgaten i, barang kadè sambing dais mi langgaten idi kennah isohken taba JAHOWA, janah barang isè sambing mendeggessa, kennah cilaka kumerna kegegohen kebadiaenna.”

³⁸“Soh mi amman sumendah gennep ari kennah ipèlèken ngo i babo langgaten idi dua biri-biri merumur sada tahun.

³⁹Sada mo i mahan pèlènken siceggen, janah sidèbanna i mahan pèlèn ciboen.

⁴⁰Dengngan anak biri-biri sipèlènken siceggen idi, kennah ipèlèken sada kilo nditak simerandalna kalohon, icampur dekket sada sellup minak zaitun tulèn. Laènkenna i ma sada litèr laè anggur.

⁴¹Anak biri-biri sipèlènken ciboen, kennah tosè ngo bagidi ma pemèlèken, merdengan nditak, minak zaitun dekket laè anggur. Bau pèlèen situtungen i ngo pesennangken ukurKu.

⁴²Nai terrus ngo bagi i karina tikki kennah ipèlèken ngo pèlèen i ihadeppenKu i pèntu Undung-undungKu. I sidi mo Aku pejumpa dekket bangsangKu janah mengerana taba kono.

⁴³I si mo Aku pejumpa dekket bangsa Israel, janah cuhaya pekirohKu memaingken mbadia bekkas i.

⁴⁴Aku ngo memaing Undung-undung deket langgaten idi mbadia. Kupepulik mo si Aron dekket dukak-dukakna bai sidèbankenna i nai asa kalak i gabè imam mengkebasi Aku.

⁴⁵Merian mo Aku i tengah-tengah bangsa Israel, janah Aku gabè Dèbatana.

⁴⁶Gabè ibettoh kalak i mo Aku ngo JAHOWA Dèbata kalak i simengarak kalak i mbungkas i Mesir nai, asa ndorok Aku merian i tengah-tengah kalak i, Aku ngo JAHOWA Dèbatana.”