Read Batak Dairi 2 Musa 30 Bible Online

2 Musa 30 - Batak Dairi bible

2 Musa 30

¹Nai idokken JAHOWA nola mo taba si Musa, “Bahan mo i kayu sempènur nai sada langgaten perdahupaen.

²Empat soki mo bakin langgaten i, henjur dekket bekkangna ter 45 sèntimèter, janah datesna 90 sèntimèter. Ipas sokina siempat idi bakin mo mertanduk, mersada dekket langgaten idi.

³Kettan babona, imo siempat sisi dekket tanduk-tandukna idi kennah ilampisi dekket emmas tulèn janah ibakin merbingkè emmas i bidingna i kuliling.

⁴Baing mo dua gellang i terruh bingkè ipas bidingna sidua i lako menongkel kayu osong-osong langgaten i.

⁵Osong-osongna i kennah ibahan ipas kayu sempènur nai janah ilampisi dekket emmas.

⁶Gamparken mo langgaten idi kettan ruar kaèn si lot i lebbè Pèti Perpadanen i, i bekkas Aku naing pejumpa dekket ko.

⁷Gennep ceggen tikan roh si Aron lako pekadèken lampu, kennah itutung ngo dahupa sibaungkus i babo langaten idi.

⁸Kennah bagidi ma ngo tong ibaing tikanna ilakati lampu i cibonna. Pèlèen dahupa idi kennah ibaing ngo terrus soh seggen.

⁹Ulang ipèlèken i babo langgaten idi dahupa sinigerra, pèlèen pinakan barang pèlèen hantaren; janah ulang ma mengorèken laè anggur i babona.

¹⁰Sikali sitahun kennah bakinen si Aron ngo kerja menguras langgaten merkitè memispis tanduk siempat i dekket daroh pinakan sinipèlèken mahan pengampunen dosa. Kennah ibaing ngo bagidi gennep tahun soh seggen. Kennah mpanting ngo langgaten idi karina janah merkedekoen bangKu ngo i.”

¹¹Idokken JAHOWA mo taba si Musa,

¹²“Tikan ibakin pemilangen bai bangsa Israel karina anak laki kennah menggarar baKu kèpèng penebbus dirina asa ulang kenna cilaka ia tikan ibakin pemilangen idi.

¹³Karina jelma si dekket ikèrah ibas pemilangen idi kennah menggarar kèpèng nasa buè sinitentuken mengèkutken harga simerlakku i Undung-undungKu sikira pemerèken merkedekoen.

¹⁴Karina kalak sinikèrah tikan pemilangen idi, imo karina anak laki sienggo merumur duapuluh tahun barang lebbih, kennah iberrèken ngo pemerèken sibagidi.

¹⁵Kalak sibèak pè oda kennah lebbih i garar, janah kalak sincor oda ndorok moru penggararna tikan igarar kalak i kèpèng penebbus dirina.

¹⁶Pepulung mo kèpèng idi bai bangsa Israel nai, janah pergunaken mo idi mahan haliu pemojien i Undung-undungKu. Karinana ngo idi mahan kèpèng penebbus mi diri kalak i, janah dak tong mo Kuèngèt lako menjamoti kalak i.”

¹⁷Idokken JAHOWA mo taba si Musa,

¹⁸“Bahan mo sada kancah ipas tembaga nai janah alasna pè ipas tembaga nai ma. Bakin mo kancah i i kellang-kellang Undung-undung dekket langgaten, nai sini mo dekket laè.

¹⁹Laè idi mahan keperluen si Aron deket dukak-dukakna asa ndorok kalak i memorih tangan dekket nènèh

²⁰sinderrang madèng ibengketti kalak i Undung-undung barang menjolmiti langgaten lako merembah pèlèen situtungen. Kennah bakinen kalak i ngo bagi asa ulang ibunuh. Kennah iuèi kalak idi ngo hatoren i deket pinempar kalak i soh sidekkah-dekkahna.”

²²Idokken JAHOWA mo taba si Musa,

²³“Buat mo rempah-rempah simerandalna kalohon, ennem kilo mur ncaèr, tellu kilo kulit manis, tellu kilo ketcèur dekket ennem kilo kayu baja.

²⁴Karina itimbang mengèkutken timbangen simerlakku i Undung-undungku. Tambahken mo empat sellup minak zaitun,

²⁵janah pepada mo minak keperluen kerja pemasu-masuen pebangkitken imam, icampur gabè minak baungkus.

²⁶Pakè mo sinimasak i lako meminaki Undung-undungKu, Pèti Perpadanen,

²⁷mèja dekket karina haliuna, nèhè lampu dekket perlengkapenna, langgaten perdahupaen,

²⁸langgaten pemèlèen situtungen dekket karina perlengkapenna, dekket kancah bekkas laè deket danganna.

²⁹Merkitè bagi mo kennah pejaènmu karina perkekkas idi baKu, asa mpanting karina. Barang kadè sambing dais mi langgaten idi kennah ipesakat bai JAHOWA, janah barang isè sambing mendegges kennah cilaka kumerna kegegohen kebadiaenna.

³⁰Minaki ma mo si Aron dekket dukak-dukakna asa ipebangkit kalak i gabè imam lako mengkebasi Aku.

³¹Dokken mo taba bangsa Israel, soh mi sidekkah-dekkahna ngo minak keperluen kerja pemasumasuen pebangkitken imam idi manihan lako baKu.

³²Oda ndorok iarirken minak i taba jelma nterem. Ulang bahan minak sibagidi merkitè memakè campuren bagidi ma. Mbadia ngo minak i, janah kennah iètong bagè barang simbadia.

³³Kalak simemahan minak sibagidi, barang simemakkèsa taba kalak siso imam, oda nè ètongen ia bangsangKu.”

³⁴Nai idokken JAHOWA mo taba si Musa, “Buat mo barang piga-piga bagè rempah-rempah dos-dos buèna, imo duruh damar, koling lokan, duruh mèang deket dahupa tulèn.

³⁵Pakè mo karina idi memahan dahupa masaken baungkus. Bakin mo sira asa tong tulèn dahupa idi janah ndorok ipakkè lako baKu.

³⁶Dèba ipas dahupa idi nai kennah itutu melèmet. Embah mo idi mi Undung-undungKu janah hamburken mo idi i lebbè Pèti Perpadanen i. Kennah kira ugasen mbadia ngo etongen dahupa idi simerkedekoen baKu. Ulang bahan dahupa merkitè masaken sibagidi, lako bai ndènè sendiri.

³⁸Barang isè memahan sibaungkus bagidi oda nè ètongen bangsangKu.”