Read Batak Dairi 2 Musa 31 Bible Online

2 Musa 31 - Batak Dairi bible

2 Musa 31

¹Idokken JAHOWA mo taba si Musa,

²“Enggo Kupilih si Bezaleel anak si Uri, kempu si Hur i marga Juda nai,

³janah Kupasu-pasu ia merkitè kuasangKu. Kuberrèken ngo bana pengarusien, kepandèen dekket perbinettohen bak karina matcam bagè kepandèen:

⁴lako mahan rancangen simemerluken kepandèn bak memahanken ipas emmas, pirak dekket tembaga nai;

⁵lako memelas batu intan sinaing itiktikken lako mengokir kayu dekket lako mahan karina matcam bagè ketukkangen sidèbanna i.

⁶Si Oholiab, dukak si Ahisamakh i marga Dan nai, enggo Kupilih ma lako mengurupisa. Kuberrèken ma ngo kepandèn mahantu kalohon taba tukkang-tukkang sipandè, asa ndorok terbahan kalak i barang kadè sambing siKudokken:

⁷Undung-undungKu; Pèti Perpadanen dekket tutupna, karina haliu Undung-undung,

⁸imo mèja dekket perlengkapenna, nèhè lampu ipas emmas tulèn nai dekket perlengkapenna, langgaten bekkas menutung dahupa,

⁹langgaten bekkas pèlèen situtungen dekket karina perlengkapenna, kancah bekkas laè dekket henjellenna,

¹⁰pakkèen merkebbas bai si Aron dekket dukak-dukakna, si kennah i pakkè tikan merkebbas kalak i gabè imam,

¹¹minak keperluen kerja pemasu-masuen imam, dekket dahupa sibaungkus mi Bilik Simbadia. Karinana idi kennah ibahan kalak i tosè bagè codien sienggo Kubagahken bamu.”

¹²Nai iperèntahken JAHOWA mo taba si Musa lako meningtingken taba bangsa Israel, “Pèstaken mo ari Sabat ari sienggo Kutetapken gabè ari pentadien. Soh mi sidekkah-dekkahna mo ari idi mahan pernèngèten bai ndènè dekket Aku, asa ibettoh kènè Aku ngo JAHOWA, janah enggo Kubakin kènè gabè bangsangKu sendiri.

¹⁴Kennah pesangapen ndènè ngo ari pentadien idi gabè ari simbadia. Kuberrèken mo bai ndènè ennem ari lako mahan bahaen, tapi ari pepituken idi imo ari mbellen simerhuntuen baKu. Barang isè oda pesangapken ari i, tapi mahan bahaen nola tupung ari i, kennah ihukum matè.

¹⁶Kenah irayaken bangsa Israel ngo ari i turun tumurun mahan tanda perpadanen.

¹⁷Sada ari pernèngèten tettap mo ari idi bai bangsa Israel dekket Aku, kumerna Aku, JAHOWA enggo menempa langit dekket tanoh ibagessen ennem ari, janah i ari pepituken i oda ngo Aku mahan bahaen janah mentadi.”

¹⁸Enggo kessa dung mengerana dekket si Musa i babo delleng Sinai, iberrèken Dèbata mo tabasa dua batu sienggo isurati Dèbata dekket pati-patiinNa.