Read Batak Dairi 2 Musa 35 Bible Online

2 Musa 35 - Batak Dairi bible

2 Musa 35

¹Ipepulung si Musa mo karina bangsa Israel, nai idokken mo taba kalak i, “Bagèen ngo perèntah JAHOWA bai ndènè:

²Lot ngo ennem ari lako mahan bahaen, tapi ukum ari pepituken, imo ari pentadien, ari raya simerkedekoen bai JAHOWA. Barang isè mengula tikan ari Sabat kennah ihukum matè.

³Tupung ari i, oda ndorok kènè mengelakati api i bages ndènè.”

⁴Mengerana mo si Musa taba karina bangsa Israel, “Bagèn ngo pendokken JAHOWA:

⁵Embah mo pèlèen bai JAHOWA. Barang isè lot tergerrek ukurna, kennah memèlèken emmas, pirak, deket tembaga.

⁶Kaèn linen halus, kaèn wol meratah, kelabu dekket mbara; kaèn ipas buk kambing nai;

⁷bebak biri-biri tonggal iubar mbara rupana, bebak menipis, kayu sempènur,

⁸minak lampu, rempah-rempah mahan minak merkerja dekket mahan dahupa si baungkus;

⁹intan delima dekket intan sidèban lako itiktikken ipas baju efod dekket tutup tenten Imam Huntuen.”

¹⁰“Karina tukkang sipandè bai ndènè nai kennah roh lako memahan karina sienggo idokken JAHOWA, imo:

¹¹Undung-undung, saong dekket tutupna, kait dekket rangkana, kayu perhabang, tihang pèntu dekket henjellenna;

¹²Pèti perpadanen dekket osong-osongna, uluna dekket kaèn sangkemna

¹³mèja dekket kayu osong-osongna, karina haliu dekket roti hantarenken;

¹⁴nèhè lampu maing asa nterrang dekket haliuna, lampu dekket minakna.

¹⁵langgaten bekkas menutung dahupa dekket kayu osong-osongna, minak merkerja, dahupa baungkus; kirè-kirè mahan pèntu Undung-undung,

¹⁶langgaten bekkas pèlèen situtungen dekket kandang-kandang tembaga, kayu osong-osong dekket karina haliuna, kancah bekkas memorih dekket henjellenna,

¹⁷kaèn bellat-bellat mi kasèana, pandak-pandak dekket henjellenna, kirè-kirè pèntu pengkeruhen kasèan,

¹⁸patok-patok dekket rakut-rakut Undung-undung, bagi dekket kasèana,

¹⁹pakkèen imam tikan mengula kalak i Bilik Simbadia dekket pakèen merkedekoen bai Imam Aron, dekket dukak-dukakna.”

²⁰Nai merlausen mo karina kalak Israel simerpulung i,

²¹janah barang isè tergerrek ibas ukurna, merembah pèlèen bai JAHOWA lako mencukupi Undung-undung JAHOWA. Iembah kalak i ma ngo karina siniperluken tupung pemojien bai JAHOWA dekket keperluen mi pakèen imam.

²²Barang isè sambing uè, daholi barang daberru, roh merembah kancing emmas, sobeng, cincin, bura dekket nasa matcam bagè pakèen emmas mahan pèlènken bai JAHOWA.

²³Gennep kalak simerkaèn linen halus, kaèn wol meratah, meharbu barang mbara, kaèn ipas buk kambing nai, bebak biri-biri tonggal sienggo iubar mbara, barang bebak menipis, memèlèken barangna idi.

²⁴Gennep jelma sindorok memerèken pirak barang tembaga, iembah mo bai JAHOWA. Bagi ma ngo ibakin kalak si lot kayu sempènurna mi bahaen idi.

²⁵Daberru-daberru sipandè menali bennang merembah bennang linen halus dekket bennang wol meratah, meharbu dekket mbara sienggo ibahan kalak i.

²⁶Itali kalak i ma ngo bennang ipas buk kambing nai.

²⁷Pengulu-pengulu merembah intan delima dekket intan-intan sidèban lako itiktikken mi efod dekket tutup tenten.

²⁸Iembah kalak i ma ngo rempah-rempah dekket minak lampu, minak merkerja dekket dahupa sibaungkus.

²⁹Karina kalak Israel merkitè gerrek ukurna sendiri merembah pèlèen kalak i bai JAHOWA mi bahaen siniperèntahken JAHOWA merkitè si Musa.

³⁰Enggo kessa i, idokken si Musa mo taba kalak Israel, “Enggo ipilih JAHOWA si Bezaleel anak si Uri, kempu si Hur, i marga Juda nai

³¹janah memasu-masusa merkitè kuasaNa. Iberrèken JAHOWA ngo bana pengantusien, kepantasen dekket kepandèen ibas matcam bagè ketukkangen,

³²lako memahan gambaren simemerluken kepandèen, bagi dekket menukkangisa ibas emmas, pirak deket suasah nai,

³³lako meningtingi batu intan sinaing itiktik lako mengokir kayu dekket mahan karina matcam bagè ketukkangen.

³⁴Bai si Bezaleel dekket si Aholiab, anak si Ahisamakh i marga Dan nai, iberrèken JAHOWA ngo kepandèen lako mengajarken kepandèen kalak i bai sidèban.

³⁵Iberrèken ngo bai kalak idi kepandèen ibas karina matcam bagè ulaen sinibahan sipandè mengokir, penggorga dekket sipandè mertenun linen halus, wol meratah, meharbu dekket mbara, dekket kaèn sidèban. Penggorga pandè ngo kalak i janah ndorok mengulaken mermatcam bagè ulaen.