Read Batak Dairi 2 Musa 36 Bible Online

2 Musa 36 - Batak Dairi bible

2 Musa 36

¹Si Bezaleel, si Aholiab, dekket karina tukkang sienggo menjalo helmu dekket kepandèen bai JAHOWA nai, memettoh bakunè cara memahan karina siniperluken lako memahan Undung-undung JAHOWA. Kennah ibahan kalak i ngo karina bagè sienggo iperèntahken JAHOWA.”

²Idiloi si Musa mo si Bezaleel, si Aholiab dekket karina kalak sienggo terolih kepandèen bai JAHOWA nai dekket si uè mengurupi, nai idokken mo kalak i lako mentebenai.

³Iberrèken si Musa mo taba kalak i karina sienggo iberrèken kalak Israel mi bahaen memajek Undung-undung JAHOWA. Tapi dak tong dèng ngo bangsa Israel merembah pèlèen taba si Musa gennep ceggen.

⁴Nai karina tukkang simengulaken bahaen i,

⁵memagahken taba si Musa, “Haliu sinipemberèken jelma nterrem i enggo lebih daripada siniperluken mahan ulaen sinidokken JAHOWA.”

⁶Nai imongmongken si Musa mo mi karina perundung-undungen i memagahken enggo mo bias pemerrèken i lako mahan Undung-undung JAHOWA; nai oda nèngè mo kadè iembah jelma nterrem i.

⁷Asa gabè lebbih nola mo sinipemberèken kalak idi lako pepulken ulaen idi.

⁸Nai itukkangi sipandèna kalohon ipas nasa tukkang idi nai mo Undung-undung JAHOWA. Ibahan kalak idi mo Undung-undung idi ipas sipuluh rambar kaèn linen halus nai itennun dekket kaèn wol meratah, meharbu dekket mbara, janah isulamken mo gombaren kerub.

⁹Gennep rambar dos sibarenna; geddangna sipuluh dua mèter, janah bekkangna dua mèter.

¹⁰Lima rambar kaèn i ipedemmu gabè sada layar, janah silima rambar nai i pè bagi ma mo tong ibakin.

¹¹Ipas biding layar sidua idi ibakin mo sangketten ipas kaèn meratah nai,

¹²limapuluh sangketten i gennep layar, gabè merumangken sada mpasang.

¹³Nai ibahan mo limapuluh kait emmas lako pesadaken layar sidua idi.

¹⁴Enggo kessa bagi, ibahan kalak i mo saong Undung-undung i ipas sipuluh sada rambar kaèn ibas buk kambing nai.

¹⁵Gennep rambar dos sibarenna, geddangna sipuluh tellu mèter janah bekkangna dua mèter.

¹⁶Lima rambar ipedemmu gabè sada layar, janah siennem rambar nai pè bagi ma mo ibakin.

¹⁷Ibakin mo limapuluh sangketten i biding layar perlebbè janah limapuluh sangketten i biding layar sipeduaken.

¹⁸Nai ibahan mo limapuluh kait ipas tembaga nai lako pedemuken duana layar i gabè saong Undung-undung i.

¹⁹Kessa i ibahan mo dua tutup mi sidua lumpak i, sada ipas bebak biri-biri tonggal nai siniubar mbara, janah sidèbanna i ipas bebak menipis nai.

²⁰Nai ibahan kalak i mo rangka-rangka Undung-undung i pajek mi dates ipas kayu sempènur nai.

²¹Gennep rangka empat mèter datesna janah bekkangna ennempuluh ennem sèntimèter.

²²I gennep rangka ibahan mo dua patok simpasang, asa ndorok i pedemmu rangka sisada mi si sada nai.

²³I kettan selatan ibakin mo duapuluh rangka,

²⁴dekket empatpuluh henjellenna i pirak nai, dua mo iterruh gennep rangka mi sidua patokna.

²⁵I kettan utara ibahan mo duapuluh rangka,

²⁶dekket empatpuluh henjellenna ipas pirak nai, dua i terruh gennep rangka.

²⁷Kan podi Undung-undung i kettan kesunduten, ibahan mo ennem rangka,

²⁸janah dua rangka mo i sokina.

²⁹Rangka kettan soki ipedemmu mi pandak nai soh mi kettan dates. Rangka-rangka persoki i ipedemmu i nèhèna nai soh mi babona. Rangka sidua sinaing persokina ibaing ma bagidi.

³⁰Jadi karinana lot ualuh rangka dekket sipuluh ennem henjellen pirak, dua i terruh gennep rangka.

³¹Nai ibahan kalak i mo sipuluh lima kayu pengabin i kayu sempènur nai, lima i gennep rangka-rangka i sada biding Undung-undung,

³²lima nai i sisina sisada, janah lima nai i podi Undung-undung kan kesunduten.

³³Kayu pengabin sikan tengah, ibaing sitengah dates rangka, i punca nai mi punca Undung-undung i.

³⁴Rangka Undung-undung dekket kayu pengabin-pengabin i ilampisi dekket emmas, nai ibaing ma mo gellang-gellang emmas mahan pencèkèpi kayu i.

³⁵Ibahan kalak i ma ngo kaèn pèntu i linen halus nai, sinitenun dekket wol meratah, meharbu dekket mbara, nai isulamken mo gombaren kerub.

³⁶Bekkas penggantungen kaèn i, ibahan mo empat tihang i kayu sempènur nai simerlampis emmas dekket kait emmas janah ibaing i babo empat henjellen pirak.

³⁷Nai ibahan mo kirè-kirè pèntu Undung-undung i linen halus nai sinitennun dekket wol meratah, meharbu bak mbara janah isulam.

³⁸Mi kaèn pèntu i ibahan lima tihang ipedemmu merkitè kait-kait. Punca bak pengudun tihang silima i ilampisi dekket emmas, janah henjellenna silima i ibahan ipas tembaga nai.