Read Batak Dairi 2 Musa 37 Bible Online

2 Musa 37 - Batak Dairi bible

2 Musa 37

¹Ibahan si Bezaleel mo Pèti Perpadanen ipas kayu akasia nai, geddangna 110 sèntimèter, bekkangna dekket datesna 66 sèntimèter.

²Kettan bagessen dekket kettan darat ilampisi dekket emmas tulèn, nai ibahan bingkèna emmas kuliling.

³Nai ibahan mo empat gellang emmas i bekkas kayu osong-osongna janah ibaing ipas nèhè pèti siempat i, dua gellang i gennep biding pèti i.

⁴Ibahan ma mo osong-osongna ipas kayu sempènur nai, janah ilampisi dekket emmas.

⁵Nai ipemasuk mo kayu osong-osong idi mi bagasen gellang silot ipas gennep biding pèti i.

⁶Nai ibahan mo sada tutup ipas emmas tulèn nai, geddangna 110 sèntimèter janah bekkangna 66 sèntimèter.

⁷Ibahan ma mo dua kerub ipas emmas teppaen nai,

⁸sada i gennep punca tutup i. Sidua kerub i ibakin mersada dekket tutupna,

⁹janah ibakin pedempak-dempak, dekket kabengna ngkerbang menangkemmi tutup pèti i.

¹⁰Ibahan si Bezaleel mo mèja ipas kayu sempènur nai, geddangna 88 sèntimèter, bekkangna 44 sèntimèter janah datesna 66 sèntimèter.

¹¹Ilampisi ngo mèja idi dekket emmas tulèn janah ibakin merbingkè emmas kuliling.

¹²Nai ibakin mo biding mèja i 7,5 sèntimèter. Biding mèja i ibakin merbingkè emmas kuliling.

¹³Ibahan mo empat gellang mahan bekkas kayu osong-osongna janah ileketken ipas empatna soki mèja i.

¹⁴Ileketken ma mo gellang penahan kayu osong-osongna i igembar biding mèja i.

¹⁵Osong-osong i ibahan ipas kayu sempènur nai janah ilampis dekket emmas.

¹⁶Ibahan ma ngo pinggan-pinggan, mangkuk-mangkuk, goci-goci dekket bokkor-bokkor mahan bekkas pemèlèen laè anggur. Karina haliu mèja idi ibakin ipas emmas tulèn nai.

¹⁷Ibahan si Bezaleel ma ngo nèhè lampu ipas emmas tulèn nai. Henjellen dekket cèkèpenna ibahan ipas emmas teppaen nai. Bunga-bunga hiasen, termasuk motik dekket kelopakna mersada ngo ibaing dekket cèkèpenna.

¹⁸Ipas cèkèpenna idi ibahan ennem dangkah, tellu dangkah kacimbang mbellah.

¹⁹Ipas gennep dangkah ibakin hiasen merumangken tellu bunga badem mermotik dekket merkelopak.

²⁰Ipas cèkèpenna i ibahan hiasen merumangken empat bunga badem mermotik dekket merkelopak.

²¹I terruh gennep dangkah ibakin ma mo sa- da motik.

²²Karina nèhè lampu i dekket motik-motik bak dangkah-dangkahna, ibahan ipas sada gumul emmas teppaen tulèn nai.

²³Ipas nèhè lampu i ibahan mo pitu lampu merdengan alat lako membersihken sumbu lampu janah batilna ipas emmas tulèn nai.

²⁴Lako memahan nèhè lampu dekket perlengkapenna iperluken 35 kilo emmas tulèn.

²⁵Ibahan si Bezaleel mo sada langgaten ipas kayu sempènur nai mahan bekkas menutung dahupa. Empat soki ngo langgaten i, geddangna dekket bekkangna gennep 45 sèntimèter janah datesna 90 sèntimèter. Ipas sokina siempat i kettan dates ibahan tanduk mersada dekket langgaten i.

²⁶Kettan datès empat lumpakna dekket tanduk-tandukna idi ilampisi dekket emmas tulèn janah kuliling ibakin emmas bingkèna.

²⁷Ibahan ma mo dua gellang i terruh bingkè emmas i ipas lumpakna duana lako memahan kayu osong-osong langgaten i.

²⁸Osong-osong i ibahan ipas kayu sempènur nai janah ilampisi dekket emmas.

²⁹Ibahan si Bezaleel ma ngo minak kerja dekket dahupa tulèn baungkus, isakkor tosè bagè minak baungkus.