Read Batak Dairi 2 Musa 38 Bible Online

2 Musa 38 - Batak Dairi bible

2 Musa 38

¹Ibuat si Bezaleel mo kayu sempènur, nai ibahan mo langgaten mahan bekkas pèmèlèen situtungen. Empat soki ngo langgaten idi, geddangna dekket bekkangna gennep 2,2 mèter, janah datèsna 1,3 mèter.

²Ipas gennep soki kettan dates ibakin tandukna mersada dekket langgaten. Karina ilampis dekket tembaga.

³Ibahan ma ngo saruam-saruam, penaok, mangkuk-mangkuk, garpu-garpu dekket bekkas api. Karina haliu i ibahan ipas tembaga nai.

⁴Ibayu ma mo kawat ipas tembaga nai, ililitken mi langgaten kettan terruh, datesna sitengah daripada dates langgaten i.

⁵Nai ibahan ma mo empat gellang bekkas kayu osong-osong ipas siempat soki kettan terruhna.

⁶Kayu osong-osong i ibahan ipas kayu sempènur nai ilampis dekket tembaga.

⁷Nai icucukken mo duana kayu osong-osong i mi bagessen gellang-gellang mi dua lumpakna langgaten i. Ibakin ngo langgaten i ipapan nai, janah kettan bagasen merruang ibaing.

⁸Ibahan si Bezaleel ma ngo kancah tembaga merhatapken tembaga. Tembaga i imo bai cermin-cermin daberru nai si merkebbas i pèntu Undung-undung JAHOWA.

⁹Ipagari si Bezaleel mo èmpèr Undung-undung JAHOWA i dekket layar ipas kaèn linen halus nai. Kettan selatan, geddangna 44 mèter,

¹⁰isangketken ipas duapuluh tihang tembaga, karina merhenjellen ipas tembaga bak kait dekket sangketenna ipas pirak nai.

¹¹Kettan utara pè bagi ma ngo ibakin.

¹²Kettan kesunduten ibaing ma mo layar geddangna 22 mèter, dekket sipuluh tihang janah sipuluh henjellenna; kait dekket perdemuenna ibahan ipas pirak nai.

¹³Kettan kebincaren, si lot pèntuna, bekkang layarna tong ma 22 mèter.

¹⁴I kambirang kamuhun pèntu i, ileketken layar, geddangna gennep 6,6 mèter, dekket tellu tihang janah tellu henjellen.

¹⁶Karina layar kuliling kasèan idi ibakin ipas kaèn linen halus nai.

¹⁷Henjellen tihang-tihangna, ibahan ipas tembaga nai, tapi ukum pengkait, pengudun dekket punca tihangna ibahan ipas pirak nai. Karina tihang i sikuliling kasèan i ipedemmu dekket kait-kait pirak.

¹⁸Kirè-kirè pèntu pengkeruhen kasèan idi ibahan ipas linen halus nai sinitennun dekket wol meratah, meharbu dekket mbara janah i hias dekket sulamen. Geddangna sibah mèter janah datesna dua mèter, dos dekket layar sinikasèan i.

¹⁹Kaèn pèntu i isangketken ipas empat tihang dekket empat henjellen tembaga. Karina pengkait, tutup puncana dekket sangkettenna ibahan ipas pirak nai,

²⁰tapi ukum patok-patok Undung-undung i dekket pagarna ibahan ipas tembaga nai.

²¹En mo gerar-gerar logam sinipakè mi Undung-undung JAHOWA, bekkas sidua batu dekket Sipuluh Patiin Dèbata ipennep. Ibakin gerar-gerar i merkitè perèntah si Musa janah isusun kalak Lewi simengula siniuluken si Itamar, anak Imam Aron.

²²Si Bezaleel anak si Usi, kempu si Hur i marga Juda nai, memahan karina siniperèntahken JAHOWA.

²³Pengurupina, si Aholiab anak si Ahisamakh i marga Dan nai, sada kalak pandè mengokir, penggorga dekket pandè mertennun kaèn linen halus, bak wol meratah, meharbu dekket mbara.

²⁴Emmas sinipèlèken bai JAHOWA mahan Undung-undung Simbadia, karina buèna seribu kilo, itimbang mengèkutken timbangen simerlakku i Undung-undung JAHOWA.

²⁵Pirak si dapet tikan memilang bangsa Israel buèna 3.430 kilo i timbang mengèkutken timbangen simerlakku ibas Undung-undung JAHOWA.

²⁶Buèna i dos dekket sinigarar karina kalak sitersurat ibas sènsus i. Gennep jelma menggarar nasa harga sienggo itentuken, itimbang mengèkutken timbangen simerlakku. Ipas pemilangen i tersurat 603.550 kalak anak laki simerumur duapuluh tahun mi dates.

²⁷Ipas pirak i nai, 3.400 kilo mo ipakkè mahan siratus henjellen tihang Undung-undung JAHOWA dekket kaèn pèntuna. Gennep henjellen botongna 34 kilo.

²⁸Ipas pirak sitadingna i nai, buèna 30 kilo, ibahan si Bezaleel mo persambungen-persambungen dekket pengkait-pengkait mi tihang-tihangna, bak tutup kettan dates tihang-tihang i.

²⁹Tembaga sinipèlèken bai JAHOWA, buèna karina 2.425 kilo.

³⁰Ipakkè ngo tembaga i mahan alas pèntu Undung-undung JAHOWA, langgaten dekket kawat sinibayu ipas tembaga nai, karina haliu langgaten.

³¹Henjellen layar i sikuliling kasèan dekket pèntu pengkeruhen, karina patok Undung-undung dekket sikuliling kasèan.