Read Batak Dairi 2 Musa 39 Bible Online

2 Musa 39 - Batak Dairi bible

2 Musa 39

¹Si Bezaleel dekket si Aholiab memahan pakkèen merkebbas ipas wol meratah nai, meharbu dekket mbara bai imam-imam tikan merkebbas kalak i i Bilik Simbadia. Pakèen imam lako bai si Aron ibahan bagè sinidokken JAHOWA taba si Musa.

²Efod ibahan ipas kaèn linen halus nai, wol meratah, meharbu dekket mbara, dekket bennang emmas.

³Iteppa kalak i ma ngo bak bennang emmas, nai itennun dekket kaèn linen halus dekket wol meratah, meharbu deket mbara.

⁴Kessa i ibahan mo dua tinali i barana pengèkèt efod sinijarumken mi sisina.

⁵Tali abak tennunen halus ibahan ipas dos haliu nai janah ijarumken ipas èfod i, asa gabè mersada tosè bagè siniperèntahken JAHOWA bai si Musa.

⁶Ikiskis kalak i mo intan delima, nai ileketken ipas bingkè emmas. Merkitè kepandèen iokirken kalak i mo gerar-gerar sisipuluh dua anak si Jakob mi batu-batu intan i.

⁷Nai ileketken mo intan-intan i mi tinali bara efod sikira tanda pernèngèten mi sisipuluh dua marga Israel, bagè siniperèntahken JAHOWA bai si Musa.

⁸Ibahan si Bezaleel dekket si Aholiab mo tutup tenten, haliuna dos dekket haliu mi efod, janah sulamenna pè dos.

⁹Bentukna sagi ilempit dua, bekkangna dekket geddangna gennep 22 sèntimèter.

¹⁰Ipas tutup tenten i ibakin kalak i mo empat mbaris batu intan. I baris perlebbè intan delima, topas dekket baiduri tepak.

¹¹I baris peduaken zamrud, batu nilam dekket intan.

¹²I baris petelluken batu lazuardi, akik dekket batu kecubung.

¹³I baris pe-empatken batu pirus, yakut dekket ratna cempaka. Sisipuluh dua intan idi i rakut dekket emmas.

¹⁴I gennep intan i iokirken mo gerar sada ipas sisipuluhdua anak si Jakob sikira tanda pernèngèten mi marga-marga Israel.

¹⁵Nai ibahan mo dua bura ipas emmas tulèn nai itali bagè tinali.

¹⁶Ibahan ma mo dua gellang emmas ileketken ipas duana punca kettan dates tutup tenten idi.

¹⁷Nai icucukken mo duana bura emmas i mi bagasen gellang-gellang i,

¹⁸janah punca sidua nai, itapelken mi sidua bingkè, asa gabè ndorok tutup tenten i ipedemmu dekket tinali bara si kettan lebbè efod i.

¹⁹Nai ibahan ma mo dua nai gellang emmas ileketken mi tutup tenten idi, i punca kan terruh kettan bagessenna si dais mi efod.

²⁰Enggo kessa bagi ibahan mo dua gellang emmas, ileketken kettan lebbè tinali bara sidua i efod, narih mi perdemuen penjarumenna narih mi terruh, i babo tali abak ipas tennunen halus nai.

²¹Rembang bagè perèntah JAHOWA bai si Musa, gellang tutup tenten i, ipedemmu dekket tinali meratah ipas gellang efod, asa dak tong tutup tenten i i babo tali abak janah oda ndorok ntalkas.

²²Jubah sinipakkè i babo efod, karina ibahan ipas wol meratah nai.

²³Ruang kerahongna ipetegguh dekket pita tennunen, asa ulang murah meribak.

²⁴I sikuliling bidingna tan terruh ibakin hiasen buah delima ipas kaèn linen halus nai dekket wol meratah, meharbu dekket mbara nai, i kellang-kellangi dekket cimata emmas nai, rembang bagè siniperèntahken JAHOWA taba si Musa.

²⁷Ibahan kalak i ma mo anak baju bai si Aron dekket dukak-dukakna,

²⁸bak sorban, sulabal joppok ipas linen nai,

²⁹dekket pementing ipas kaèn linen halus nai, wol meratah, meharbu dekket mbara, ihias dekket sulamen, bagè siniperèntahken JAHOWA taba si Musa.

³⁰Ibahan ma mo hiasen ipas emmas tulèn nai, tandana magahken enggo ipilih kalak i bai JAHOWA. Ipas hiasen i terokir kata-kata “Ikelini bai JAHOWA”.

³¹Hiasen idi i lekketken ipas sorban kettan lebbè, rembang bagè perèntah JAHOWA bai si Musa.

³²Ujungna pul mo karina ulaen memahan Undung-undung JAHOWA. Enggo ibahanken kalak Israel karina bagè siniperèntahken JAHOWA taba si Musa.

³³Iembah kalak i mo taba si Musa Undung-undung dekket karina haliuna, kait-kaitna, sumban-sumbanna, tihang-tihangna dekket henjellenna,

³⁴tutupna ipas bebak kambing tonggal nai siniubar mbara, tutupna ipas bebak menipis nai, kaèn penudung.

³⁵Pèti Perpadanen sin dua batu dekket kayu osong-osongna dekket tutupna,

³⁶meja dekket karina haliuna dekket roti hantaren,

³⁷nèhè lampu ipas emmas tulèn nai, lampu-lampuna dekket karina haliuna, minak lampu

³⁸langgaten ipas emmas nai, minak kerja, dahupa baungkus, kirè-kirè pèntu Undung-undung,

³⁹langgaten tembaga dekket kawat binayu ipas tembaga nai, kayu osong-osong dekket karina haliuna, kancah laè bekkas merborih dekket henjellenna,

⁴⁰layar-layar mi kasèan dekket tihang-tihang dekket henjellenna, kirè-kirè pèntu pengkeruhen, kasèan bak rakut-rakutna, patok-patok Undung-undung; karina haliu sipakkèen ibas Undung-undung,

⁴¹dekket pakkèen merkebbas bai imam sinderrang merkebbas kalak idi i Bilik Simbadia dekket pakkèen merhuntuen bai si Aron dekket dukak-dukakna.

⁴²Enggo ibahanken kalak Israel karina bahaen i bagè siniperèntahken JAHOWA taba si Musa.

⁴³Iperèso si Musa mo karina janah idah enggo i bakin kalak i rembang bagè siniperèntahken JAHOWA, nai ipasu-pasu si Musa mo kalak i.