Read Batak Dairi 2 Musa 4 Bible Online

2 Musa 4 - Batak Dairi bible

2 Musa 4

¹Nai nina si Musa mo mengaloi JAHOWA, “Tapi bakunè nola mo mula oda percaya kalak Israel janah oda iparduliken ranangku? Bakunè nola mo kubaing mula idokken kalak i oda tuhu ipacidah JAHOWA dirina bangku?”

²Ikuso JAHOWA mo si Musa, “Kadè ngo i tanganmi?” Ialoi si Musa mo, “Tongket ngo i.”

³Nina JAHOWA nola mo, “Kebekken mo i mi tanoh.” Ikebbekken si Musa mo nai mènter gabè nipè mo tongketna i, nai mènter lojang mo si Musa asa narih merkellang ndaoh.

⁴Idokken JAHOWA mo taba si Musa, “Jolmiti mo nipè i janah tangkup mo uitna.” Nai ijolmiti si Musa mo janah icekkak mo nipè i mènter sintempu mo mobah gabè tongket nola i tangan si Musa.

⁵Nina JAHOWA mo, “Bakin mo bagi asa percaya kalak Israel, Aku ngo JAHOWA Dèbata mpung kalak i, Dèbata si Abraham, si Isak dekket si Jakob, sienggo pacidahken diri bamu.”

⁶Nai idokken JAHOWA dèng ma taba si Musa, “Cucukken mo tanganmu mi bagasen bajumi.” Ibaing si Musa mo bagi janah iruah kessa mo tanganna i mi ruar, gabè mbentar kalohon mo tanganna i bagè sipuruen.

⁷Nina Dèbata nola mo, “Cucukken nola mo tanganmi mi bagasen bajumi.” Nai ibaing si Musa mo bagi, janah iruah kessa, enggo gabè malum tanganna i.

⁸Idokken JAHOWA dèng ma, “Mula oda dèng percaya kalak i bamu, barang oda tok mula pè enggo idah kelengangen perlebbè i, kelengangen èn nola mo maing gabè percaya kalak i.

⁹Mula tong dèng oda percaya kalak i bamu tukasi pè enggo idah kelengangen sidua bagè i, janah mula oda iparduliken kalak i ranamu, buat mo cituk laè i laè Nil nai, janah sampakken mo mi tanoh. Mobahmo laè i gabè daroh.”

¹⁰Tapi idokken si Musa mo, “Alè Jahowa, oda ngo pandè aku mengerana tikalana i nai pè soh mi bagèndari enggo kessa mengerana JAHOWA i dekket aku. Mbotong ngo dilahku, janah mengerana pè melancè ngo aku janah oda ncardik.”

¹¹Idokken JAHOWA mo mbangsa, “Isè ngo simemerèken babah bai jelma? Isè memakinsa pekkak barang tongkik? Isè makin ia merpendidah barang pètung? Otang Aku JAHOWA ngo?

¹²Bagèndari pè, berkat mo ko. Kudengani pè ko tikan mengerana janah kuajari pè ko barang kadè sinaing dokenkenmu.”

¹³Tapi ialoi si Musa mo, “Pengidonku, ulang mo aku pasulak alè Jahowa, kalak sidèban mo pasulak.”

¹⁴Nai melaga mo JAHOWA taba si Musa ninganna idokken, “Otang lot ngo denganmu sibeltek mergerar si Aron? Kubettoh ngo pandè ia mengerana. Situhuna enggo i tengah ndalan ia bagèndari lako misèn, janah lolo ngo ukurna pejumpa dekket ko.

¹⁵Mengerana mo ko dekketsa janah bagahken mo bana kadè sipatut dokenkenmu. Kudengani pè kè sidua janah kuajarken barang kadè sipatut dokenken dekket sibakinen ndènè.

¹⁶Kennah merkitè gerarmu ngo ia mengerana i lebbè jelma nterrem. Ia mo gabè persinabulmu janah dosken Dèbata ngo kono iètong, simemagahken kadè sipatut dokenkenna.

¹⁷Embah mo tongketmu idi, asa baing kelengangen merkitè tongket i.”

¹⁸Enggo kessa i, balik mo si Musa mi bages si Jitro simatuana daholi, janah nina mo mbangsa, “Alè puhun, duè kènè mo aku balik mi tanoh Mesir lako mendahi karina sincelketku, asa kuidah tah nggelluh dèng ma ngo kalak i.” Nina si Jitro mo taba si Musa, “Lakè mo tuhu kèla, njuah-njuah mo kè i dalan.”

¹⁹Sinderrang i tanoh Midian dèng si Musa, idokken JAHOWA mo mbangsa, “Balik mo ko mi tanoh Mesir. Karina kalak simertaki naing memunuh kono, enggo matè.”

²⁰Nai iarahken si Musa mo sinibagesna dekket dukak-dukakna janah ibaing mo kalak i mi babo kalodè janah berkat mo kalak i mi tanoh Mesir. Merkitè perèntah JAHOWA, iembah si Musa ma ngo tongketna i.

²¹Kessa i nina JAHOWA mo taba si Musa, “Enggo Kuberrèken bamu kuasa lako memaing kelengangen. Asa mula enggo balik kono mi tanoh Mesir sikalien, bakinenku mo karina kelengangen idi i lebbè raja Mesir i. Tapi Kubaing mo mpihir ukurna, asa ulang ipadiat bangsa i laus.

²²Nai dokken mo taba raja i, Aku JAHOWA mertennah bagèn: ‘Ukum Israel imo anakKu situaen.

²³Janah enggo Kuperèntahken bamu asa padiat anakKu idi berkat asa iuèi Aku, keppè itulak ko. Bagèndari pè Kubunuh mo anakmu situaen.’ ”

²⁴Ipas sada bekkas permalamen i perdalanen i, roh mo JAHOWA mendahi si Musa lako naing memunuhsa.

²⁵Ibuat si Zipora sinibagesna idi mo sada batu ntajem nai i takkil mo anakna, nai idaisken mo mi nèhè si Musa. Nina si Zipora, “Sinibagesna i mo, sinibalè daroh ngo ko bangku.”

²⁶Idokken pè bagidi kumernaken adat mertakkil ngo. Jadi oda nè saut i bunuh JAHOWA si Musa.

²⁷Kessa bagidi nina JAHOWA mo taba si Aron, “Laus mo ko mi padang gurun menjumpai si Musa.” Nai laus mo si Aron pejumpa mo ia dekket anggina i delleng simbadia i, janah isanggoh mo anggina i.

²⁸Isukutken si Musa mo karina taba si Aron, sinidokken JAHOWA tabasa sinderrang ipasulak ia balik mi tanoh Mesir, bagi ma tersèngèt karina kelengangen si kennah bakinenna.

²⁹Enggo kessa bagi laus mo si Musa dekket si Aron mi tanoh Mesir janah ipepulung mo karina pengulu Israel.

³⁰Ibagahken si Aron mo taba kalak idi karina sienggo idokken JAHOWA taba si Musa, janah ibahanken si Musa mo karina kelengangen i hadeppen kalak idi.

³¹Nai percaya mo kalak i, janah idengkoh kalak i kessa mo enggo iperdatèken JAHOWA Israel janah mengidah karina kinidersa kalak i, sujud mo kalak i mersembah.