Read Batak Dairi 2 Musa 40 Bible Online

2 Musa 40 - Batak Dairi bible

2 Musa 40

¹Idokken JAHOWA mo taba si Musa,

²“Pejengjeng mo Undung-undungKu tupung ari sada bulan sada.

³Pemasuk mo mi bagasen Pèti Perpadanen sienggo sin Sipuluh Patiin janah baing mo kaèn penudungna i lebbèna.

⁴Gamparken mo mèja dekket haliuna i kebekkasenna. Pemasuk ma mo nèhè lampu janah baing mo lampuna.

⁵Gamparken mo langgaten emmas bekkas penutungen dahupa i lebbè Pèti Perpadanen i, janah gantungken mo kirè-kirè i pèntu Undung-undung i.

⁶Gamparken mo langgaten bekkas pèlèen situtungen i lebbè pèntu Undung-undung i.

⁷Bakin mo kancah bekkas laè i kellang-kellang Undung-undung dekket langgaten i, nai sini mo dekket laè.

⁸Nai baing mo layar i sikuliling kasèan Undung-undung i, janah sangketken kirè-kirè pèntu pengkeruhen kasèan i.

⁹Nai kennah pèlèken mo bangKu Undung-undung i dekket karina haliuna, merkitè meminakisa dekket minak kerja, asa karinana idi merkedekoen pellin baKu.

¹⁰Pèlèken ma mo langgaten dekket karina haliuna merkitè bagidi ma tong, asa karinana idi, merkedekoen pellin baKu.

¹¹Bagi ma mo tong bakin bang kancah laè bak henjellenna i.

¹²Enggo kessa bagi, pasulak mo si Aron dekket dukak-dukakna roh mi pèntu Undung-undung janah menguras dirina.

¹³Pakèken mo pakèen imam bai si Aron, janah minaki mo ia asa ipebangkit ia lako mengkebasi Aku gabè imam.

¹⁴Nai dokken mo dukak-dukakna roh njolmit, janah pakèken mo anak baju bai kalak i.

¹⁵Nai minaki mo kalak i bagè peminakimu taba bapa kalak i, asa kalak idi pè ndorok mengkebasi Aku gabè imam. Merkitè kerja meminaki idi, mercundut-cundut mo marga kalak idi mencèkèp ulaen imam.”

¹⁶Ibaing si Musa mo karina bagè sini- perèntahken JAHOWA.

¹⁷Asa i ari sada bulan sada i tahun peduaken enggo kessa itadingken kalak Israel tanoh Mesir, ipajek kalak i mo Undung-undung JAHOWA.

¹⁸Igamparken si Musa mo henjellen-henjellenna, pejeng-jengken rangka-rangkana, mengampèken kayu sumbanna, janah pecènderken tihang-tihangna.

¹⁹Nai ipekimbang mo saong Undung-undung i dekket tutup kettan ruar i babona bagè siniperèntahken JAHOWA.

²⁰Kessa i ipemasuk mo batu sidua i mi bagessen Pèti Perpadanen i. Nai iampèken si Musa mo tutup Pèti i janah icucukken kayu osong-osongna mi bagessen gellangna.

²¹Nai ibakin mo Pèti idi mi bagessen Undung-undung i janah menangketken kaèn penangkemmi i lebbèna, bagè siniperèntahken JAHOWA tabasa.

²²Kessa i ibakin si Musa mo meja mi bagessen Undung-undung i, kettan utara i ruar kaèn i,

²³nai igamparken mo roti hantaren i babo mèja i.

²⁴Nèhè lampu igamparken ibagessen Undung-undung, kettan selatan, pedempak dekket meja idi,

²⁵nai ilakati mo lampu-lampu idi ihadeppen JAHOWA.

²⁶Langgaten emmas pè ibakin ma mo mi bagessen Undung-undung i lebbè kaèn i,

²⁷nai itutung mo dahupa baungkus bagè siniperèntahken JAHOWA bai si Musa.

²⁸Igantungken si Musa mo kirè-kirè pèntu Undung-undung i,

²⁹janah i lebbè pèntu i, ibakin langgaten mahan bekkas pèmèlèen situtungen. Ibabo langgaten idi ipèlèken mo pèlèen situtungen dekket pèlèen han- taren.

³⁰Kancah tembaga i pè igamparken mo i kellang-kellang Undung-undung dekket langgaten i, nai isini mo dekket laè.

³¹Iborih si Musa, si Aron dekket dukak-dukakna mo tangan dekket nènèh kalak i i sidi,

³²gennep mbengket kalak idi mi bagessen Undung-undung JAHOWA barang menjolmiti langgaten i.

³³I sikuliling Undung-undung dekket langgaten idi ipekimbang si Musa mo layar, nai isangketken ma mo kirè-kirè pèntu pengkeruhen kasèan. Nai pul mo karina ulaen idi.

³⁴Nai roh mo hembun menangkemmi Undung-undung JAHOWA, janah dom cuhaya JAHOWA mo Undung-undung i.

³⁵Kumerna i oda terbaing si Musa mbengket mi bagessen Undung-undung i.

³⁶Gennep kèkè hembun i i babo Undung-undung JAHOWA i nai, irontas bangsa Israel mo perundung-undungen kalak i lako pindah mi bekkas sidèban.

³⁷Tapi mula oda mèrèt hembun idi, oda laus kalak idi i sidi nai.

³⁸Sidekkah i perdalanen bangsa Israel, tong ngo ibas Undung-undung i JAHOWA merumangken hembun mula tikan mahar janah merumangken api mula tikan berngin.