Read Batak Dairi 2 Musa 7 Bible Online

2 Musa 7 - Batak Dairi bible

2 Musa 7

¹Nai nina JAHOWA mo mbang si Musa, “Kubaing mo ko bagè Dèbata i lebbè raja i janah kakamu si Aron mengerana tabasa sikira nabimu.

²Bagahken taba si Aron karinana sienggo Kuperèntahken bamu. Suruh mo si Aron mendokken taba raja i, ai kennah pediatenna ngo kalak Israel menadingken nagerri Mesir.

³Tapi Kubaing mo mermpihir ukur raja i. Oda ngo isarihken kono, agia pè Kubakin mbuè mara i Mesir.

⁴Kumerna i Kuhukum mo kalak Mesir dekket hukumen-hukumen mberrat, nai kuarak mo karina bangsa Israel bangsangKu, mbungkas i nagerri idi nai.

⁵Asa ibettoh kalak Mesir, Aku ngo JAHOWA, sinderrang Kuhukum kalak idi janah mengarak kalak Israel karuar i nagerri kalak i nai.

⁶Nai ibakin si Musa dekket si Aron mo bagè sinidokken JAHOWA i.”

⁷Merumur mo si Musa 83 tahun, tikan menghadep raja Mesir kalak idi.

⁸Nina JAHOWA mo taba si Musa dekket si Aron,

⁹“Mula ipengidoken raja i taba kènè lako memakin kelengangen mahan bukti, dokken mo si Aron memuat tongketna dekket mengambongken mi tanoh i lebbè raja i. Mobah mo tongket i gabè nipè.”

¹⁰Nai laus mo si Musa dekket si Aron menghadep raja i janah ibakin kalak idi mo bagè sinidokken Dèbata. Iambongken si Aron mo tongketna mi tanoh i lebbè raja dekket pugabèna, nai mèter mobah mo tongket idi gabè nipè.

¹¹Kumerna i idilo raja i mo kalak simerhèlmu dekket kalak sipandè, nai ibaing kalak i ma mo bagidi merkitè hèlmuna maing sibalik mata.

¹²Iambongken kalak idi mo tongketna mi tanoh, janah mobah ma mo tongket idi gabè nipè. Tapi gabè ibenduti tongket si Aron mo tongket kalak idi.

¹³Tapi tukasi pè bagi, tong ngo mpihir ukur raja idi, janah oda nggèut memperduliken rana si Musa dekket si Aron, bagè sienggo idokken JAHOWA.

¹⁴Enggo kessa i idokken JAHOWA mo taba si Musa, “Mpihir kalon ngo ukur raja i. Oda iduè bangsa Israel laus.

¹⁵Kumarna i njengkas mo dahi ia, sinderrang laus ia mi laè Nil. Embah mo tongket singgèut mobah gabè nipè idi janah pèma mo pekirohna i biding laè idi.

¹⁶Dokken mo taba raja idi: JAHOWA Dèbata kalak Heber, ngo pasulakken aku pesohken bai raja i, asa padiatenmu ummatNa laus mersembah tabasa i padang gurun. Tapi soh bagèndari laju oda nggèut raja i mendengkohken.

¹⁷Kumarna i bagèèn ngo nina JAHOWA ‘Merkitè sikubakin nahan, bettohenmu mo Aku ngo JAHOWA. Merkitè tongket èn kusampet mo babo laè èn, nai mobah mo laè i gabè daroh.

¹⁸Mermatèen mo ikan janah bau macik mo laè èn gabè oda terènum bangsa Mesir nèngè laè i.’ ”

¹⁹Nai nina JAHOWA mo taba si Musa, “Dokken mo ibuat si Aron tongketna idi janah ipekustang mi babo karina laè, laè bangkiten dekket bendar bendar si lot i Mesir. Kembali daroh mo laèna i, janah i suberri ladang kennah dom daroh, dekket laè silot i kiong dekket goci.”

²⁰Nai ibakin si Musa dekket si Aron mo bagè sinidokken JAHOWA. Ipekèkè si Aron mo tongketna i lebbè raja i dekket karina pugabèna, janah isampet mo laè Nil idi, nai mènter mobah mo laè i gabè daroh.

²¹Mermatèen mo ikan sini laè idi, janah bau macik kalohon mo laè idi, gabè oda nèngè terènum kalak Mesir laè idi. I suberri tanoh Mesir enggo dom daroh.

²²Nai roh mo persibalik mata kalak Mesir ibakin ma mo bagi merkitè kinangguruenna gabè tong mo mpihir ukur raja i. Bagè sienggo nidokken JAHOWA, oda nggèut raja i mendengkohken rana si Musa dekket si Aron.

²³Balik bagi mo ia mi bagesna cituk poda isarihken simasa idi.

²⁴Karina mo kalak Mesir mengkurak telaga i biding laè i lako menulusi laè mahan ènumen, kerna oda nè terènum laè i.

²⁵Enggo mo lebbih pitu ari enggo kessa isumpahi JAHOWA laè Nil i.