Read Batak Dairi 2 Musa 8 Bible Online

2 Musa 8 - Batak Dairi bible

2 Musa 8

¹Enggo kessa i nina JAHOWA nola mo taba si Musa, “Lako mo dahi raja i janah dokken tabasa tennahKu èn: ‘Duè mo bangsangKu laus lako mersembah taba aku.

²Mula oda iduè kono, Kubaing mo dom tekkuk karina nagerri èn mahan hukumen.

³Dom tekkuk mo laè Nil, nai mendarat mo karina tekkuk idi ibas laè idi nai janah roh mi bagesmu, mi bilik dekket mi pedemmenmu, mi bages karina kalak simerpangkat dekket jelma mbellang, bagi soh mi ketaring dekket panci.

⁴Mermangkaten mo tekkuk idi menjurakkit bamu, bai karina simerpangkat dekket jelma mbellang.’ ”

⁵Idokken JAHOWA mo taba si Musa, “Dokken mo si Aron lako pekustangken tongketna mi babo batang laè, laè bangkiten dekket bendar-bendar asa merrohen tekuk asa sap i suberri nagerri Mesir.”

⁶Nai ipekustang si Aron mo tongketna mi babo karina laè nai merrohen mo tekkuk gabè sap i suberri aur.

⁷Tapi tukkang sullap kalak i pè ibaing ma mo helmuna memaing merrohen tekkuk i nagerri i.

⁸Nai itenggoi raja i mo si Musa dekket si Aron, janah nina “Mersodip mo kono taba JAHOWA asa ipegalip karina tekkuk èn asa kupadiat bangsami laus lako memèlèken pelèèn bai JAHOWA.”

⁹Ialoi si Musa mo, “lolo ngo aku mersodip lako bai raja i tentuken mo arina, asa kusodipken raja i, bak pugabè dekket ginemgem pè. Ibèbasken mo nahan raja i ipas tekkuk idi nai, janah oda nè lot tading, laènken i laè Nil.”

¹⁰Ialoi raja i mo, “Baremben mo sodipken aku.” Nina si Musa mo, “Kubakin pè bagè sinipido raja i. Asa i bettoh raja i oda lot Dèbata sidèban tosè bagè JAHOWA, Dèbata nami i.

¹¹PelausenNa mo karina tekkuk-tekkuk idi i jolo raja i nai, i lebbè karina simerpangkat dekket bai jelma nterrem i nai. Oda lot nè tekkuk i gennep sapo, laènken i laè Nil.”

¹²Nai itadingken si Musa dekket si Aron mo raja idi. Enggo kessa i mersodip mo si Musa taba JAHOWA asa ipegalip karina tekkuk siniperrohNa taba raja i.

¹³Iuèi JAHOWA mo pengidon si Musa, janah mermatèen mo karina tekkuk silot i sapo sinikasèan dekket silot i juma.

¹⁴Ipepulung kalak Mesir mo karina bangkè tekkuk idi sanga merjunjun gabè mbau mo nagerri i.

¹⁵Enggo kessa idah raja i mermatèen karina tekkuk idi, balik mo mpihir ukurna janah bagè sienggo idokken JAHOWA, oda iparduliken raja i rana si Musa dekket si Aron.

¹⁶Idokken JAHOWA mo taba si Musa, “Dokken mo ipalu si Aron tanoh i merkitè tongketna, asa karina abu sinitanoh Mesir menjadi gabè namuk.”

¹⁷Nai ilipatken si Aron mo tongketna mi tanoh, janah karina abu sinitanoh Mesir mènter menjadi mo kembali namuk membuluti jelma dekket pinakan.

¹⁸Kalak perhèlmu sibalik mata pè naing ma mo memaing namuk merkitè hèlmu kalak idi, tapi oda tellap ibaing kalak i bagi. Idikè sambing pè enggo dom namuk karina,

¹⁹gabè nina persibalik mata idi mo taba raja i, “Dèbata ngo mahanken èn.” Tapi tong ngo mpihir ukur raja i, bagè sienggo idokken JAHOWA kin oda isuihken raja i rana bai si Musa bak si Aron.

²⁰Nina JAHOWA mo taba si Musa, “Njengkas kalohon ceggen baremben dahi mo raja i sinderrang kebbas ia mi laè, janah bagahken mo bana katangKu èn: ‘Padiat mo bangsangKu laus mersembah taba Aku.

²¹Mula oda iduè kono Kubaing mo roh naleng mendahi pengulu-pengulu dekket ginemgemmu. Karina bages kalak Mesir soh mi karina nagerri èn tupèh kennah dom naleng.

²²Tapi ukum tanoh Gosyen, bekkas bangsangKu merian i oda Kubaing bagi. Asa i bettoh kènè Aku JAHOWA ngo sipehanaken i.

²³Kubaing mo kalihna bangsangKu bak ginemgemmu. Baremben mo masa kelengangen idi.’ ”

²⁴Merrohen mo ibaing JAHOWA mbuè kalohon naleng mi bages raja i dekket mi bages pengulu-pengulu. Susah mo karina nagerri Mesir kumernaken naleng idi.

²⁵Enggo kessa i idilo raja i mo si Musa dekket si Aron nina mo taba kalak i, “Lakè mo memèlèken pèlèen bai Dèbata ndènè, tapi i nagerri èn mo baing kènè.”

²⁶“Simendèna ulang ngo i sèn,” nina si Musa mengaloi, “kerna nggèut ngo gabè ncio atè kalak Mesir mula idah pèlèen nami i, janah pasti ngo matè kami ibentiri kalak idi dekket batu.

²⁷Kennah laus ngo kami mi padang gurun tellu ari merdalan daohna lako memèlèken pèlèen taba JAHOWA Dèbata nami, bagè sienggo iperèntahken i taba kami.”

²⁸Nina raja i mo, “Selloh mo i, kuduè mo kènè laus mi padang gurun lako memèlèken pèlèen taba JAHOWA Dèbata ndènè i, asal mo ulang ndaoh kènè laus. Èngèt ma mo menodipken aku.”

²⁹Ialoi si Musa mo, “Enggo kessa laus aku mèter mersodip pè aku taba JAHOWA asa itadingken naleng i raja i, bak pengulu-pengulu dekket ginemgem i baremben. Tapi ulang nèngè akkal-akkali kami janah ulang nè halangi bangsa Israel laus lako meèlèken pèlèen taba JAHOWA.”

³⁰Nai itadingken si Musa mo raja i, nai mersodip mo ia taba JAHOWA,

³¹janah iuèi JAHOWA mo sodip si Musa i. Nai merkabangen mo naleng-naleng i menadingken raja i, pengulu-pengulu bak ginemgem, singkabuah pè oda lot nèngè tading.

³²Tapi sikali èn pè mpihir ngo tong ukur raja i janah oda ipaduè laus bangsa Israel.