Read Batak Dairi Job 1 Bible Online

Job 1 - Batak Dairi bible

Job 1

¹Lot mo sada kalak anak laki merian i tanoh Us mergerar si Job. Dèbata ngo isembah janah dak setia ia tabasa. Mendè ngo pengelakona janah cituk poda nung ibaing jahat.

²Pitu ngo anakna dekket tellu berruna.

³Nterrem ngo hambana, pitu ribu biri-birina, tellu ribu untana, seribu lembuna dekket lima ratus kalodèna. Terdokken ia mo sibèakna jelma silot i nagerri kebincaren.

⁴Bakko anak si Job sipitu kalak i dak merpèsta ngo i bagesna gennep mergèlèren. Idilo ma ngo mi pèsta i berru si Job sitellu kalak i, nai rebbakkan mangan bak mènum mo kalak i.

⁵Gennep enggo kessa pul pèsta, njengkas ngo ndungo si Job lako memèlèken pèlèen lako bai karina anakna i asa iampuni JAHOWA kalak i. Kumarna dok atè si Job, tah bakunè merdosa dukak-dukakna barang tah mengelèai Dèbata arap siso itulun.

⁶Tikan sidari menghadep JAHOWA ngo pengisi sorga, janah dekket ma ngo i tengah-tengah kalak i si Pengasung i.

⁷Nai ikusoi JAHOWA mo ia, “Idikè nai ngo ko?” Ialoi Pengasung i mo, “Idèng ngo aku balik mèdang-èdang mengagahi suberri dunia.”

⁸Nai ikusoi JAHOWA dèng ma, “Idah ko ma ngo naposonKu si Job? I suberri dunia oda lot bagèsa jelma setia dekket merandalna merukur. Iuèi ngo Aku janah oda nung lot jahat pengelakona.”

⁹Tapi ialoi Pengasung i mo, “Tentu iuèi si Job kono kumerna ijalo ngo upahna.

¹⁰Ai ipasu-pasu kono ngo ia dekket dukak-dukakna janah karina kinibèakna ijamoti Kono. Ulanna pè ipasu-pasu Kono ngo janah iberèken kono ngo bana mbuè pinakan, dom i suberri nagerri.

¹¹Tapi ukum ibuat kono karina kinibèakna i, kennah isumpahi mo Kono!”

¹²Nai nina JAHOWA mo mbang Pengasung idi, “Mula bagi baing mo barang bakunè sambing dok atèmu mi kinibèak si Job i asal mo ulang i kekadè kono ia.” Nai laus mo Pengasung i i hadeppen JAHOWA nai.

¹³Daoh-daoh arien, merpèsta mo dukak-dukak si Job i bages kaka kalak i situaen.

¹⁴Sintempu lojang mo sada kalak naposo roh mi bages si Job memagahken, “Alè tuan, roh ngo kalak Syeba menjuhap kami tikan membajak juma lembunta janah sinderrang mengagat kalodè i gembarna. Enggo itaban kalak i pinakan-pinakan i, janah ibunuhi ngo hamba ndènè silot i sidi. Pellin aku nai ngo kessa maluah lako magahken berita taba kènè.”

¹⁶Sinderrang mengeranaken i dèng ia, roh ma mo naposona sipeduaken mendokken, “Karina biri-biri dekket simermakan pè, enggo matè icalit perkas. Pellin aku nai ngo kessa maluah lako magahken berita taba kènè.”

¹⁷Madèng kerri ibagahken, roh nola mo naposo sipetelluken menukutken, “Roh ngo tellu nuhnuhen kalak Kasdim menaban karina unta ndènè janah ibunuh karina naposo ndènè. Pellin aku nai ngo kessa nggelluh mpellut lako magahken taba Kènè.”

¹⁸Tikan mengerana dèng ia, roh nola mo naposo sidèban merembah berita, “Tupung ngo merpèsta dukak-dukak ndènè i bages anak ndènè situaen i.

¹⁹Sintempu mèter roh mo angin sapa-sipu i gurun pasir nai, iserpa mo bages i merumpak janah matè ngo karina dukak ndènè i. Pellin aku nai ngo kessa mpellut lako magahken taba Kènè.”

²⁰Nai cènder mo si Job, iribaki mo olesna tanda bonek atèna. Icukkur mo takalna, nai sujud mo ia mendokken,

²¹“Tikan itubuhken aku, kadè poda lot kuembah, nai mula ma- tè aku, oda ma lot kuembah barang kadè. JAHOWA ngo merèken, janah JAHOWA ma ngo memuat. Nipoji mo gerarNa.”

²²Jadi kasi pe sempa karina pengojien i, oda ngo merdosa ia janah oda isumpahi Dèbata.