Read Batak Dairi Job 10 Bible Online

Job 10 - Batak Dairi bible

Job 10

¹Enggo bagè pèahen janah moyang atèngku midah nggelluhku, nai kuranaken kepagiten pusuh peratèenku.

²Alè Dèbata, ulang mo aku isalahken Kono; bagahken mo kasa aku ialo Kono.

³Kadè labana mula itèndes Kono aku bagèen janah memitakken sinibaing tanganMu sendiri? Kadè labana mula iuèi Kono pendapet bak rencana kalak perjahat?

⁴Oda dos perukurenMu dekket perukuren manusia

⁵umurMu pè oda bagè joppok umurna.

⁶Mula bagi, kasa isiahi Ko karina dosangku? kasa iletlet Ko karina kesalahenku?

⁷Situhuna ntangkas ngo ibettoh kono kerna satdar ukum aku, oda salah tapi bennar. Ibettoh kono ngo isè poda terbaing paluahken aku i tanganMu nai.

⁸TanganMu ngo menggana aku kasa bagèndari naing Ibinasaken kono aku?

⁹Èngèt mo i tanoh dendang nai ngo ihanaken kono aku. Kasa naing ibaing kono nola aku balik gabè abu?

¹⁰Ipaduè kono bapangku menjadiken aku ipehèdu-hèdu kono aku i kandongen inangku.

¹¹Badanku ibaing Kono merrembaga bak merurat tulanku ibaing ko mersuka bak koling pemalut.

¹²Ibaing kono aku nggelluh; ikekelengi Kono aku, kessahku ijaga Kono merkitè penjamotiMu.

¹³Tapi bagèndari, kubettoh isura-surai kono sapatna èn sipsip ngo isura-surai Kono cilakangku èn.

¹⁴Iperdimata kono aku mula lot maing kesalahen asa ulang iberrè Kono bangku pengampunen.

¹⁵Mula kubahanken dosa nasipku tuhu-tuhu cilaka. Tapi mula oda lot terrèhè pengelakongku, dak tong ngo iètong merdosa aku. Oda pang aku pedorgakken takalku kumarna bonek bak merlèa perasanku.

¹⁶Mula merhasil aku, tukasi pè oda sadikè maharga, oda ngo iletlet ko aku bagè pemaing singa. Nai ipacidah ko nola kuasaMu, pellin lako mencubiari aku.

¹⁷Dak ngo ipecènder ko saksi mengalo aku; nai makin mbelgahna mo pungurMu midah aku. Ipedèmpu ko balapergunggung rembaru lako menjuhap dekket mengkubu aku.

¹⁸Kasa ibelli Ko aku tubuh mi dunia? Lotien kin aku matè oda sanga idah jelma.

¹⁹Nai tosè bagè siso nung mo aku itubuhken kerna i beltek inang nai terrus aku ikuburken.

²⁰Ah, oda ndekkah nèngè matè mo aku, asa, belli mo pellin sadaku, asa ndorok kurasai ari-aringku sigejap nai i.

²¹Oda ndekkah nè laus mo aku janah mak nèngè mulak mi nagerri mehèjem, mehèrem dekket gellap,

²²nagerri meremmang dom lèndung bak keributen sinterrang tosè bagè sigellap tuiten.”