Read Batak Dairi Job 11 Bible Online

Job 11 - Batak Dairi bible

Job 11

¹Nai idokken si Zofar mo, “Oda ngo ndia ialoi perkata luap i? Kennah ngo ndia ibennarken kalak pergerapgap i?

³Alè Job, oda teraloen kami ko dok atèmu? Idokdok ko sip kami kumerna rèhèmu?

⁴Dok atèmu katamu i oda merdosa dok ukurmu mpanting ngo ko i hadeppen Dèbata.

⁵Tapi katerra pè nemmu Dèbata sendiri mo mengerana.

⁶Janah katerra pè nemmu ibagahken mo bamu simasa ukum sibasa-basa i matcam ngo bagèna, janah oda terarusen jelma manusia. Nai satdar mo ko oda sadikè kinipersukmu, mertimbangken hukumen silako jalonmu.

⁷Mèter ndorok mo katèmu kedèbataen Dèbata iarusi kono? Mèter ndorok mo kuasaNa iarti kono?

⁸Datessen dèng ngo kuasaNa daripada langit i; oda terbaing ko menjalap barang mengabin i. Bagessen dèng ngo kuasaNa daripada dunia kalak simatè i oda terantusen kono karinana i.

⁹Belangen dèng ngo kuasana daripada siharhar i janah gedangen dèng ngo hunjurna daripada laut raya i.

¹⁰Mula itangkup janah iembah ko mi kerungguenNa isè mo pang menghalangi sinibaingNa?

¹¹Jelma perluap itandai Dèbata; kejahaten kalak i pè oda maluah kan penengenNa.

¹²Mula inang kalodè meriar menubuhken kalodè melemmuk terbaing ma mo kalak simoto gabè pistar.

¹³Alè Job, pepanting mo ukurmu, peselsel mo. Mersodip mo ko taba Dèbata!

¹⁴Patakken mo dosa i ukurmu nai janah pedaoh mo kejahaten i bagesmu nai!

¹⁵Nai ndorok mo idempakken kono nggelluhmu ibagasen sobar bak gegah; asa ndorok kono cènder ntegguh janah oda perlu bulisah,

¹⁶soh mi kinimpersukmu oda nè èngètenmu; bagè persurut laè mengeraja ilupaken jelma singgelluh.

¹⁷Nggelluhmu lebbih nterrang daripada cèger ari, janah sigellap i nggelluhmu bagè perbendella cèger ari.

¹⁸Gabè ntegguh mo ko janah dom pengharapen; ilegenni Dèbata mo ko gabè dom kemènaken.

¹⁹Oda nè mo ko buradan midah musuh; mèduk mo kalak mengido urup bamu.

²⁰Tapi kalak jahat bingung menengen kumarna oda lot bai kalak i pengurupien. Pellin sada ngo kessa iharapken kalak i imo asa sintempu nemmu roh ajal jelma i.”