Read Batak Dairi Job 12 Bible Online

Job 12 - Batak Dairi bible

Job 12

¹Ialoi si Job mo, “Tuhu ngo kènè utusen permanusia. Mula matè kessa kènè, dekket ngo pemettoh pè matè.

³Aku pè jelma merukur ngo janah merbeddi karina sinidokken ndènè i enggo kuarusi. Janah dèng ma, karinana i isè mo mak tahu? Jadi, ulang dok atè ndènè pantasen kènè asa aku.

⁴Itertabai supan bak dengan ngo aku keppe bennar janah oda mertikas aku. Tikala i ialoi Dèbata ngo sodipku mula kupidoken asa iurupi aku.

⁵Ilèai kènè ngo kalak cilaka, kepèken kènè merkesennangen kalak sinaing jemba ionjemken kènè dèng.

⁶Tapi ukum pendaus nidokdok oda lot kadè kurangna kalak sipang mengalo Dèbata, mènak ngo nggelluhna. Keppèken bègu siniasangkenna pellin gegoh kedirienna.

⁷Kusoi mo manuk-manuk dekket binatang sidèbanna asa iberèken kalak i bamu peddah dekket ajarna.

⁸Pido mo bai pengisi tanoh bak laut, keterangen asa ijalo kono kejelasen.

⁹Isè bai karina kalak i nai siso satdar i mak Dèbata ngo menghanaken kalak i?

¹⁰Ia ngo mengatur sagumanna singgelluh ratana; Ia merkuasa taba kessah karina jelma.

¹¹Bagè dilahku toko iakap mengerasai panganen, bagi ngo pènggelku seddap iakap mendengkoh pengeranaen.

¹²Beritana, lot ngo kebijaken bai kalak sienggo nggeddang umurna, tapi bijak dekket kegegohen lot bai Dèbata ngo kessa. Nina pengarusen lot bai kalak sienggo tua-tua, tapi ukum pengarusen bak kuasa lot pellin bai Dèbata kessa.

¹⁴Barang kadè sinirumpakkenNa oda terpekadè nèngè, barang isè sienggo nitabanNa oda terbakinsa nèngè maluah.

¹⁵Mula i bendar laè, mèter ngkerrah-kerring mo karina; mula ipaluah menjarir, nai iampuh mo karina.

¹⁶Dèbata simergegoh i, mahantu ngo kuasana! Penipu bak sitertipu i terruh kuasaNa karina.

¹⁷Ibuat ngo kebijaken bai kalak perkuasa pemerèntahen nai janah gabè sitertabaen ngo ibaing pengulu-pengulu i.

¹⁸Ipesusur ngo raja janah itaban ngo kalak i;

¹⁹ilèai ngo imam-imam dekket simpantasniasè.

²⁰Ipesip ngo kalak simpantas mengerana irintak ngo kepantasen situa-tua.

²¹Ipemèla ngo kalak sinipelebbè mokka i irampasi ngo hak bai kalak perkuasa nai.

²²Icuhayai ngo bekkas meremmang; ibendangi ngo lèndung mbèrèng mehèjem.

²³Bangsa-bangsa ibaing merrak-merrik bak nduma, nai ibinasaken nola mo kalak i sanga tumpat ma.

²⁴Ibaing ngo sitergerar pengulu kebingungen gabè kadap mo kalak i oda mertujuen.

²⁵Dadap-dadap mo kalak i ibagasen kegellapen, janah jumemba-jemba bagè kalak sipolaen.