Read Batak Dairi Job 13 Bible Online

Job 13 - Batak Dairi bible

Job 13

¹Karinana i nung ngo kuidah janah kudengkoh sendiri janah tuhu-tuhu ngo kuarusi.

²Kubettoh ngo barang kadè ibettoh ko ulang dok atèmu talu aku meradepken ko.

³Tapi sèkel ngo aku mengerana dekket Dèbata Perkuasa; naing kubèla ngo perkarangku i hadeppen Dèbata.

⁴Kerna itutupi kènè ngo kinimoto ndènè dekket tipu, tosè bagè pemaing nangguru palsu.

⁵Ukum oda kin kènè mengerana nidokdok ngo kènè kalak sibijakna.

⁶Asa, dengkohken mo kata pengaloingku, perdatèken mo pembèlaanku.

⁷Ndorok ngo kènè merluap, merkitè gerar Dèbata? Ndorok ngo kènè mersuntil lako keperluenNa?

⁸Ndorok ngo kènè kan Dèbata, dekket membèlasa bagè pengacara?

⁹Mula iperèso Dèbata kènè, selloh ngo ndia hasilna? Terbaing kènè ngo menipusa bagè menipu jelma?

¹⁰Mula merpihak kènè, agia nola merkitè sipsip, Dèbata menghukum kènè dekket ntengam.

¹¹Otang kinimahantu Dèbata maing terkèrjut pusuhmu? Otang ngo kegegohenNa i maing buradan ukurmu?

¹²Karina peddahmu bagè abu siso merguna; pembèlanmu bagè tanoh sekkar murah sarsar.

¹³Kemulihken i, sip mo kono, aku mo mengerana. Oda kusarihken barang bakunè nola akibatna.

¹⁴Mengaban-ngabanken kessah pè enggo uè aku.

¹⁵Kubaing pè bagi, kumarna enggo putus asa aku! Mula naing dok atè Dèbata ibunuh aku, terserah bana mo, tapi kasi pè bagi, tong ngo kubèla i hadeppenNa pengelakongku.

¹⁶Tah bakunè kemulihken keberaninku i, maluah aku, kerna kalak jahat oda pang menghadep Dèbata.

¹⁷Bagèndari pè dengkohken mo mendè-mendè ranangku; radumi mo penjelasenku.

¹⁸Perkarangku enggo ndorok kuhuapken, tok ngo aku, oda ndorok aku isalahken.

¹⁹Alè JAHOWA, mula roh ko menangka aku nono ngo aku ninganna mèma ajalku.

²⁰Tapi uèi mo pengidonku sidua èn, asa pang nola aku menghadep Kono dèng:

²¹petadi mo meniksa aku, janah ulang mo ipedendenken Kono bangku kinimahantuMu.

²²Mengerana mo ko, asa kualoi. Barang paduè mo aku mongkam, nai pè asa aloi.

²³Bakunè pana belgahna kesalahen bak dosa sikubahanken? Karina pengelausingku naing mo nemmu bagahken.

²⁴Kasa Ko menisi janah galip bangku nai? Kadè kulih sebabna, iètong Ko aku musuhMu?

²⁵Dosken bulung merurus isempul angin ngo aku, kasa pella icubiari Ko aku. Pellin ronci ngkerrah janah males ngo aku, dike kin mo ndorok iletlet kono aku!

²⁶Itentuken kono ngo mpagit pernasipenku; Ibalesken kono salahku tikan poso dèng aku.

²⁷Irakuti Kono ngo nèhèngku dekket rantè bessi; karina perkoserku dak kono ngo memanati. Soh mi tapap-tapap nèhèngku, oda lekkang i penengenenMu.

²⁸Nai mumuk mo aku bagè kayu macik bagè gedda ipangan ngitngit aku gabè mocip.