Read Batak Dairi Job 14 Bible Online

Job 14 - Batak Dairi bible

Job 14

¹Kessa nai tubuh jelma i ndotè, oda mergegoh; joppok ngo nggelluhna janah dom kinipersah.

²Tersuan kessa ia, males bagè bunga kembang; mersep bagè lèndung, terrus mbalang.

³Alè Dèbata, kasa pella uè Ko menengen aku, janah pehadepken aku mi kerunggunMu!

⁴Ndorok ngo ndia jelma perdosa mahanken barang kadè oda lot kurangna?

⁵Sadikè umur jelma enggo Itentuken kono; sadikè bulanna pè enggo ipastiken kono. Itetapken kono ngo singgat dikè umurna oda terbaingsa mengelampoisa.

⁶Belli mo ia mengadi, ulang lolahi ia; asa ndorok irasai nggelluhna soh pul ulanna.

⁷Kayu sinitabah lot dèng ngo harapenken mertunas dèng ngo ia janah merdahan.

⁸Tukasi pè ibas tanoh i uratna mocip bak tongkohna matè, kumarna macik,

⁹tapi mula kenna laè, turah nola ngo i bagè suan-suaen sinisuan, merturahen mengolihi.

¹⁰Tapi mula matè jelma, kerri mo sukuten tersèngètsa; itadingken dunia èn, nai mikèm lausna?

¹¹Tosè laè mersep ibas telaga, bagè laè surut soh marsak laèna,

¹²bagi ngo jelma sienggo matè i; oda nè ndorok ia nggelluh mengolihi. Oda nè ndungo ia sidekkah lot dèng langit i, oda nè nung kèkè ia i pedemenna nai.

¹³Boniken mo aku i dunia simatè i; kelini mo aku, soh mi oda melaga Ko mengolihi. Tapi baing mo tikki sinibuhulmu lako mernèngèt diringku.

¹⁴Kerna mula enggo matè jelma i terbaingsa dèng ngo nggelluh mengolihi? Gennep ari ngo aku mèma-mèma soh mi tikki maluah aku ipas kinipersukku simpagit nai ènda.

¹⁵Nai idilo Kono mo aku, janah mengaloi mo aku; nai ngkelleng nola mo atèmu midah aku, ai kono ngo menghanaken aku.

¹⁶Nai iperdatèken Kono mo karina langkahku, tapi oda pella nè ièngèt ko dosangku.

¹⁷Dosangku ipesisi janah Iampuni kono salahku arnia pè isasa ko.

¹⁸Karina delleng merentuh bak sompar-baèr ngo segen i, delleng sintegguh pè mèrèt ngo i bekkasna nai.

¹⁹Batu-batu iampuh laè mengeraja tanoh pè ianun udan gata-gutu. Bagi mo icèdai ko harapen jelma.

²⁰Soh mi amman sumendah ngo italuken kono ia; ipelaus kono ngo ia janah iobah ko abèna.

²¹Gabè kalak mersangap ngo dukak-dukakna, tapi oda arap pemettohenna. Janah mula pè kalak i gabè merlèa oda lot simemagahken tabasa.

²²Pellin mengèlu dagingna ngo irasaken; pellin ndaoh atèna ngo igongken.”