Read Batak Dairi Job 15 Bible Online

Job 15 - Batak Dairi bible

Job 15

¹Nai ialoi si Elifas mo, “Oda tuhu i alè Job, cituk poda lot lapaten katami. Sada kalak poda lot simpantasniasè mengaloi bagè pendokkenmi, oda uè ia pepènter-pènter dirina merkitè kata siso lot musmusna.

⁴Ukum iuèi ngo ranamu i da sada kalak nè poda merkebiaren barang pè mersodip taba Dèbata.

⁵Arap katamu enggo taridah kono mersalah, tapi kesalahenmu ikemkemmi ko dekket motcak dilah.

⁶Oda perlu pella ko kusangka bak kusalahken, kerna merkitè ranamu i ngo ko iaduken.

⁷Idok kono ngo ko jelma perlebbè itubuhken? Enggo ngo ko lot tikala delleng-delleng ihanaken?

⁸Idengkoh ko ngo merarih Dèbata memaing rencanaNa? Pellin ko kessa dok atèmu sidasa nahu jelma?

⁹Karina sinibettohmu kubettoh kami ma ngo; karina siniarusenmu, bai nami pè tangkas ngo.

¹⁰Perbinettohen èn kujalo kami bai kalak sienggo ubanen nai tikan bapamu madèng tubuh, enggo mo lot kalak i.

¹¹Kasa alang atèmu menjalo pengapo Dèbata? Sobar janah melamlam ngo rana nami merkitè gerarNa.

¹²Tapi nggerrah nola ngo atèmu, matamu pè bagè saga;

¹³melaga nola ngo ko taba Dèbata, bana ialo kono ia.

¹⁴Isè jelma siso merdosa? Ndorok ngo ia ndia ntèger i hadeppen Dèbata?

¹⁵Salang taba malaèkat oda tok Dèbata; ai oda mpanting kalak i ipas penengenNa.

¹⁶Makinsa nola mo jelma luhlah sienggo ciningen, simengènum kejahaten bagè laè sambing.

¹⁷Dengkohken alè Job, kubagahken bamu,

¹⁸sinipeddahken simpantasniasè bangku. Peddah i ijalo bai empungna simengusurkensa janah ipeddahken karinana bai pemparenna.

¹⁹Tikanna i oda lot dèng kalak sidèban i nagerrina i; oda lot simengelalingken kalak i bai Dèbata nai.

²⁰Perjahat simenokko denganna, dak terendep-endep sidekkah nggelluhna.

²¹Sora tumtam menelkingi pènggelna; tikala mènak roh penamun mupusisa.

²²Oda lot bana harapen mengilakken kegellapen, kumarna iletlet peddang pemunuh ngo ia i gennep kesempaten.

²³Dak ipèma-pèma keliki ngo ndigan permatèna, kumarna naing ipangan kalak i ngo bangkèna. Nai satdar mo ia gellap ngo ari podina.

²⁴Olpek bagè raja perkuasa enggo naing menjerngemsa.

²⁵Bagi ngo jalonken kalak simengalo Dèbata dekket kalak pang mengalo siperkuasa.

²⁶Ibagasen jukkat ijuhap bak ialo ngo Dèbata; ipekèkè tambeng-tambengna, pantang bana petaluken dirina.

²⁸Merian ngo ia ibas kuta sienggo merumpak janah ncèda, ibas bages sioda lot nè pengisina. Enggo kin ngo kuta i itentuken dakdak tong sitau rumpakenken.

²⁹Kinibèak kalak i kennah mersep-mersep bagi hartana pè kennah kerri-kerri bagi.

³⁰Oda maluah ibas sigellap tuiten nai ia; kennah ilekkup api ngo tunas-tunasna. Ripput mo ia ikessahi Dèbata.

³¹Mula percaya ia mi siso merguna, lako tertipu mo ia; janah ali sinaing jalonna, oda ma ngo merguna.

³²Tikan madèng dapet tikkina, matè mo ia, bagè dahan males siso terbaing nè meratah bagè sikahia.

³³Bagè batang anggur simerdabuhen buahna ngo ia, bagè batang zaitun simerurus bungana ngo ia.

³⁴Kalak perjahat oda merketurunen; kerri melettup bages sinipajekna arap hasil sisip perkilangen.

³⁵Bagi ngo kalak i simenura-nurai bak simengulakensa dom akkal-akkal ngo pusuh peratèenna.”