Read Batak Dairi Job 16 Bible Online

Job 16 - Batak Dairi bible

Job 16

¹Tapi ialoi si Job mo, “Ngkatep ngo kudengkoh kata bagèen; pengapoimu pellin peniksaen.

³Ndigan ngo ndia luap i ipetadi kènè? Kadè ngo menduhduh maing asa ialoi kènè?

⁴Ukum kènè kin aku, janah aku kin kènè, aku pè ndorok ngo mengerana, tosè bagè kènè. Kudomi mo kènè dekket peddah pengajaren takalku pè mèter kuupir-upirken.

⁵Kupetegguh mo ukurmu merkitè matcam bagè anjuren; ranangku pè maing pengapoien.

⁶Mula mengerana aku oda ngo mentadi kinipersukku; mula nono aku, kadè mo gunana bangku?

⁷Dèbata, memaing bangku dom kesusahen; karina dukak-dukakku enggo ibinasaken.

⁸Ia ngo mengalo dekket menaban aku. Bagèndari bagè kias-kias ngo dagingku, janah bai jelma nterrem idi mo tandana magahken enggo aku merdosa.

⁹Ibagasen nggettem itektekki Dèbata dagingku; nggogo kalohon atèna midah aku.

¹⁰Karina kalak simengerèhèi aku arap ngangang babahna; iurup-urup mendohken aku dekket abèngku pè ndeppa.

¹¹Dèbata ngo menohken aku taba jelma durhaka idabuh aku mi tangan kalak merjaya.

¹²Tikala i mènak janah sennang ngo nggelluhku, tapi sintempu ijuhap Dèbata mo aku. Icekkak ngo tengkukukku janah iambongken aku; ibaing mo aku tèngken mi bekkas latihen.

¹³Oda meralang-alang dak ipanah ngo aku gabè orè mo sin beltekku.

¹⁴Merjuhap ngo Ia bagè sada kalak soridadu ilukai ngo aku oda merbilang.

¹⁵Kupakè goni tanda lui perukuren jah kundul ipas cirabun kumarna italuken.

¹⁶Mbara abèngku kumarna tangisku; meratah jah mbessel ngo koling matangku.

¹⁷Tapi oda uè aku maing kegegohen tangkas sènteng ngo sodipku taba JAHOWA.

¹⁸Alè tanoh, ulang boniken kejahaten sitaba aku; ulang sipken dilo-dilongku mido asa adil ibaing bangku.

¹⁹Kubettoh ngo sikibela aku merian i sorga; Ia ngo saksi magahken aku oda merdosa.

²⁰Irèhèi janah itertabai denganku ngo aku; kuhadep Dèbata ningan tangis mengido pengurupien.

²¹Yah, rupana Dèbata sendiri membèla aku i hadeppenNa tosè mi sada kalak siuè mengkepkep supan-supanna.

²²Ari-aringku sitadingna oda nggeddang nèngè; sikarang nai laus mo aku janah oda balik nèngè.