Read Batak Dairi Job 17 Bible Online

Job 17 - Batak Dairi bible

Job 17

¹Ajalku enggo njolmit, naing mpostep mo kessahku; pellin kuburen nai ngo kessa bagianku.

²Jelma sirèhèen nai ngo aku ibaing dèba kuidah toko mo ibaing kalak i pengerèhèina.

³Ntèger ngo aku alè Dèbata. Tok mo ko bangku. Isè dèng ma ngo ndia uè menumpaki ranangku?

⁴Ipètut kono ngo ukur kalak i gabè oda mengarusi; ulang mo nemmu pella kalak i pepatuken aku bagèndari.

⁵Pendokken umpama, barang isè mengaduken dengan muat laba dukak-dukakna ngo menggongken balesna.

⁶Bagèndari merkitè umpama i ngo irèhèi aku; roh ngo kalak i mencèduri abèngku.

⁷Ramben matangku kerna bonekna; rèkkus dagingku kerna ndersana.

⁸Kalak pertèger mersèto ukurna bak hèran; kalak siso mersalah dok atèna aku oda mertuhan.

⁹Simerpengelako selloh jah oda merdosa, makin tok ia nggelluhna toko atè Dèbata.

¹⁰Ukum roh nemmu karina kènè mi sènda oda lot kuidah kalak bijak giam sada.

¹¹Enggo kerri ari umurku, sondat karina sura-surangku; bennè ma mo karina sinipercinta ukurku.

¹²Tapi supan-supanku mendokken rana, ‘Berngin mahar bak nterrang roh nè mo nina.’ Tapi kubettoh ngo ibas ukurku dak gellap ngo simasa bangku.

¹³Pellin kematèen nai ngo sikuharapken, i sidi mo aku meddem ibas gellap tuiten.

¹⁴Kuburenku kudokken “Bapangku,” janah goya sikipangan dagingku kudokken “Inang” dekket “Turangku”.

¹⁵I dikè ngo ndia siharapenku; isè mengidah lot kesennangen bangku?

¹⁶Mula susur aku mi dunia simatè, oda lot sikuharapken nèngè.”