Read Batak Dairi Job 18 Bible Online

Job 18 - Batak Dairi bible

Job 18

¹Nai ialoi si Bildad mo, “Alè Job ndigan ko asa mentadi mengerana? Sip ko lebbè, janah dengkohken bagèndari kami naing mengerana.

³Kasa moto kami dok atèmu, janah ipedos ko kami bagè lembu?

⁴Pellin menakiti dirimu ngo lagamu i. Kemulihken kono kennah ngo dok atèmu kebennèen pengisina dunia èn ti, dekket dellengna pè ilompat i bekkasna nai?

⁵Pelita kalak perjahat kennah iènteppi, apina oda nung nè ilakati.

⁶Sinterrang i undung-undung gabè mehèjem, pelita simenendangisa oda nè merbendella.

⁷Perdalanna teggap i kin gabè dumuyuk-duyuk; sura-surana sendiri memaingsa terhantuk.

⁸Merdalan ia mi bas jarat, nai terèkèt mo nèhèna.

⁹Tukul-tukulna terjerret, gabè tertangkup mo ia.

¹⁰I tanoh, mboni ngo jarat; i dalan, itogong ngo jebbak bak pengaci.

¹¹Kalak perjahat isenggetti arap karina arah ukur mbiar ngo mengèkutkensa gennep langkah.

¹²Arnia mergegoh ngo ia; bagèndari mpersuk ngo ia; olpek ngo mendenganisa barang mikè pè ia.

¹³Kolingna ipan sakit mparah; tangan bak nèhèna macik mernanah.

¹⁴Iruntun ia i undung-undung nai, bekkasna mènak i, nai iruah ia mi kematèen i.

¹⁵Bagèndari barang isè pè ndorok merian i undung-undungna, janah ihamburken mo barèrang i sidi memunuh penakitna.

¹⁶Urat-uratna ngkerrah bana merkèrut, ranting-rantingna ngkerrah-kerring bana ngkurtut.

¹⁷Oda nè tertandaen ia i bagasen bang i ruar kuta; sada kalak poda nèngè mernèngèt gerarna.

¹⁸Ipelaus ia i sinterrang nai mi kegellapen; i bekkas kenggeluhen nai ia itulakken.

¹⁹Oda lot nèngè dukak bang pinemparna sada kalak poda lot nè tading-tadingna i lebbuhna.

²⁰Mendengkoh nasipna tersengget jelma pengisi kesunduten jelma pengisi kan kebincaren menggirgir kerna buradan.

²¹Bagi mo jalonken jelma durhaka, kumarna oda iuèi kalak i Dèbata.”