Read Batak Dairi Job 19 Bible Online

Job 19 - Batak Dairi bible

Job 19

¹Nai nina si Job mo, “Kasa dak tong aku ingalngali kènè, janah isiksa kènè merkitè rana ndènè?

³Pukpuk ilèai kènè aku, janah oda mèla kènè mendersa aku.

⁴Mula pè salah pengelakongku, oda ngo i merogiken bamu.

⁵Idokdok kènè ngo ntègerren kènè daripada aku; kesusahèn idok kènè bukti kesalahenku.

⁶Bettoh kènè mo, aku enggo isiksa Dèbata, janah itangkup mi bagasen togong-togongNa.

⁷Kemulihken pemaingna i kumelapas ngo aku, tapi isè poda mendatèken aku. “I dikè ngo keadilen,” bagi ngo dilo-dilongku tapi oda lot simendengkohken aku.

⁸Irungga Dèbata ngo dalanku, gabè oda ndorok kudalani, gellap tuiten ngo ibaing dalanku i.

⁹Irampasi ngo karina hartangku, janah icèdai kinimendè gerarku.

¹⁰Ilentem ngo aku arap suberri dalan, bagè kalak simemerkat urat suan-suaen, nai ibelli mo ndersa soh males, bagi ngo karina sikuharapken irampas.

¹¹Merngetnget ngo laga Dèbata taba aku; iètong ngo bagè musuhNa aku.

¹²TenterraNa menjuhap oda terambaten dalanku pè iambat, janah undung-undungku ikeppung.

¹³Kaka anggingku ipedaoh bangku nai; gabè kalak sidèban ngo aku bai karina tinandanku nai.

¹⁴Karina ngo pedaohken dirina kadè-kadèngku, dengan-denganku pè oda ièngèt nè aku.

¹⁵Naposongku daberru pè lupa taba aku indukna; iètong ngo aku bagè kalak siso tinandanna.

¹⁶Kudiloi naposongku, tapi oda mengaloi ia, tukasi pè kuèlèk ia merkitè rana selloh.

¹⁷Moyang atè sinibagesku menganggoh kessahku, denganku sibeltek pè oda uè mendessingi aku.

¹⁸I tengah ndalan ilèai anak-anak ngo aku; mula cènder aku, itertabai ngo aku.

¹⁹Supan-supanku bejogiten menengen aku itadingken kalak sikukelengi ngo aku.

²⁰Pellin koling nai ngo memalut tulan badanku; enggo mo naing matè bak mpostep kessahku.

²¹Alè supan-supanku, masèh mo atè ndènè bangku, kumarna tangan Dèbata ngo mengeligas aku.

²²Dak ngo idohken Dèbata aku; kasa icodi kènè ia? Madèng pulak iakap kè meniksa?

²³Oh lè, rupana karina ranangku isurat, gabè dakdak ngo ièngèt;

²⁴naing mo ipahatken mi batu merkitè bessi, asa tahan i gennep tikki.

²⁵Kubettoh ngo simengurupi aku merian i sorga; dungna Ia ngo roh mengurupi aku.

²⁶Tukasi pè kolingku mernanah dekket ugahen, tapi sidekkah merdaging dèng aku, Dèbata ngo kutengen.

²⁷Dekket matangku sendiri kutengen Ia, janah ukum bangku alè-alèngku ngo Ia. Melala pusuh peratèenku kumarna idokken kènè,

²⁸‘Bakunè caranta lako mendabasa?’ Itulus kènè ngo botcir lako maing perkara.

²⁹Tapi bagèndari kebiari kènè mo peddang! Kerna pungur Dèbata dekket menghukum jelma perdosa; nai tahu mo kènè, Dèbata ngo mengadili jelma.”