Read Batak Dairi Job 2 Bible Online

Job 2 - Batak Dairi bible

Job 2

¹Nai ihadep pengisi sorga nola mo JAHOWA, janah i sidi ma ngo dekket si Pengasung i.

²Nai ikuso JAHOWA mo ia, “I dikè nai ngo kono?” Ialoi si Pengasung i mo, “I perèdang-èdangen nai ngo mengagahi dunia.”

³Ikuso JAHOWA nola mo, “Enggo ma ngo iperdatèken kono naposongKu si Job? I suberri dunia oda lot bagèsa jelma setia dekket merandalna merukur. Iuèi ngo Aku janah oda nung lot jahat pengelakona. Hot ngo ia setia bangKu, tukasi pè enggo ièlèk-èlèk kono Aku, asa icilakaken kono ia oda pè lot sebabna.”

⁴Tapi ialoi si Pengasung i mo, “Mahargaen ngo kessah dekket kinijuah daripada harta. Uè ngo jelma merèken karina hartana asal mo ia tong nggelluh.

⁵Mula mersakit dagingna ibaing Kono, kennah mèter isumpahi ngo Kono.”

⁶Nai idokken JAHOWA mo mbang si Pengasung i, “Mula bagi baing mo barang bakunè sambing tabasa, asal mo ulang ibunuh kono ia.”

⁷Nai laus mo si Pengasung i i hadeppen JAHOWA nai, janah ugah-ugahen mo ibaing karina daging si Job i, mulai i tapap-tapap nèhèna nai soh mi babontakalna.

⁸Nai kundul mo si Job i gembar pulungen empak-empak, janah ibuat mo cepik-cepik sokan lako mengkerisi dagingna i.

⁹Idokken sinibagesna mo mbangsa, “Bakunè dèng mo kono setia bai JAHOWA? Sumpahi mo Ia, nai matè mo.”

¹⁰Ialoi si Job mo, “Bagè kata simoto ngo ranami. Kasa pellin simerandal kessa uè kita menjalo bai Dèbata nai, keppèken mula singgodo situlak?” Tukasi pè sempa bai si Job kinipersuk i, oda lot ruap katana menga- lo Dèbata.

¹¹Jèkat sisempa bai si Job i enggo soh beritana bai sitellu kalak alè-alèna imo si Elifas i kuta Teman nai, si Bildad kalak Suah dekket si Zofar kalak Naamah. Merarih ngo kalak i lako menongkir bak mengapoisa.

¹²Tapi itatap kalak i kessa mo i bekkas narih ndaoh nai dèng, hampir ngo maknè itandai kalak i ia. Mèter muo-uo mo kalak i ninganna iribaki olesna janah ihamburken abu mi babo dekket mi takalna.

¹³Kundul mo kalak i i tanoh pitu ari pitu berngin i gembar si Job, tapi singkebabah poda mengerana, kemulihken mbotongna idah kalak i sigongenkenna i.