Read Batak Dairi Job 21 Bible Online

Job 21 - Batak Dairi bible

Job 21

¹Ialoi si Job mo, “Dengkohken kènè mo sinaing kudokken; pellin i ngo kessa kupido mahan pengapoien.

³Paduè kènè mo aku mengeranai, enggo kessa i ndorok nola mo kè mengelèai!

⁴Oda ngo dekket jelma aku merselisih, mula pè kurang sobar aku, oda pella kadè i.

⁵Tengen kènè mo aku, gabè lengang mo kènè, gabè nono janah ngangang mo babah ndènè.

⁶Mula simasa bangku èn kuradumi, menggirgir mo aku kumarna mengeri-ngeri.

⁷Kasa nola kalak perjahat nggeddang umurna ibaing Dèbata, janah dak terrus mertambah-tambah hartana?

⁸Ndekkah ngo kalak i nggelluh gabè idah mo kempu-kempuna soh mbelgah.

⁹Rumah tanggana pè mènak karina; kumarna oda ipesempa Dèbata olpek bana.

¹⁰Pinakan kalak i pè merrak-merrik, oda pella susah lako meranak.

¹¹Dukak-dukakna menganjak kerna lolona, bagè anak biri-biri meriaia.

¹²Idengani sora dhah-dhah, sordam bak kucapi, rami kalak i merendè dekket tumataki.

¹³Mersennang-sennang ngo kalak i mengkeriken ari-ari nggelluhna, dom kedamèen ngo mula matè ia.

¹⁴Keppeken idokken kalak i ngo taba Dèbata, “Tadingken mo kami janah laus mo ko; nina. Oda parduli janah oda perlu kami mengarusi, maksud dekket sura-suraMu bai nami.”

¹⁵Dok atè kalak i, “Oda kadè labana menguèi Dèbata, janah mersodip pè tabasa oda kadè gunana.

¹⁶Otang kumarna gegohta sambing ngo, dapet kita sinipercinta ukurta?” Tapi ukum aku cituk poda tuju ukurku mi sura-sura sibagidi.

¹⁷Nung ngo ndia pelita perjahat ièntepken, janah sempa bana olpek bak tonan? Nung ngo ndia Dèbata punguren taba kalak i, gabè ihukum kalak i?

¹⁸Nung ngo ndia kalak i bagè ronci bak cirabun, sinikabangken angin mengembus bak topan?

¹⁹Idokken kènè dèng ma, “Dukak ihukum Dèbata kumarna dosa bapana.” Tapi ukum ningku: Jelma perdosa i ngo ihukum Dèbata, asa satdar kalak i kulih sebab dosana, memaing itenges Dèbata hukumNa.

²⁰Belli mo kalak perdosa menggongken dosana, belli mo irasai pungur Dèbata Sintèmbul i.

²¹Mula enggo salpun tikki jelma i dunia, isarihken dèng ma ngo ndia tah sennang tading-tadingenna?

²²Terbaing jelma ngo ndia mengajari Dèbata, keppèken Dèbata ngo menghukum pengisi sorga?

²³Lot ngo kalak njuah-njuah sidekkah nggelluhna; matè pè ia puas jah suntuk pengakapna. Permatèna pè sennang oda lot kurangna, ai dom dèng ngo gegohna.

²⁵Tapi lot ma ngo kalak matè ibagasen kinipersah, oda nung iakapi kesennangen.

²⁶Tapi rebbak bonter ngo kalak i i kuburen; iremmuti goya bak olong.

²⁷Ai kubettoh ngo kadè isura-surai kènè dekket karina kejahaten sinitaki ndènè.

²⁸Kuso-kusomu, “Idikè ngo bages penguasa simengulaken pengelako durhaka?”

²⁹Oda ngo pennah ikuso kènè singgati mengeranto? Oda ngo tok kènè mi berita sukuten kalak i?

³⁰Nina kalak i, “Tikan dapet ari Dèbata mendabuh hukum karina perjahat oda kenna hukum.”

³¹Oda lot mengaduken ulah-ulahna; oda lot simemales kejahatenna.

³²Itaruhken mo ia mi pendèbaen janah ipemasuk mi liang kubur; pendèbanna tong ijaga janah iatur.

³³Merribu ngo kalak merdalan menaruhken bangkèna; melamlam ma ngo tanoh i menamburisa.

³⁴Jadi numar ngo pengapoimu janah luap karina pengaloimu.”