Read Batak Dairi Job 22 Bible Online

Job 22 - Batak Dairi bible

Job 22

¹Nina si Elifas mo, “Karina jelma manusia, sada kalak poda merguna bai Dèbata. Kalak simerukur dekket merbeddi merguna pellin mi dirina sendiri.

³Kadè ngo gunana bai Dèbata, mula pè iulaken ko sinipergeddoNa? Lot pana perlabanNa, mula pè nggelluhmu oda lot kurangna?

⁴Oda ngo kumarna merkebiaren ko midah Dèbata, asa idokken merdosa,

⁵tapi kumarna mbuè kalohon ngo dosamu, janah jahat kalohon ulah-ulah bak pengelakomu.

⁶Mula oda tergarar kadè-kadèmu utangna, irampasi ko mo karina pakènna.

⁷Kalak siledja oda iberrè ko ènumen, kalak simelèhè oda iberrè ko panganen.

⁸Iasangken kono pangkat bak kuasa, lako mengelaum tanohna karina.

⁹Ulang lebbè simebalu iurupi kono, tapi kalak simelumang pè itèndes kono.

¹⁰Kemulihken i dom togong-togong ngo i sikulilingmu, janah sintempu idomi buradan ukurmu.

¹¹Ari makin gellap, maknè ko merpendidah ipadiat; lenneng mo ko iampuh laè mengeraja.

¹²Otang merian i langit sindatesna kalohon ngo Dèbata, nai menengen mi bintang sindatesna tapi tong i terruhna?

¹³Tukasi bagidi ikuso kono, “Kadè pemettohenna I? I balik hembun ngo ia oda terhukumsa kita.”

¹⁴Idokdok ko tertutup hembun ngo penengenNa, janah pellin I baleng langit bak tanoh kessa perdalanenna?

¹⁵Mada ngo tettap kono merdalan i dalan sinipilih perjahat?

¹⁶Iranggutken ngo kalak i tikan madèng dapet ketika permatèna, janah iampuh laè mbellen mengeraja.

¹⁷Kalak i ngo pang menulak Pergegoh Sisotercodi, janah idokdok oda terbaingsa maing barang kadè taba kalak i.

¹⁸Keppèken Dèbata ngo memaing kalak i kaya! Tuhu-tuhu oda kuarusi pikiren kalak merjaya!

¹⁹Simerpengelako selloh, tertaba dom oang-oang, mengidah perjahat terolih hukumen.

²⁰Karina harta perjahat enggo kerri binasa, janah api ngo mengelekkup kerri kadè dèng lot iba.

²¹Alè Job, merdamè mo ko dekket JAHOWA, asa dapet kono kemènaken. Mula iulaken kono i, dapet kono mo laba olih arap i.

²²Jalo mo kadè siniajarken JAHOWA bamu; radum-radumi mo i i bagasen ukurmu.

²³Mulak mo ko mi JAHOWA merdengan ncerrep ukurmi, janah kejahaten i bagesmu kennah petadi.

²⁴Patakken mo emmasmu sienggo itingtingi, kebekken mi baruren laè sienggo marsak laèna i.

²⁵Baing mo Siperkuasa kalohon i gabè emmasmu, dekket pirak maharga bamu.

²⁶Nai terbaing ko mo dak percaya bai Dèbatamu, dekket memettoh Ia ngo benna ketuahenmu.

²⁷Mula mersodip kono, Ialoi ngo sodipmu, nai terbaing kono mo meneppati jandimu.

²⁸Dak mo merhasil usahamu, dekket sinterrang mencuhayai nggelluhmu.

²⁹Kalak sijukkat ipeterruh JAHOWA, tapi sincerrep merukur iperkinijuahi JAHOWA.

³⁰Iurupi Dèbata ngo ko mula oda mersalah, dekket mula iulaken ko nipergeddoNa.”