Read Batak Dairi Job 23 Bible Online

Job 23 - Batak Dairi bible

Job 23

¹Tapi ialoi si Job mo, “Dak kumelapas ngo aku kekelsohen taba Dèbata; oda tertahan aku menggong kelsoh kelsoh.

³Nong tupèh, kum kubettoh kin nemmu i dikè Ia, asa laus aku mendahisa.

⁴Nai baNa mo perkarangku èn kuhadepken, marir mo i babahku nai kata pembèlaen.

⁵Sèkel aku naing memettoh kadè naing iruapken, janah barang bakunè Ia mengaloi.

⁶Mada ngo ndia Ia naing pacidahken kuasaNa bangku? Oda! Bakunè pè kennah idengkohken ngo ranangku.

⁷Ai so mersalah aku janah ndorok ngo kubèla diringku i hadeppenNa, nai idokken mo maluah aku soh sidekkah-dekkahna.

⁸Kutulusi Dèbata i kebincaren, kesunduten, selatan bak i utara, tapi oda lot i sidi Dèbata; janah oda lot jumpa aku Ia.

¹⁰Tukasi pè bagi ibettoh ngo karina dalanku dekket gennep langkahku. Mula bagè emmas ioji ukurku, terbettoh mo mbentar ukurku.

¹¹Dak bujur ngo aku menguèi tabasa, oda nung menurimpang aku arap dalan sinitentukenna.

¹²Karina perèntah Dèbata dak ngo kuuèi, lemmo atèNa ngo kuèkuti, oda ngo nipergeddongku sendiri.

¹³Oda nggèut mobah Dèbata oda lot isè ndorok mengalosa. Ibahan ngo barang kadè gerrek atèNa.

¹⁴Ipedalan ngo bangku sura-suraNa i, janah mbuè dèng ngo sura-suraNa laènken i.

¹⁵Kumarna buradan midahsa, menggirgir ngo aku; mula makin kupikiri, makin buradan ngo aku.

¹⁶Ilicat Siperkuasa i ngo keberaninku. Mbiar aku kumarna Dèbata, oda kumarna gellap bulita, tukasi pè sigellap i mengkulilingi aku dekket menangkemmi abèngku.