Read Batak Dairi Job 24 Bible Online

Job 24 - Batak Dairi bible

Job 24

¹Kasa oda itetapken Dèbata ari perhukumen, asa kalak simenandaisa terolih keadilen?

²Lot ngo kalak mengkisir baleng, asa tanohna makin mbellang. Itulus kalak i ngo pulungen biri-biri ipekandang nola mi kandangna sendiri.

³Ikilang kalak i ngo kalodè anak melumang; lembu sada daberru mbalu pè, irampasi mahan gadèna.

⁴Iambati kalak i ngo sincor menjaloken hakna, nai terpaksa mo ciboni kalak sincor siso lot barang kadèna.

⁵Jadi tosè bagè kalodè meriar mo sincor i menulusi panganna irambah i; pellin i bekkas i ngo kessa lot pangaen bai dukak-dukakna.

⁶Juma sidèban mo kennah iulaken; buah anggur kalak perjahat pè kennah ia pepulungken.

⁷Oda lot selimut dekket olesna pepedasken daging tikan berngin kessa.

⁸Lasah mo ia kenna udan ndor i delleng nai iperapat mo mi delleng batu i lako culèndung.

⁹Ihamba kalak perjahat ngo dukak siso merinang merbapa, ibuat kalak i ngo dukak sincor simerutang bana.

¹⁰Laus ngo kalak sincor oda meroles melèhè ngo ia tikan merani i juma.

¹¹Ibahan mo minak i kayu zaitun dekket i buah anggur nai mahan ènumem, tapi ukum ia dak ngo muasen.

¹²I karina kuta terdengkoh pendeherreng kalak sipate-patèen, kalak siugahen pingko-pingko mengido tambaren, tapi oda idengkoh Dèbata sodipna oda uè menarihkensa.

¹³Lot ngo kalak ntarar menulak dekket mengalosa, oda itandai dekket oda ièkutken dalanna.

¹⁴Takuak manuk kèkè sipemunuh i pedeemnna nai, karuar mo ia lako memunuh kalak ncor bak ndersa i, janah sinderrang madèng nterrang ari, mengerimrim ngo ia bagè penangko.

¹⁵Perlangkah julu meddem dak mèma bon ari ngo ia, ibaluti mo abèna asa ulang itandai dèba ia.

¹⁶Penangko menangko i bages tikan gellap ari, tikan mahar ipesisi ngo sinterrang ninganna ciboni.

¹⁷Mbiar ngo ia mula siceggen janah buradan, tapi ukum gellap tuiten, pesennangken.”

¹⁸Nai nina si Sofar mo, “Kalak perjahat iampuh laè mbellen, tanoh milikna i pè kenna sempetta ibaing Dèbata; pekken anggurna melongo bagèndari, oda lot mengula i sidi nèngè.

¹⁹Bagè ès mersep kenna leggo bak mataniari, bagi ngo jelma perdosa itellen kematèen idi.

²⁰Inangna pè mengelupakensa, dekket goya kipangani dagingna. Isè nè poda mernèngèt gerarna; bagè kayu mbongkar tumpat mo ia.

²¹Karina i masa kumarna daberru mbalu pè itèndes ia, janah kejam ia taba partua ibages siso lot anakna.

²²Tapi ukum Dèbata, merkitè kuasaNa, pelausken kalak mergegoh. Mertindak kessa Dèbata, nai matè mo kalak durhaka.

²³Mersennang-sennang ngo nggelluhna ibaing Dèbata tapi oda mengadi-ngadi ia memperdimatasa.

²⁴Pellin sigejap kessa sennang ia, tapi laus nola mo ia soh sidekkah-dekkahna. Males mo ia bagè dukut siso merguna; bagè rohi pagè sinipotik tan batangna.

²⁵Tapi isè ndorok mempersomada siteridah i, barang menjabab sikudokken idi?”