Read Batak Dairi Job 26 Bible Online

Job 26 - Batak Dairi bible

Job 26

¹Nai idokken si Job mo, “Pandèna i ko merrèken pengurupien bangku jelma ndotè janah lejaen.

³Sondel mo mendèna ajar bak peddahmu sienggo iberèken ko bangku jelma moto.

⁴Bai isè ngo itujuken kono ranamu i? Ise mengajari ko lako mengerana bagi?”

⁵Maloi si Bildad mo, “Kalak simerian i napa kematèen menggirgir; laè dekket pengisina dumegger.

⁶Mbuka ngo lembeng kematèen i hadeppen Dèbata, oda ngo mertutup gabè ntarar idah Ia.

⁷Dèbata ngo pekimbangken langit i babo laut i, dekket menghanaken tanoh èn ipas sinumar i.

⁸Ibaing ngo hembun merembah laè merginja-ginja, tukasi bagi, oda meribak hembun i kumarna botongna.

⁹Iboniken ngo abè bulan purnama i balik hembun sienggo nipekimbangNa.

¹⁰Iokir ngo cengko i sisik laut lako menirang mahar dekket berngin.

¹¹Mula menergang Ia dekket sora nggang tihang penopang langit dumegger.

¹²Laut mbellang i pè talu ibaing kuasaNa, si Rahab pè iajar ngo merkitè kepandènNa.

¹³Isempul kessahNa ngo langit i gabè ncihur kalohon; tanganNa ngo munuh naga sienggo naing mperrus lojang.

¹⁴Tapi karinana i gabè tanda-tanda kuasaNa; pellin ikosikken ngo kessa soh mi pènggelta. Cituk kalohon ngo pengarusinta tersèngèt Dèbata dekket kinimahantu kuasaNa!”