Read Batak Dairi Job 28 Bible Online

Job 28 - Batak Dairi bible

Job 28

¹Lot ngo bekkas menulusi pirak i ikurkuri; lot ma ngo bekkas emmas itingtingi.

²Bessi ikurak i tanoh nai; tembaga ilala i batu nai.

³Sigellap tuiten ibellus ngo i bekkas mbages kalohon iselidiki. I sidi mo, ipas sigellap tuiten i itulusi jelma ngo batu-batu i.

⁴Ndaoh i bekkas siso lot pengisina, madèng nung lot mendedoh bak memellussa jelma i mengula ningan ciranggun ipas tinali ipas liang sinikurak simelongo kalohon i.

⁵Tanoh menghasilken pangaen bai jelma tapi i terruh tanoh i ma, karina ipesompar-baèrken gabè sapar-sèpor mo pengisi tanoh èn.

⁶Batu i terruh tanoh merisiken simaharga i dekket abuna merisiken emmas pelangki.

⁷Oda ibettoh keliki dalan mi sidi, kak pè madèng nung ngkabang mi babona i.

⁸Madèng nung singa barang pè binatang sidèbanna i memellus dalan melongo laus mi sidi.

⁹Ikerruk dèba ngo batu barang bakunè mpihirna, igargar ngo delleng soh mi uratna.

¹⁰Tikan itembuk dalan ibas delleng batu i sidi mo dapetsa permata maharga tuhu-tuhu.

¹¹Soh mi takal laè ngo ikuraki, nai teridah mo kadè simboni.

¹²Tapi i dikè ngo kebijaken ndorok situlusi? I dikè ngo kita merguru asa siarusi?

¹³Ukum kebijaken oda lot dapet i tengah-tengah jelma oda lot isè memettoh hargana situhuna.

¹⁴Dangaen laè bak laut mengerana magahken oda lot bana sibasa-basa.

¹⁵Sibasa-basa oda tertukar merkitè emmas tulèn bang merkitè pirak pè oda tertokor.

¹⁶Emmas dekket pirak simahargana oda teralosa hargana.

¹⁷Emmas barang cermin halus oda terpedos dekketsa, oda tertokor i merkitè harta buratda.

¹⁸Mahargaen dèng ngo sibasa-basa daripada emmas matah, emmas kertas barang mutiara.

¹⁹Intan topas tulèn bak emmas buratda oda kadè dèng i mertimbangken kepantasen sibasa-basa.

²⁰Idikè ngo benna kebijaken? Idikè ngo dapet kita pengarusen?

²¹Oda lot sagumanna simenggormit mengidahsa, manuk-manuk simerkabangen i pè oda nung menengensa.

²²Banua terruh bak kematèen pè mendokken pellin saringongona ngo kessa idengkohken.

²³Pellin JAHOWA ngo kessa memettoh bekkas kepantasen i, pellin Ia ngo kessa mettoh dalan mi sidi,

²⁴kumarna Ia ngo mengidah punca dunia ai sagumanna siniterruh langit iperdimata.

²⁵Tikala iberèken gegoh bai angin i, dekket tikala ipetettah baleng laut i;

²⁶tikala itentuken bekkas udan ndabuh, dekket dalan sibellusen pelian bak renggur;

²⁷tikala bagidi mo idah kebijaken sinaing basa-basankenNa, ioji mo hargana, nai iberèken mo pasu-pasuNa.

²⁸Nai idokken JAHOWA mo mbang jelma i, “Asa terolih kebijaken, kennah ipesangap ngo JAHOWA i. Asa ndorok niarusi, kejahaten kennah nipesisi.”