Read Batak Dairi Job 29 Bible Online

Job 29 - Batak Dairi bible

Job 29

¹Iterrusken si Job mo mengerana, nina mo,

²“Ukum ndorok nemmu aku bagè siarnia, tikan aku ikelini Dèbata.

³Dak ngo aku terolih pengurupen, ibendangi tikan merdalan i kegellapen.

⁴Imo ari termurmurku, tikan persupanen JAHOWA mengelènggemmi bagesku.

⁵Tikala i dak simerkuasa i ngo mendengani aku, dukak-dukakku pè mencingkoi aku.

⁶Susu pè mbuè ngo hasil pinakanku. Mbuè minak hasil kayu zaitunku, tukasi isuan i tanoh merbatu-batu.

⁷Mula rebbak kundul pengetuai sinikuta janah kubuat bekkasku i kellang-kellangna,

⁸mèter sumisi mo anak perana, enggo kessa aku iidah ia. Situa-tua pè kèkè ma; lako merèken hormat ma.

⁹Kalak perpangkat ndates pè sip oda mengerana,

¹⁰kalak simpantasniasè pè maknè mendokken kata.

¹¹Isè pè kagum mula idengkoh tersèngèt aku; barang isè mngidah aku, ipoji ngo jasangku.

¹²Kumarna, kuurupi ngo sincor simido pengurupen; kutumpak ngo sitading melumang siso merpenumpaken.

¹³Ipoji kalak sincor janah mpersah i ngo aku, mènak karina simbalu kerna pengurupingku.

¹⁴Ntèger oda mertikas pemahanku; dak adil ngo pecèndekenku.

¹⁵Mata ngo aku bai kalak sipètung; nèhè ngo aku bai kalak sipangpangen.

¹⁶Bai kalak sincor, bapa ngo aku; bai kalak pengeranto, pengurupi ngo aku.

¹⁷Kubohok ngo kuasa simaing siso puna-puna kupaluahi harta sinilaumna.

¹⁸Kuharapken ngo nggeddang umurku janah matè sennang i bagesku.

¹⁹Tosè aku bagè kayu nggomok perturahna, laè cukup mi uratna bak hembun mi bulungna.

²⁰Dak ipoji karina jelma ngo aku, janah oda pennah moru gegohku.

²¹Sip karina jelma, mula kuruapken peddahku; tuhu-tuhu ngo idengkohken karina ranangku.

²²Kessa pul aku mengerana, oda lot siperlu tambahen; ranangku i mbengket bagè laè udan.

²³Karina kalak mersampang atè mendengkoh ranangku, bagè simerjuma, mula roh udan tikan leggo ari.

²⁴Kucèremmi kalak mula putus asa ia permbinar abèngku mengèkèi ukurna.

²⁵Aku ngo gabè èkuten bak menettapken karina keputusen. Kuuluken kalak i, bagè raja mi parangenna, janah kuapoi kalak i tikan bonek ukurna.