Read Batak Dairi Job 3 Bible Online

Job 3 - Batak Dairi bible

Job 3

¹Nai mongkam mo si Job, isumpahi mo ari pertubuhna nina mo,

²“Ialè Dèbata, sumpahi mo ari pertubuhku, dekket berngin tikan sellet aku i daging inangku.

⁴Ialè Dèbata, gellap mo baingken ari i sasa mo karina ipas pernèngètenMu nai; ulang mo paduè nèngè cuhaya merbendella menerangisa.

⁵Baing mo ari i gellap tuiten, gellap bulita, mehèrem bak mehèjem; lègenni mo dekket hembun bak remmang kemkemmi mo ipas cuhaya mataniari nterrang.

⁶Naing mo nemmu berngin ibennèken arap jujuren tahun bak bulan; ulang nèngè mo i èngèten ulang ma pella nè bilangen.

⁷Belli mo bernginna i dom kegellapen oda lot kial, oda lot kelolonken.

⁸Kènè alè nangguru, bak sindorok pelemukken Naga, sasa mo ari i merkitè sumbiah janah sumpahi;

⁹ulang sanga bintang perlambuk mercuhaya, ulang paduè mataniari mbincar mercala-cala. Belli mo berngin i datina memèma pekiroh ari dekket pengharapen rembaru.

¹⁰Merolpek mo berngin simerjaya i tikanna aku itubuhken inangki, janah ibelli menggongken kinidersa i.

¹¹Kasa oda matè aku i kandongen inangku barang mpostep kessahku tikan tubuh i aku?

¹²Kasa sanga aku iabing bak icèmun inangku janah ipènumken laè polana bangku?

¹³Ukum tikanna i kin mo nemmu aku matè nai meddem janah mengadi mo aku oda masa kadè,

¹⁴bagè raja-raja bak perkuasa siarnia sipekadèken balik istana sinderbi i nola.

¹⁵Terpeddem mo aku bagè anak raja simensini bagesna dekket pirak bak buratda.

¹⁶Ulang kin nemmu merkessah tikan tubuh aku asa lènèk janah lana-lino perpeddemku?

¹⁷I sidi, ipas kuburen, perjahat mak ndorok memaing kejahaten, janah pengula sienggo kerri gegohna ndorok mengadi pelausken lejana.

¹⁸Kalak sitertaban pè mengakapken merasa ai oda isergangi perjaga.

¹⁹Ukum i sidi dos ngo karina jelma sitermurmur bak siso ternama. Janah ujungna maluah mo karina hamba.

²⁰Kasa ibelli jelma i nggelluh sengsara? Kasa iberrè sinterrang bai kalak sibonek roka?

²¹Lotien ngo bana kuburen daripada harta ipèma ngo kematèen, keppè laju oda roh bana.

²²Kesennangen ndorok iakapken mula enggo matè kalak i janah ikuburken.

²³Dèbata ngo dak mengelènggemmi ari kalak i ikulilingi janah dak ijagai ngo kalak i.

²⁴Gancih mangan, dak kekelsohen ngo aku oda mengadi-ngadi dak mendeherreng aku.

²⁵Karina siso èdepku sempa bangku karina sikukebiari mendendenni aku.

²⁶Oda lot kemènaken bangku oda merujung sudah kepersukenku.”