Read Batak Dairi Job 30 Bible Online

Job 30 - Batak Dairi bible

Job 30

¹Tapi bagèndari irèhèi siterposoen ngo aku. Arnia merlèasu ngo bapana i penengenku lako memaken biri-biri rebbak dekket biang perburungku.

²Ukum bangku maknè kalak i merguna kumarna enggo kerri gegohna.

³Melèhè ngo kalak i janah mpersuk kalohon, gabè urat ngkerrah mo ipangani i gurun simelongo kalohon.

⁴Irengkat kalak i ngo umbut i rambah kelongoen nai ipangan mo bulung dekket uratna.

⁵Iliplip ngo kalak i oda ndorok nè roh bagè kalak sipelausken penangko.

⁶Merian ibas liang nai ngo kalak i ruang sinidingding batu i mo bages kalak i.

⁷I rambah i mo kalak i derko-derko bagè binatang merdugun-dugun i terruh kayu mbellen.

⁸Oda nè mergerar bak oda nè maharga kalak i kalak sienggo iletlet i nagerrina nai.

⁹Bagèndari roh kalak i mentertabai aku; ukum bai kalak i pecilmang-ncilmang atè sambing ngo aku.

¹⁰Merlèa janah meronah ngo atèna midah aku janah icèduri kalak i ngo abèngku.

¹¹Kumarna JAHOWA ngo maing aku oda mergegoh jah ndotè, ipepuas kalak i mo lagana bangku.

¹²Nuhnuhen kalak i menjuhap aku i lebbè nai janah persudahku pè enggo isura-surai.

¹³Igettap kalak i ngo dalanku lako membinasaken aku; sada kalak poda lot menggerra tikan ikubu kalak i aku.

¹⁴Tosè bagè laè merginja itendeng kalak i ngo pertahanenku, rumiak-riak kalak i roh mendendenni aku.

¹⁵Kinimago mengkulilingi diringku; bagè pengembus angin salpun harga diringku; bagè hembun menap, mersep kesennangenku.

¹⁶Bagèndari enggo naing matè aku; oda lot nè ampunen mi kinipersukku.

¹⁷Tikan berngin karina tulanku mengèlu; oda mengadi-ngadi kekèrjeppen perasaenku.

¹⁸Ipokkik JAHOWA ngo aku merkitè kalèpak bajungku gabè menengkik mo pakènku i dagingku.

¹⁹Mi kubang ngo aku itulpasken tosè ngo aku mi empak-empak sambing.

²⁰Mula pingko-pingko aku baMu alè Dèbata, oda ialoi kono; mula mersodip aku, oda idengkohken kono.

²¹Sondel kejamna ibaing ko bangku, itèndes kono aku merkitè karina gegohMu.

²²Ibelli ko ngo angin mengkabangken aku; ipas angin sapa-sipu ipuyu ko diringku.

²³Kubettoh ngo, embahenmu aku mi kematèen, perbekkasen karina singgelluh ipepulung.

²⁴Kasa ijuhap Kono aku jelma sienggo cilaka èn, siso ndorok maing barang kadè laènken mido masèh atè?

²⁵Otang tangis ngo aku rebbak dekket kalak sikesusahen, janah masèh atèngku midah kalak sikurangen?

²⁶Dak kupèma-pèma ngo kesennangen bak sinterrang, keppè olpek dekket sigellap ngo merohen.

²⁷Irencèh bonek dekket simpersuk ngo aku; gennep ari makin mbuè ngo roh kinidersa bangku.

²⁸Ibas sigellap, oda lot cuhaya, dak kadap aku; cènder i lebbè sinterrem, megido pengurupien ngo aku.

²⁹Sorangku dom arsak dekket lui ma bagè aung sorigala dekket manuk-manuk unta.

³⁰Enggo mbèrèng kolingku; messeng ibaing nggara daging ngo badanku.

³¹Arnia kudengkoh ngo oning-oningen meria-ia tapi bagèndari pellin tangis milangi nai ngo kessa.