Read Batak Dairi Job 31 Bible Online

Job 31 - Batak Dairi bible

Job 31

¹Enggo merbulaban janah merjandi aku oda nè sir matangku menengen simerbaju.

²Kadè ngo ndia ibaing Dèbata banta? Bakunè ngo ndia pemalesNa pengelako jelma?

³Kennah cilaka bak kemagoen ngo ibaing taba kalak simengulaken kejahaten.

⁴Kennah ibettoh Dèbata ngo karina perulaenku; idah ngo karina perlangkahku.

⁵Kusumpahken mo, madèng nung kubaing siso puna-puna; madèng ma ngo pennah kuoto-otoi jelma.

⁶Dèbata mo nemmu menimbang aku ipas dacing sah nai ibettoh mo aku oda mersalah.

⁷Ukum enggo menirpang aku arap dalan ntèger barang ngkelleng atèngku midah ulah-ulah mekemmer, mula merguyu dosa tanganku,

⁸kalak mo kipangan karina sikusabur janah karina hasil ndiulangku mpurpur.

⁹Mula nung tergerrek ukurku midah sinibages gembar sapongku janah merboni-boni kuintip ia i balik pèntu

¹⁰gabè perdakan dèba pè sinibagesku; jadi mo barang i pentas daholi ndèba pè ia galè, belli mo.

¹¹Mula tuhu dosa sintengam i kuulaken patut ngo aku menjalo hukumen.

¹²Mengkeriken ngo dosa i bagè api naraka, karina milikku salpun ilekkupna.

¹³Tikan kekelsohen hambangku kerna kuhakai hakna kudengkohken ngo ranana, janah mendè kubaing bana.

¹⁴Mula oda bagi, bakunè mo ningku mengaloi Dèbatangku? Kadè mo jababku, tikan roh Ia memaing hukum bangku?

¹⁵Otang Dèbata ngo menempa aku, dekket menempa hamba-hambangku?

¹⁶Oda dèng nung aku mak uè mengurupi jelma mpersah, barang cubelli taba daberru mbalu putus asa.

¹⁷Oda nung dèng kubelli anak melumang rapar oda mangan, keppèken oda cukup pangaen.

¹⁸Mulai kètèk nai ngo kalak i kupehèdu-hèdu; dak kuteggu ngo kalak i sidekkah nggelluhku.

¹⁹Mula kuidah jelma sikurangen oda tertokorsa pakèen,

²⁰uol ipas bukbuk biri-biringku nai sendiri kubaing pempeddasken dagingna, nai ipoji mo aku ibas pusuh peratènna.

²¹Mula nung aku menèndes anak melumang, kerna tok aku kennah mennang mula iperkaraken,

²²atèna mpenggel duana tanganku asa sirang dekket badanku.

²³Oda nggèut maingken bagidi aku, kumerna hukum Dèbata ngo kebiarenku.

²⁴Oda nung kuasangken hartangku,

²⁵barang kuèndèl-èndèlken kinibèakku.

²⁶Oda nung kusembah mataniari simercuhaya nterrang barang bulan simerbendella melamlam.

²⁷Oda nung terendek aku bana barang kulempit jari-jaringku mersembah tabasa.

²⁸Dosa sibagidi patut terolih hukumen matè; kemulihken Dèbata Siperkuasa enggo iosè.

²⁹Oda pennah dèng sennang aku kumarna mpersah musuhku, barang meroang-oang kumarna sempa kinimago bana.

³⁰Oda kusodipken asa matè musuhku, oda nung kubaing dosa bagidi.

³¹Tahu ngo karina jelma simengula rebbak aku, magahken kutamuèi ngo barang isè sambing i bagesku.

³²Mbuka ngo bagesku bai jelma perdalan-dalan oda nung kubelli kalak i mermalam i kasèan.

³³Ukum kalak iperso ngo dosana tapi ukum aku oda nung kubaing bagè pemaingna.

³⁴Pendokken jelma nterrem oda kukebiari, bak pengelèai ndèba oda aku parduli. Oda nung aku ndong i sapo barang nono bagi kemulihken mbiar ilèai.

³⁵Oda ngo lot ndia jelma uè mendengkohken ranangku i? Kusumpahken magahken tuhu ngo karinana i. Ialoi Siperkuasa i mo nemmu ranangku i. Ukum pengaduen musuh tersèngèt aku nemmu isurat karina gabè ndorok idahenku,

³⁶nai ibagasen lolo kuampèken mi barangku, janah bagè rudang kubaing mi takalku.

³⁷Kubagahken mo karina sikubahanken taba Dèbata janah kudahi mo Ia ibagasen sampang atè bagè raja.

³⁸Ukum tanoh nikilang kin ngo sikuula i, sikurampasi bai sidasa nai,

³⁹tah bakunè hasilna kerri kupangan, keppè kalak simengulakensa kubelli kelèhèen,

⁴⁰ulang mo jagong bak pagè turah i juma i tapi kopi-kopi, dukut rih mo tubuh i sidi.” Ninggat i mo rana si Job.