Read Batak Dairi Job 32 Bible Online

Job 32 - Batak Dairi bible

Job 32

¹Kumarna tok kalohon ngo si Job tersèngèt ketègerrenna, gabè oda nè uè mengaloisa supan-supanna sitellu kalak i.

²Tapi tupung ngo lot i sidi sada kalak mergerar si Elihu anak si Barakheel, imo sada kalak pemparen si Bus i horong si Ram nai. Oda terhempeksa lagana, kumarna ipènterri si Job dirina dekket gabè Dèbata nola ngo isalahken.

³Melaga ma ngo ia taba sitellu kalak supan-supan si Job i, kumarna oda teraloen kalak i pendokken si Job i, tukasi pè isalahken kalak i ia.

⁴Si Elihu ngo siposona bai kalak i nai, kumarna i ipèma ngo lebbè pul kalak i karina mendokken rana.

⁵Idah kessa mo oda teraloen kalak i sitellu nèngè, gabè melaga mo ia,

⁶bagèen mo nina: “Poso dèng ngo aku, ukum kènè enggo tua-tua, kumarna i alang atèngku janah ragu mengeruapken pendapetku.

⁷Dok atèngku, kennah kènè mo mengerana, kennah ngo situa-tuana memagiken kepantasenna.

⁸Tapi simemerèken kepantasen taba jelma imo pellin Tendi Dèbata Siperkuasa.

⁹Gabè bijak jelma, oda kumarna nggeddang umurna gabè bennar pengarusi jelma, oda kumarna ndates umurna.

¹⁰Kemulihkenna idi, dengkohken kènè mo lebbè ranangku; padiat kènè mo kuruapken pendapetku.

¹¹Dak sobar ngo aku mendengkohken tikan kènè mengerana, dekket mèma tikan kè memikiri rana bijak sisellohna.

¹²Kuperatè-atèken mertuhu-tuhu; kudengkoh songket ngo iakap kènè. Kesalahen ibas pengeranaen si Job oda terbuktiken kènè.

¹³Bakunè mo terdokken kènè kepantasen i enggo jupa kènè? Kumarna kènè terpaksa merkinisohna. Sindorok mengaloi si Job imo pellin Dèbata.

¹⁴Taba kènè ngo si Job mengerana, oda ngo taba aku, tapi ukum aku, oda ngo bagè pengaloi ndènè ranangku.

¹⁵Alè Job, enggo jut iakap kalak i janah oda nè teraloisa; oda lot nè sindorok terdokkensa.

¹⁶Pellin jerjer nai ngo kalak i, oda nè terdokkensa rana. Nai kennah mèma mo aku, tukasi pè nono kalak i oda mengerana?

¹⁷Oda lèh, bagèndari kennah kubaing jababku; kuruapken mo pendapetku.

¹⁸Oda sobar nè aku memèma. Oda terhempek aku nè mak mengerana.

¹⁹Mula sip sambing aku, naing mpustak ngo pusuhku, tosè bagè tongkap bebak sin anggur rembaru.

²⁰Kennah mengerana ngo aku, asa puas penarihenku; kennah kubuka babahku mengeruapken jababku.

²¹Isè poda kuserapi ipas perkara èn, janah sada kalak poda lot kupoji-poji.

²²Oda kubettoh bagè cara memoji-moji janah mula kubaingken bagidi Sintempu iripurken Dèbata mo aku.