Read Batak Dairi Job 33 Bible Online

Job 33 - Batak Dairi bible

Job 33

¹Bagèndari pè alè Job, hanjar-hanjar mo radumi rana sinaing kudokken èn.

²Aku enggo mersudia naing mendokken rana.

³Ibas pusuh peratèenku nai ngo aku mengerana; sikuruapken èn mo situhuna.

⁴Tendi Dèbata ngo menempa aku dekket merèken kenggeluhen bangku.

⁵Jadi, mula ndorok, aloi mo aku. Isè ngo perculèndungenmu.

⁶Kono bak aku oda lot kalihna ukum bai Dèbata i tanoh dendang nai ngo kita itempa.

⁷Kerna i, ulang ko mbiar midah aku; oda lot niat menaluken ko ibas ukurku.

⁸Enggo kudengkoh bakunè ranamu, janah enggo kuarti mikè tujunmu.

⁹Idokken kono, ‘Bennar ngo aku, oda lot lampo kuulaken. Oda mertikas aku janah oda lot kubaing kesalahen.

¹⁰Tapi itulus Dèbata ngo dalan mengalo aku, janah ibaing ngo bagè musuhna aku.

¹¹Irantè ngo nèhèngku; janah iperdatèken karina perkoserku.’

¹²Alè Job, salah kalohon ngo pendapetmi! Kerna ndaoh belgahen Dèbata daripada jelma.

¹³Kasa idokken ko Dèbata siso menuihken jelma?

¹⁴Matcam ngo bagèna dalan Dèbata mengerana, kasi pè sada kalak poda memperatè-atèken kataNa.

¹⁵Salang tikan berngin sinderrang lènek meddem jelma merkitè nipi bak alaten mengerana ngo Dèbata.

¹⁶Idokken Dèbata ngo kalak i mendengkohken; isengget ngo kalak i merkitè sipesèngèt.

¹⁷Dok atèNa asa mentadi kalak i mengulaken dosa dekket asa itadingken ndates ukurna.

¹⁸Oda ibelli kalak i menggong simpersah; ilègenni ngo kalak i i kematèen nai.

¹⁹Ipesèngèt Dèbata ngo kalak merkitè ipesempa sakit asa dagingna idomi rasa simbernit.

²⁰Simersakit oda tellap iakap mangan moyang atèna tukasi pè marasa kalohon pangaen.

²¹Bagè kias-kias mo dagingna tulan-tulanna pè ragi karina.

²²Enggo mo naing balik ia mi bekkas sidekkah-dekkahna dunia kalak simatè enggo ndessing bana.

²³Tah lot sada dari pada seribu malaèkat Dèbata sipesèngètken jelma i bahanna, tah uè roh mengurupisa.

²⁴Ibagasen masèh atè malaèkat i mendokken kata, ‘Paluah mo ia, oda ndorok susur ia mi dunia simatè. En mo riar penebusna, asa mengolihi maluah ia.’

²⁵Dagingna gabè mengolihi mergegoh nola suang bagè anak perana.

²⁶Mula mersodip ia, masèh mo atè Dèbata bana, nai meria-ia mo ia memoji Dèbata, dekket iolihken Dèbata silot bana.

²⁷Nai i lebbè sinterrem dokenkenna rana, ‘Siso kasèa kudokken mendè, mbelgah ngo dosangku, tukasi bagi, oda ihukum Dèbata aku.’

²⁸Oda ipadiat Dèbata aku mi dunia simatè maing nggelluh dèng aku bagèndèen.

²⁹Enggo tah piga-piga kali dak ibaing Dèbata bagidi,

³⁰asa ndorok ipaluah jelma dekket merèken kesennangen i nggelluhna.

³¹Asa dengkohken mo alè Job, pecingir mo pènggelmu sip mo ko, bagèndari mengerana mo aku.

³²Tapi mula lot naing dokenkenmu, dokken mo ranamu janah mula ranamu ngo tuhu, uè ngo aku mengaku.

³³Tapi mula oda, sip mo ko dengkohken aku, naing kupedahken perbinettohen bamu.